Cakirok 19 - KITAWO MALEŊ Catholic

Reco pa Sodom

¹ Jomalaika ario jobino Sodom othieno, aka Loti oyido obedo i waŋkac ma tindi madwoŋ. Munyo Loti oneno jo, oay to kidho romo gi jo, aka okulo wiye piny

² to waco ni, “Jodongo paran, mondo akwayo winindi i ot pa ŋeca mewin wor me; ŋey wilwok tiendi win, aka wiay con to wikadho yo mewin.” Jodwoko ni, “Be, wabino nindo i yo.”

³ To Loti medere ywak rijo swa, aka jowire bonge to jodonjo i ot pere. Loti otimo rijo kalima, aka otedo rijo mugat ma buthow to jocamo.

⁴ To munyo fodi jok'odonjo nindo, cwo je ma tindi madwoŋ, cwo ma Sodom, mathindho gi m'otegino je jobino to jothoko ot

⁵ to jolwoŋo Loti ni, “Nikune cwo ma jobino bongin othieno me? Wodhi riwan jo, ŋey wanindi gi jo.”

⁶ Loti okidho woko bongi jo, aka ocego thigo yuŋeye

⁷ to waco rijo ni, “Akwayo win wutmera, wikiri witim gikidakana no!

⁸ Neni, anitie gi nyir paran ario mafodi jokuya cwo; weyi awodhi riwin jo, aka witim gi jo gima cuny wimito. To wikiri witim gimoro ri cwo me, rupiri jobino i ot paran.”

⁹ To jowaco ni, “Ngoye woko ruwaŋ wan, in japath bende inowaci riwan gir'atima! Ere onyo wabino tiyo kodin ayin marac loyo jo.” Kenyo jodhiro Loti cen, aka jocore cegin turo thigo.

¹⁰ To cwo no jotelo cingi gin, aka joywayo Loti i ot bongi jo to jocego thigo.

¹¹ Kenyo colo omako waŋ cwo m'oyido jonitie woko ma jok'onyalo neno dhiot.

Loti weyo Sodom

¹² Kenyo cwo ario no jowaco ri Loti ni, “K'initie gi ocin, wotin, nyir, kosa ŋatiman i tindi madwoŋ, wodhi jo woko

¹³ rupiri wacegin reyo woko ka, rupiri kigeŋisa kwoŋ ji mere olokere madwoŋ ruwaŋ Rwoth; aka Rwoth ooro wan reyo woko.”

¹⁴ Kenyo Loti kidho bongi cwo m'oyido jolanywomo nyir pere to waco rijo ni, “Redi win wingoye woko ka, rupiri Rwoth kidho reyo woko tindi madwoŋ.” To cale rijo paŋini Loti oyido loko wac.

¹⁵ Munyo piny keko, jomalaika ario joywak ri Loti munyo jowaco ni, “Ay ikwany dhako perin gi nyikin ario ma jonitie ka, ŋey wikiri wirere i gir'acula ma tindi madwoŋ.”

¹⁶ To Loti tangatanga. Ameno cwo ario no jomako Loti, cege, kodi nyir pere, rupiri omako gine wor, to wodho jo woko ma tindi madwoŋ.

¹⁷ Kenyo Malaika acel okoko ni, “Ŋwec win ri kwo mewin, wikiri wiŋiy cen, kosa wicungi milelo; ŋwec win i wi tendere, ŋey wikiri witho.”

¹⁸ To Loti dwoko ni, “Be, mondo jadwoŋ ikir'imiy wan timo gino.

¹⁹ Neni, i atieko nwaŋo wor ruwaŋin, aka inyuthan wor madwoŋ swa ibotho kwo paran. T'akinyali ŋwec kiri wi tendere, teko bino ŋolan t'atho mafodi akitundo kenyo.

²⁰ Ineno tindi mathin macegin no? Weyi waŋwec wakidhi kenyo, aka go thin, aka kwo paran bino both.”

²¹ To malaika dwoko go ni, “Neni, ayere kodin bende ni ak'orey tindi no.

²² Kwakere, ikwale kenyo, rupiri akinyali timo gimoro je cuka itundo kenyo.” Meno am'omiyo ilwoŋo tindi no ni Zowar.

Ireyo Sodom gi Gomora

²³ Waŋceŋ oyido gulo munyo Loti otundo Zowar.

²⁴ Kenyo Rwoth omiyo lietho gi mac m'ogeŋo ŋeti jo wok i polo cwe kwoŋ Sodom gi Gomora

²⁵ aka oreyo woko tindin madongo gi milelo, kodi ji je gi gimoro je m'oyido odongo i lowo.

²⁶ To cipa Loti oŋiyo cen, aka olokere siro cumbi.

²⁷ Abraham okidho odikin maŋic, i kabedo m'oyido go ocung'iye ruwaŋ Rwoth,

²⁸ aka oneno yupiny yu Sodom gi Gomora, kodi milelo je, to neno yiro duny malo pa yiro ma wok kwoŋ mac m'odheth.

²⁹ To munyo Were reyo woko tindin madongo gi milelo, opoyo Abraham, to wodho woko Loti munyo go oreyo woko tindin m'oyido Loti bed'iye.

Cakirok pa Jomowab gi Joamon

³⁰ Rupiri Loti oyido lworo bedo Zowar, go okidho gi nyir pere ario i wi tendere to jobedo i ŋungu tele.

³¹ Kenyo nyare makayo owaco ri mathin ni, “Bawan oti, aka cwo ongoye i piny gibe ma jonyalo bino to jonywomo wan ŋey wabedi gi nyithindho.

³² Biye wamiy bawan vini womadhi ŋey wanindi gine to wanywolo nyithindho gi go.”

³³ Wor no jomiyo bajo to madho vini, aka nyare makayo onindo gi bamere. To Loti oyido kuya rupiri oyido omer swa.

³⁴ Yawere mere nyar Loti madwoŋ owaco ri mathin ni, “Neni wor ma nyoro anindo gi go, weyi doko wamiy go vini womadhi, ŋey in bende inindi gi go; aka wajoje wanywol nyithindho gi bawan.”

³⁵ Ameno wor no jomiyo ba gin madho vini kendo, aka mathin mere okidho to nindo gi bamere. Aka Loti doko k'oŋeyo rupiri oyido omer swa.

³⁶ Ameno nyir pa Loti jonywolo nyithindho gi ba gin.

³⁷ Nyare makayo onywolo wode to cwoko nyinge ni Mowab; aka go obedo ba Jomowab ma pama.

³⁸ Nyare mathin bende onywolo wode, aka ocwoko nyinge ni Benami; go obedo ba Joamon kiri gunyo ni.