Agecin 31 - KITAWO MALEŊ Catholic

Fonji pa yok kere Lemuel

¹ Me wac pa Kere Lemuel kwoŋ bieto ma yokimere ofonjo go.

² Aŋo wodan, aŋo wodan m'anywolo! Aŋo wodan ma cikirok paran!

³ Ikir'ikethi meni perin mito mon, kosa yo pa mon ma reyo woko kerin.

⁴ Kiripi ri kerin, awi Lemuel, kiripi ri kerin madho vini, gi ri jodhum madho medho matek.

⁵ Ka jomedho, wicwil lamako jo gi cik m'oketh, aka jokilathielo ji ma bu gimoro.

⁶ Miy dhano macegin tho medho matek, gi vini ri ŋata nitie i litho ma rem,

⁷ weyi jowomadhi, aka wiy jo wowil gi candi pajo, aka jokiri jowopoy teko pajo.

⁸ Yaw dhokin iluwi ri jono ma wegi jokinyal luwo, gwok jono ma wegi jokinyal.

⁹ Luw, aka luw gim'otire, osa ri jocandi gi ri ji ma bu gimoro.

Dhako ma janyalo

¹⁰ Ŋa manyalo nwaŋo dhako ma janyalo? Go diwelo loyo thiwino.

¹¹ Cuny cwore geno go, aka cwore kilabedo ma bu gimoro.

¹² Go timo ri cwore bero makiweno raco, i kwo pere je.

¹³ Go rango yer rombo gi nanga mafoth, aka timo tic gi cinge gi mar.

¹⁴ Go cal paka mel pa jomitan, go omo cemo pere wok bor.

¹⁵ Go ay malo worwor, aka miyo peco pere cemo, to poko ŋecin pere ma mon tic.

¹⁶ Go rango lowo to nyewo, aka gi pesa ma go olimo pidho ndelo vini.

¹⁷ Go timo tic gi meni, aka obedo dhako ma cinge tek.

¹⁸ Go niaŋ ni gima go timo nitie cwe, aka tala pere kitho wor.

¹⁹ Go won wiyo uzi pere, aka won kwoyo nanga pere.

²⁰ Go poko gigipiny ri jocandi, gi ri ji ma bu gimoro.

²¹ Go kirembi ri peco pere i ndir ma cwir, kwoŋbedo joje joruko nanga mapek.

²² Go won kwoyo sukin pere, aka nangin pere itimo gi nanga mafoth manyarangi ariŋo.

²³ Cwore oŋeyere i dier ji ma tindi madwoŋ, aka go bedo acel kwoŋ jodongo ma lowo.

²⁴ Go kwoyo nangin mafoth aka tana jo, aka go tana dende ri jomitan.

²⁵ Go obedo dhako matek, aka iworo go, go kibwoki ri kwo ma yuwaŋe.

²⁶ Go luwo wac ma rieko, aka fonjo wor.

²⁷ Go kuro peco pere, aka kicam cemo ma nyapo.

²⁸ Nyithindho pere jolwoŋo go jasilwany, kanyacel gi cwore ma pako go.

²⁹ Cwore waco ni, “Mon kweth jotimo maber, t'iloyo joje.”

³⁰ Yath ger obedo twodo, aka ŋono rumo, to dhako ma lworo Rwoth ripo wopak.

³¹ Foy go ri gima go timo, aka weyi tic pere womiy go dwoŋ i tindi.