Amos 8 - KITAWO MALEŊ Catholic

Menyirok mar'adita mar'olemo

¹ Rwoth Were onyuthan menyirok man. Aneno adita mar'olemo.

² Rwoth openjan ni, “Amos, aŋo m'ineno?” Adwoko ni, “Adita mar'olemo.” Kenyo Rwoth owaco ran ama: Gike otundo kwoŋ ji paran Isiraili. Akibino doko wiro paro kwoŋ miyo jo gir'acula.

³ I ndelo no, wer ma peco pa kere, bino lokirok ywak ajore. Delkwoŋ ji m'otho bino more kisi kamoro; aka ibino bolo jo woko liŋ, Rwoth Were waco.

Rerok pa Isiraili

⁴ Winji win gime, win ma winyono joma bu gimoro, aka wireyo woko jocandi ma piny.

⁵ Wiwaco ama; dwe manyen orum keraŋo, ŋey watana ŋano? Sabato orum keraŋo, ŋey doko wacak kitana ŋano? Nyaka ŋey waor latir ma k'otire, aka wakithin gi telin ma kipima ma kwalo joma nyewo.

⁶ Wanyal kitana ŋano ma bukony i welo ma malo. Wabino nwaŋo jacandi ma kinyal culo banja pere, kosa culo welo pa ŋato to wanyewo go paka ŋeca.

⁷ Rwoth Were pa Isiraili otieko kwoŋere ama: Wiyan k'owil gi tim pajo marac.

⁸ Piny bino kirin ro gime, to kisi nyatoro je ma bedo i piny bino ywak. Piny gibe layengere, bino ay to doko podho paka malawa Nayil.

⁹ I ndelo no, Rwoth Were waco, abino miyo ceŋ podho sawa aucel, to yutho odieceŋ par.

¹⁰ Abino loko kalima mewin kaliel, kodi wer mewin ywak ajore. Abino kelo pata wiwin to wiruko kutiya. Wibino cale jonywol, ma joywako nyaka wod gin acel. Ndelo no bino bedo magway kiri i gike.

¹¹ Rwoth Were waco ama: Neni, ndelo bino m'abino dhiro kec i piny; ki kec ma mugat, kosa riyo ma pi, to ma winjo wac pa Rwoth.

¹² Ji jobino kilera wok i nam tundo i nam, wok yumalo tundo yuwok ceŋ. Jobino dwaro wac pa Rwoth kisi kamoro, to jokibino nwaŋo.

¹³ I ndelo no yac gi nyir ma fodi jothindho, jobino fodirok piny ro riyo.

¹⁴ Joma jokwoŋere gi Asima cal ma Samaria, aka jowaco ni, “Paka i kwo were ma Dan.” Kosa ma jokwoŋere gi were ma Berseba, jobino podho aka doko jok'oay.