Cakirok 1 - KITAWO MALEŊ Catholic

Cwec ma polo gi piny

¹ I cakirok Were ocweyo polo gi piny.

² Piny oyido ongoye gi cal aka oyido nitie nono. Mudho oyido oumo wakawaka madongo, aka Cuny pa Were oyido waya wi pi.

³ Kenyo Were owodho or ni, “Weyi kenyo wobedi lero.” Aka lero omenyere.

⁴ Aka Were oneno ni lero ber, ameno opoko lero kwoŋ mudho.

⁵ Were olwoŋo lero ni odieceŋ, aka mudho ni wor. Piny oyutho to piny yawere; meno obedo ndelo marapena.

⁶ Were owaco ni, “Weyi thwolo wobedi i dier pi wopok kadirio.” Aka obedo ameno.

⁷ Ameno Were ocweyo thwolo m'opoko pi ma pendi lowo gi pi ma wiye.

⁸ Were olwoŋo thwolo no ni pondeponde. Piny oyutho to piny yawere; meno obedo ndelo mar'ario.

⁹ Kenyo Were owaco ni, “Weyi pi ma pendi polo wocokere kanyacel i kabedo acel, aka lowo m'othwo wonen.” Aka obedo ameno.

¹⁰ Were olwoŋo lowo m'othwo ni piny, aka pi m'ocokere kanyacel ni nam. Were oneno ni oyido ber.

¹¹ Were owaco ni, “Weyi piny wonywol dudi, ma nyak nyinge gi ma nyak olemo.” Aka obedo ameno.

¹² Piny onywolo dudi nger gi nger, aka Were oneno ni oyido ber.

¹³ Piny oyutho to piny yawere, meno obedo ndelo mar'adek.

¹⁴ Were owaco ni, “Weyi talin wobedi i pondeponde ma poko odieceŋ gi wor; aka weyi jowobedi ma nyutho ndir, ndelo gi oro.

¹⁵ Weyi jowoliel i pondeponde ma miyo piny lero.” Aka obedo ameno.

¹⁶ Ameno Were ocweyo talin ario madongo. Madwoŋ mere dhumo odieceŋ, aka mathin mere dhumo wor; go ocweyo micalin bende.

¹⁷ Aka Were oketho jo i pondeponde miyo piny lero,

¹⁸ dhumo odieceŋ gi wor, gi poko lero kwoŋ mudho. Aka Were oneno ni oyido ber.

¹⁹ Piny oyutho to piny yawere, meno obedo ndelo mar'aŋwen.

²⁰ Were owaco ni, “Weyi pi wonywol cwec ma nigi kwo, aka weyi koyo wopoŋ gi winyin.”

²¹ Ameno Were ocweyo rec madongo i nam kodi kisi cwec makwo ma bedo i pi, kodi kisi nger winyo. Aka Were oneno nike oyido ber.

²² Were omiyo jo silwany aka owaco ri kisi cwec ma bedo i pi nike wonywol wopoŋ i nam; to waco ri winyin nike jowomedere i welo.

²³ Piny oyutho to piny yawere, meno obedo ndelo mar'abic.

²⁴ Were owaco ni, “Weyi piny wonywol kisi nger ogwaŋ manitie gi kwo: Ma bedo peco, madudi, madongo kodi mathindho.” Aka obedo ameno.

²⁵ Were ocweyo joje, aka oneno nike oyido ber.

²⁶ Kenyo Were owaco ni, “Aka onyo pama walacweyo ji i cal mawan, aka jowocale wan; aka weyi jowodhum rec ma nam, winyin ma koyo kodi ogwaŋe ma peco kodi madudi.”

²⁷ Ameno Were ocweyo ji i cal pere; ocweyo jo ma cwo kodi ma mon.

²⁸ Aka Were omiyo jo silwany to waco ni, “Nywol win nyithindho kweth, ŋey nyikway win jowobedi i piny gibe to jodhumo. Dhum win rec ma nam, winyin ma malo kodi kisi cwec makwo ma wotho i piny.

²⁹ Amiyo win dudi manywolo nyinge kodi manywolo olemo paka cemo.

³⁰ To ri ogwaŋe kodi winyin, amiyo lum kodi boke dudi paka cemo.” Aka obedo ameno.

³¹ Were oneno kisi gima go oyido ocweyo, aka neni, oyido ber swa. Piny oyutho to piny yawere. Meno obedo ndelo mar'aucel.