Amos 5 - KITAWO MALEŊ Catholic

Lwoŋo ma ŋuto

¹ Winji win wac m'aketho kwoŋ win iywak ajore, Joisiraili.

² Opodho, ma doko k'oay, Isiraili ma cale nyako mambula. Onindo m'ojwangere piny aka ongoye ŋat'okony go ay malo.

³ Me apaka Rwoth Were waco: Tindi madwoŋ i Isiraili oro woko jolweny gana acel, to miya acel kende ama jodwoko, tindi madwoŋ man oro woko miya acel, apar kende ama jodwoko.

⁴ Me apaka Rwoth waco ri Joisiraili: Rangan win ŋey wibedi gi kwo.

⁵ Wikiri wirangan i Bethel, aka wikiri widonji Gilgal, kosa wikiri wiŋadi to wikidho Berseba lamo. Rupiri ji ma Gilgal jobino bedo jowiloka, aka Bethel kilabedo gimoro.

⁶ Rangi win Rwoth ŋey wibedi gi kwo. Ka wikirango go, go bino tur kwoŋ Joisiraili pa mac. Mac bino kisika woko ji ma Bethel, m'ongoye ŋata bino nyalo neko woko.

⁷ Win ma wiloko tiro yath makec, to wiumo gim'otire.

⁸ Rwoth am'ocweyo micalin ma ndir ma ŋico gi ndir ma lietho. Go loko mudho lero m'odieceŋ aka loko odieceŋ wor. Go lwoŋo pi ma nam aka konjo woko i lowo. Rwoth, meno nyingi go.

⁹ Go kelo rerok kwoŋ jomeni gi kapondo pajo.

¹⁰ Widak ŋata kwero gima k'otire, aka luwo adieri i kapido.

¹¹ Widiyo jocandi, aka winyaga ŋano pajo. Riameno wikibino nindo i udi mewin m'ogeti gi telin mafoth, kosa madho vini wok i ndelo vini mewin ma wi pidho.

¹² Aŋeyo reco mewin je gi dwoŋo mere. Wicando ji maber, aka wiyeyo cami nyew, to wikwero jocandi limo tiro wok i kapido.

¹³ Riameno ŋata luwo adieri bino liŋ, i hongo paka ama rupiri obedo hongo ma raco.

¹⁴ Rangi win bero, makiweno raco, ŋey wibedi gi kwo. Nyaka Rwoth Were pa lwak jolweny, bino bedo gi win paka wiwaco ni go nitie gi win.

¹⁵ Kwer win raco, aka wimar bero, aka neni win ni tiro nitie i kapido. Kono miti Rwoth, Were pa lwak jolweny, bino mako wor gi ji ma piny me ma fodi jodoŋ makwo.

¹⁶ Riameno me apaka Rwoth, Were pa lwak jolweny waco: Bino bedo ywak gi kumo i yo ma tindi madwoŋ. Kiri jofur je ibino lwoŋo jo ywako jom'otho, kanyacel gi ji m'iculo jo ma ywak.

¹⁷ Bino bedo ywak i ndelin ma vini, rupiri abino miyo win gir'acula. Rwoth waco.

¹⁸ Kidamba riwin ma wikuro ndelo pa Rwoth. Raŋo ma wikuro ndelo pa Rwoth? Riwin bino bedo ndelo ma mudho makiweno lero.

¹⁹ Bino cale ŋata ringo kwoŋ simbwor to romo g'arara! Kosa ŋat'okidho i ot pere to theno cinge i kor ot to thwol toŋo go.

²⁰ Ndelo pa Rwoth bino bedo mudho makiweno lero; bino bedo ndelo ma colo m'ongoye lero.

²¹ Adaki kendo acayo kalimin mewin, akisangala gi cokirok mewin maleŋ.

²² Makada nende wimiyan mic mewin awaŋa kodi olemo, akibino jolo; mic mewin ma siem mar'ogwaŋe mewin macwe, akibino jolo.

²³ Kwany win kwoŋan wer mewin ma koko no; akimiti winjo dwondi tongol mewin.

²⁴ Kwanyowoko weyi win tiro womol paka pi, aka gim'otire womol paka waŋ pi ma kicwiy.

²⁵ Ji ma Isiraili, akikwayo win cowirok, kosa mic i oro piero aŋwen ma telo win i thim.

²⁶ T'onyo pama, rupiri wilamo cal pa Sakuth kere mewin, kodi Kayiwan, were mewin ma micala, ma witimo no.

²⁷ Riameno abino tero win bedo jowiloka i piny kalo Damasiko, Rwoth ma nyinge obedo Were pa lwak jolweny waco.