Cakirok 29 - KITAWO MALEŊ Catholic

Yakobo tundo peco pa Laban

¹ Yakobo omedere i yo pere, aka otundo i piny pa ji ma yuwok ceŋ.

² Munyo go oŋiyo, oneno waŋ pi i sa, kodi sidwol rombo adek jonindo i thenge; rupiri kenyo ama rombo oyido jomadh'iye pi. Tele ma dhok waŋ pi oyido pando.

³ Kisi ka sidwol rombo jocokere, jokwath rombo joŋilo woko tele wok i dhok waŋ pi to jomiyo rombo pi, to doko jodwoko tele.

⁴ Yakobo openjo jokwath rombo ni, “Wutmera, wiwok yukune?” Jodwoko ni, “Wawok Haran.”

⁵ Openjo jo ni, “Wiŋeyo Laban, wod pa Nahor?” Jodwoko ni, “Ey, waŋeyo go.”

⁶ Openjo jo ni, “Go ber?” Jodwoko go ni, “Go ber. Neni, nyare Laker bino gi rombo!”

⁷ Yakobo owaco rijo ni, “Neni win, piny fodi, aka sawa fodi ma dwoko rombo; raŋo wikimiy jo pi to wikadho kwayo jo.”

⁸ To jodwoko go ni, “Wakinyali cuka sidwol je ocoki kanyacel, ka tele oŋil woko wok i dhok waŋ pi; nyaka to wamiyo rombo pi.”

⁹ Munyo Yakobo fodi luwo gi jo, Laker obino gi rombo pa bamere, rupiri go am'oyido kwayo jo.

¹⁰ Onyo munyo Yakobo oneno Laker nyar Laban ner mere, okidho to ŋilo tele wok i dhok waŋ pi, aka omiyo sidwol rombo pa Laban omin min pi.

¹¹ Kenyo Yakobo cwiyo lembi Laker to cwero pi waŋe ma Kisangala.

¹² Aka Yakobo owaco ri Laker ni go obedo wat pa bamere, aka ni go obedo wod pa Rebeka. Kenyo Laker oŋweco to waco ri bamere.

¹³ Munyo Laban owinjo kwoŋ wac ma mako kwoŋ okewo pere Yakobo, oŋweco romo gi go, aka opodho i kore to cwiyo lembe, aka otero go i ot pere. Yakobo owaco ri Laban gim'oyido otimere je,

¹⁴ aka Laban owaco ni, “Adieri ibedo coko gi del paran!” Yakobo obedo kenyo ma dwe acel.

Yakobo tiyo ri Laban ro Laker gi Leya

¹⁵ Kenyo Laban owaco ri Yakobo ni, “Rupiri ibedo wat paran, inotiy ran manono? Waci ran, cul perin labedo aŋo?”

¹⁶ Laban oyido nitie gi nyir ario; madwoŋ oyido ilwoŋo ni Leya, aka mathin ilwoŋo ni Laker.

¹⁷ Waŋ Leya oyido lwor, aka Laker oyido ŋon aka ja waŋtek.

¹⁸ Yakobo oyido omaro Laker aka owaco ni, “Alatic rin ro nyarin Laker ma oro abirio.”

¹⁹ Laban odwoko ni, “Ber amiyin go loyo miyo jacwo man; bedi kodan ka.”

²⁰ Yakobo otiyo ma oro abirio ro Laker, aka ocale rigo pa ndelo manok rupiri oyido omaro Laker.

²¹ Kenyo Yakobo waco ri Laban ni, “Miyan dhako paran anywom go, kole hongo paran orumo.”

²² Ameno Laban ocoko kanyacel cwo ma kabedo no, aka otimo kalima.

²³ To othieno, Laban okwanyo nyare Leya to kelo ri Yakobo, aka Yakobo onindo gine.

²⁴ (Laban omiyo Leya ŋeca pere m'ilwoŋo ni Zilipa paka jatic pere.)

²⁵ Aka odikin nyaka to Yakobo niaŋ ni oyido obedo Leya. Yakobo openjo Laban ni, “Itimo ran aŋo me? Akitiyo rin ro Laker? Raŋo onyo iwondan?”

²⁶ Laban odwoko ni, “Kitimere i piny mawan miyo nyako mathin mafodi makayo.

²⁷ Cow sabiti acel me, aka nyaka walamiyin Laker bende k'inotiy ran ma oro abirio doko.”

²⁸ Yakobo otimo ameno, aka munyo sabiti acel orumo, Laban omiyo go nyare Laker bedo dhako pere.

²⁹ Laban omiyo nyare Laker ŋeca pere m'ilwoŋo ni Biliha tiyo rigo.

³⁰ Yakobo onindo gi Laker bende, aka oyido omaro Laker loyo Leya; aka otiyo ri Laban kendo ma oro abirio.

Nyithindho m'onywol ri Yakobo

³¹ Munyo Rwoth oneno ni Yakobo omaro Laker loyo Leya, oyawo iy Leya, to cego apa Laker.

³² Leya ogamo iye, to nywolo wode, aka ocwoko nyinge ni Ruben rupiri owaco ni, “Rupiri Rwoth oneno candirok paran; adieri cworan nyaka lamaran.”

³³ Doko go ogamo iye to nywolo wode to waco ni, “Rupiri Rwoth otieko winjo ni odakan, omiyan wodan me bende.” Go ocwoko nyinge ni Simeo.

³⁴ Odoko Leya ogamo iye, aka onywolo wode man, aka owaco ni, “Pama rume cworan bino riwirok kodan; rupiri atieko nywolo rigo cwo adek.” Ameno ocwoko nyinge ni Levi.

³⁵ Kenyo doko go gamo iye to onywolo wode man, aka owaco ni, “Rume abino pako Rwoth.” Riameno ocwoko nyinge ni Yuda, kenyo to go cungo nywol.