Agecin 6 - KITAWO MALEŊ Catholic

Gwokirok man

¹ Nyathi paran, k'itieko cungo ri banja pa nyawotin, k'itieko ciko konyo japath,

² itieko podho i bwo gi luwo ma dhokin, imoko gi wac m'owok i dhokin.

³ Ameno tim gime, nyathi paran, aka ibothi kwo perin. Kole ameno itieko podho i cingi nyawotin, kadhi imwole, aka iywakere rigo.

⁴ Nindo wokiri womaki waŋin, aka ikir'inur.

⁵ Bothi kwo perin paka amudhe botho kwo pere wok i cingi jadwar, paka winyo budhere wok i cingi jaciko.

⁶ Kidhi win i riete ŋwen, win jonyapo, neni win paka okoko jotiyo, aka wilokere mariek.

⁷ Jongoye kada gi jatel, jamituka kosa jadhum,

⁸ to joyiko cemo i ndir ma ceŋ, ka joyikere ri ndir ma cwir.

⁹ Wilanindo kiri keraŋo, awi jomamiŋ? Wilacew keraŋo wok i nindo mewin?

¹⁰ Go waco ni, “Alanindo nyaka mathin, aladolo cingan ywomirok nyaka mathin.”

¹¹ To ka go nindo, candi lamonjo go, paka jakwo ma royo, paka jacwo m'otiŋo gilweny.

¹² Dhano ma bukony gi jakidakana ŋweyo piny gi luwo twodo.

¹³ Go mbieto waŋe, ka como tiende i lowo, ka cimere gi cinge.

¹⁴ Go cano raco gi cunye marac, aka cwoyo tiakirok noknok.

¹⁵ Riameno, teko lapodho kwoŋe abwap, aka go larere abwap to rwenyo.

¹⁶ Nitie gigipiny aucel ma Rwoth odak. Abirio jobedo amien rigo.

¹⁷ Delok, lew jo ma twodo, cingi jo ma neko joma bubanja,

¹⁸ adundo ma timo can ma kidakana, par tiendi jo ma kwakere timo gimarac,

¹⁹ jakony ma luwo twodo, kodi ŋata cwoyo tiakirok i dier wutmere.

Gwokirok kwoŋ timo cot

²⁰ Nyathi paran, kuri or pa benin, aka ikir'ijwangi fonji pa yokin.

²¹ Tweyi jo iy'adundo perin noknok; tweyi jo i ŋutin.

²² K'iwotho, jolatelin, k'iriere piny, jolakurin, aka k'icew, jolaluwo kodin.

²³ Kole or obedo tala aka fonji obedo lero, aka tiro kula obedo yo ma kwo.

²⁴ Nyalo kurin kwoŋ dhako marac, kwoŋ adwoŋa pa dhako ma jacot.

²⁵ Ikir'igomba ŋono pere i cunyin, aka ikir'iwey go wodwoŋin gi biendi waŋe.

²⁶ Jacwo nyalo nyewo malaya gi nyaka mugat acel won, to cot nyalo kadho gi kisi gimoro je ma go nitie gine.

²⁷ Inyalo tiŋo mac i korin, ma k'owaŋo nangin perin?

²⁸ Kosa dhano nyalo woth i mac m'okur, ma k'owaŋo tiende?

²⁹ Ameno apaka ŋata nindo gi cipa nyawote nitie, ongoye ŋat'ogey nger dheno ma kilamiyo gir'acula.

³⁰ Ji jokicay jakwo k'okwalo cemo, ka kec neko.

³¹ Kucel k'omaki, culo dibirio loyo, lakeŋ kisi gimoro je ma ot pere.

³² To ŋata timo cot ongoye gi rieko, ŋata timo gino reyo woko kwo pere.

³³ Go lanwaŋo adhola giwickwot, aka wickwot pere k'orumi.

³⁴ Kole nyeko miyo jacwo bedo mager, aka go kilanyutho wor ka culo kwor.

³⁵ Go k'oyey cul moro je, kosa yeyo nyew makada nende bedi madwoŋ nedi.