Cakirok 15 - KITAWO MALEŊ Catholic

Were timo cikirok gi Abram

¹ Rumacen ma gigipiny me, wac pa Rwoth obino ri Abram i menyirok ni, “Ikir'ilwor Abram, abedo kwot perin, kemba perin bino bedo madwoŋ.”

² To Abram odwoko ni, “Awi Rwoth Were, aŋo m'inomiyan m'angoye gi nyathi, aka Elieza ma Damasiko ama lalunjo peco paran?

³ Neni, ikimiyan nyithindho, aka ŋeca m'onywol i ot paran ama lalunjan.”

⁴ Aka neni, wac pa Rwoth obino rigo ni, “Ŋeca me Elieza ama kilalunjin; wodin won ama lalunjin.”

⁵ Rwoth otero go woko aka owaco ni, “Ŋiy pondeponde, aka kwan micalin, k'inyalo kwano jo; ameno apaka nyikwayin jolabedo.”

⁶ Abram oyeyo gima Rwoth owaco, aka ro gime Rwoth oyeyo go paka ŋat'otire.

⁷ Kenyo Rwoth owaco rigo ni, “An abedo Rwoth m'otelin wok Ur i Babilon, bino miyin lowo me paka aperin.”

⁸ To Abram openjo ni, “Awi Rwoth Were, anoŋey nedi ni bino bedo aparan?”

⁹ Rwoth odwoko ni, “Keli ran rwath dhiaŋ ma jaoro adek, diel, gi rombo, joje ma jo oro adek, kodi akuru gi njiwa.”

¹⁰ Aka Abram okelo ogwaŋe mere to ŋado i diere, aka oketho kisi adec to ŋiyo nyawote; to winyin mere go k'oŋado.

¹¹ Acut jobino kwoŋ delkwoŋ jo, to Abram oriemo woko jo.

¹² Munyo waŋceŋ opodho, Abram olimo nindo mapek, aka neni, obedo gi lworo kodi bwok kwoŋe.

¹³ Kenyo Rwoth owaco rigo ni, “Ŋey adieri nike nyikwayin jobino bedo i lowo pa jopath i lowo ma k'obedo apajo, aka jobino bedo ŋecin t'itero jo gi gwayo ma oro 400.

¹⁴ T'abino thumo banja ri piny ma jolatic rigo, aka rumacen jobino wok gi lim madwoŋ.

¹⁵ To ri in mere, ibino tho i oro m'otegino, i siem t'iyikin.

¹⁶ Aka jobino dwoko ka i luse mar'aŋwen; rupiri Joamor fodi jok'otimo kidakana ma joripo limo gir'acula.”

¹⁷ Munyo waŋceŋ otieko podho, aka piny oyido col, neni, dak manitie mac ma yiro wok'iye kodi cuk mac oluwo i dier mumin mar'ogwaŋe.

¹⁸ I ndelo no Rwoth otimo cikirok gi Abram ka waco ama: Ri nyikwayin abino miyo lowo me, wok i malawa ma Misir tundo i malawa madwoŋ, Yufrete,

¹⁹ lowo pa Jokena, Jokeniz, Jokadimon,

²⁰ Johiti, Joperiz, Jorefayim,

²¹ Joamor, Jokanan, Jogirigas, kodi Joyebus.