Amos 2 - KITAWO MALEŊ Catholic

Mowab

¹ Me apaka Rwoth waco: Ji ma Mowab jomedere timo reco kendo, aka ro gime akibino wiro gir'acula pajo, rupiri jowaŋo to joloko buru cokin ma delkwoŋ kere ma Edom.

² Ameno abino dhiro mac kwoŋ Mowab, aka bino reyo kapondo ma Kerioth, Mowab bino tho i dier kihola, i dier koko gi derino ma gwara.

³ Abino neko woko jadhum ma Mowab gi jotel je. Rwoth waco.

Yuda

⁴ Me apaka Rwoth waco: Ji ma Yuda jomedere timo reco kendo, aka ro gime, akibino wiro gir'acula pajo, rupiri jokwero cik pa Rwoth, aka jok'oluwo or pere. To twodo pajo omiyo jo rwenyo, ka jolamo werin makicar paka kwarere pajo.

⁵ Ameno abino dhiro mac kwoŋ Yuda, aka bino reyo kapondo ma Yerusalem.

Thumo banja pa Were kwoŋ Isiraili

⁶ Me apaka Rwoth waco: Ji ma Isiraili jomedere timo reco kendo, aka ro gime akibino wiro gir'acula pajo, rupiri jotana jom'otire ri feza, kodi jocandi ri war.

⁷ Jonyono wi jom'oloc gi joma bu gimoro i fukefuke ma lowo, aka jowiro yo pa jocandi. Nyathi gi bamere jonindo gi ŋeca madhako acel, to jokelo wickwot ri nyingan maleŋ.

⁸ Jonindo cegin gi migam i nangin ma jocandi josinga rijo ma banja. I Ot pa Were pajo, ama jomadh'iye vini, ma jonyewo gi pesa ma jonyaga kwoŋ ji.

⁹ To kucel areyo woko Joamor ruwaŋ jo, m'oyido jobor pa yath m'ilwoŋo ni sida aka jotek p'olwa; anyeko woko olemo gi fuc mere piny.

¹⁰ Awodho win wok i piny Misir aka atelo win ma oro piero aŋwen i thim, t'amiyo win lowo pa Joamor.

¹¹ Atiŋo malo wot win megi bedo jotuci wac Were, aka megi bedo Jonazir. K'obedo ameno, Joisiraili! Rwoth waco.

¹² To wimiyo Jonazir madho vini, aka wiwaco jotuci wac Were cik ni jokiri jowotuci wac Were.

¹³ Neni, abino ŋinyo win piny, paka magal m'otwey'iye ŋano midho piny.

¹⁴ Ŋwec bino dhiero kiri jomayil yil, aka jomatek jokibino doŋ gi meni pajo, kosa jomatek jokibino botho kwo pajo wegi.

¹⁵ Kiri cwo ma jor'aserin je jok'onyal cungo, aka ŋata tiende yilyil kilabotho kwo pere, kosa ŋata gweyo kayina kilabotho kwo pere.

¹⁶ I ndelo no jomaker kwoŋ jomatek jobino ŋwec kinyoro. Rwoth waco.