Amos 9 - KITAWO MALEŊ Catholic

Thumo banja pa Rwoth

¹ Aneno Rwoth munyo ocungo dho migam, aka owaco ama: Goy win sirin ma Ot pa Were matek, ŋey kindi ot woyengere, aka wotur wopodhi wi ji. Jom'odoŋ abino neko jo i lweny. Ongoye ŋata bino ringo, aka ongoye ŋata bino kwalok.

² Makada nende jokuny piny, to jodonjo i piny pa jom'otho, abino mako jo. Makada nende joidhi malo i polo, abino dwoko jo piny.

³ Makada nende jopondi wi got Kamel, abino dwaro jo t'amako jo. Makada nende jopondi ruwaŋan i pendi nam, abino wodho or to thwol kayo jo.

⁴ Ka jokwor pajo jokadhi gi jo paka jowiloka, abino wodho or t'ineko jo. Abino ketho waŋan kwoŋ jo ri raco makiweno bero.

⁵ Rwoth, Were pa lwak jolweny, ma mako piny to kirin, to ji ma jobed'iye je joywak aka piny gibe ay to doko podho, pa malawa Nayil ma Misir.

⁶ Rwoth geto peco pere i polo aka umo piny gi pondeponde. Go lwoŋo pi ma nam aka konjo woko i lowo. Rwoth meno nyingi go.

⁷ Rwoth waco ama: Ji ma Isiraili, wicale ran Joethopiya. Awodho win wok i piny Misir, paka awodho Jofilistia wok Kirete, kodi Josiria wok Kiri.

⁸ Neni, waŋ Rwoth Were nitie kwoŋ ker mareco me Isiraili, abino reyo woko wok i piny. T'akibino reyo woko nyikway Yakobo je.

⁹ Abino miyo cik t'acunga Joisiraili, paka ŋano manitie i kicungwo. Abino kicunga jo kwoŋ piny je, t'ayeko woko ji ma bukony.

¹⁰ Joreco ma jonitie i dier ji paran, ibino neko jo i lweny. Jono je ma jowaco ni, “Were kilayeyo teko wopodhi kwoŋ wan.”

Were bino dwoko Joisiraili

¹¹ I ndelo no, alatiŋo malo, ker pa Daudi m'opodho. Abino yiko kam'onyekere mere, t'ageto malo gundin mere. Abino doko geto paka oyido cango con nitie.

¹² Jobino mako gim'odoŋ i piny Edom, kodi piny je m'ilwoŋo gi nyingan, Rwoth waco, go ma timo me.

¹³ Ndelo bino, Rwoth waco, ma ŋano bino dongo piyo ma kalo ka keco, aka vini bino dongo ma kalo ka timo vini. Gote jobino thono vini mamit, aka riete jobino mol gine.

¹⁴ Abino dwoko ji paran i piny pajo, jobino geto tindin madongo pajo m'orere to jobedo kenyo, jobino pidho ndelo vini, to jomadho vini, jobino pidho ndelin, to jocamo gima jopidho.

¹⁵ Abino pidho ji paran i piny m'amiyo jo, aka doko kilafudho jo, wok i lowo m'atieko miyo jo. Rwoth Were mewin waco.