Agecin 7 - KITAWO MALEŊ Catholic

Awanya marac ma cot

¹ Nyathi paran, kuri wac paran, aka ter or paran paka gimadwoŋ.

² Kuri or paran aka ilakwo, kuri fonji paran paka ikuro nyangil waŋin.

³ Tweyi i lwet cingin, kethi i pal cunyin.

⁴ Wac ri rieko ni, “Ibedo nyamin an.” Lwoŋ niaŋ ni mere perin ma kacunyin.

⁵ Jobino kurin kwoŋ mon ma joweco, kwoŋ mon ma jodwoŋo jo gi wac.

⁶ Ndelo moro oyido aŋiyo g'idirisa ma ot paran, aŋiyo g'ihoŋ miango,

⁷ t'aneno i dier jomamiŋ, aneno i dier soye, jayac moro mamiŋ.

⁸ Go oyido wotho i royo cegin gi royo ma rwayo, kidho i ot pa dhako moro,

⁹ kareno waŋceŋ opodho, othieno, wor aka i mudho.

¹⁰ Kenyo dhako moro obino romo gine, orukere paka malaya, kareno oyikere dwoŋo jayac no.

¹¹ Go obedo jamaker aka bu wickwot, dhako ma jakilera.

¹² Sawa je inwaŋo go i royo kosa kam'othangere, aka bedo kareno ciko dhano i royo.

¹³ Dheno opodho kwoŋ jayac no to cwiyo dhoke, oneno waŋe tirtir to waco rigo ni,

¹⁴ “Ajok amiyo cowirok ma siem, aka konon atieko culo cikirok paran.

¹⁵ Riameno awok woko romo kodin, adwarin awaŋ g'awaŋ, aka atieko nwaŋin!

¹⁶ Atieko pedho kitanda paran, gi nanga makicin m'otimi i Misir.

¹⁷ Atieko kudho kanindo paran gi mo maŋwe kur, mo ma yath maŋwe kur, gi sinamon.

¹⁸ Biye, weyi waweci tundo odikin; weyi wayodere gi mar.

¹⁹ Kole cworan ongoye peco, go okadho bor swa.

²⁰ Okadho gi pesa kweth, go k'odwoki peco tundo i dier dwe.

²¹ Gi luwo mar'adwoŋa dheno odwoŋo go, gi luwo pere mafoth dheno oromo go.

²² Jayac no oluwo go abwap, paka merikwa m'ikidho thumo, paka ogwaŋ ma redo i bwo,

²³ cuka asere cwowo gigipiny ma iye. Go cal winyo ma rure i bwo, kiŋey ni latho.

²⁴ Riameno nyithindho paran, winjan win, aka ciki ithi win ri wac ma wok i dhokan.

²⁵ Cunyin wokiri woluwi yo pa nger dheno, ikir'ilera rango go.

²⁶ Go otieko neko cwo kweth, cwo ma kikwanere.

²⁷ Ot pere obedo royo ma kidho i piny pa jom'otho, ma rwako jo i bur.”