Agecin 29 - KITAWO MALEŊ Catholic

¹ Ŋat'ipusa, kucel medo wictek, larere abwap ma kilaneno kendo.

² Ka ŋata timo gim'otire dhumo, ji josangala, to ka jakidakana dhumo, ji joywak.

³ Nyathi m'omaro rieko sangala janywol, to timo mere gi malayin obedo nyeko lim.

⁴ Kere kelo siem i piny gi rieko, to ŋata mito camo nyew larere woko.

⁵ Ŋata nyoma jager, meno yaro bwo ri tiendi jager.

⁶ Jareco moko i reco pere won, to ŋata timo gim'otire wero to sangala.

⁷ Ŋata timo gim'otire oŋeyo gima ripo gi jocandi, to jokidakana jongoye gi nger niaŋ no.

⁸ Ji ma joŋalok jonyalo waŋo tindi madwoŋ gibe, to ŋatariek waro woko nge.

⁹ Ka jarieko osere gi jamiŋo, bed'iye nyero, koko gi yet.

¹⁰ Ji ma jonek jodak ŋat'ongoye g'apuse, aka jodwaro kwo pa jom'otire.

¹¹ Jamiŋo nyutho nge pere kamaler, to ŋatariek dhumo nge.

¹² Ka jadhum winjo wac twodo, jotel pere je jolabedo jokidakana.

¹³ Jacandi gi jodic jorom ama, Rwoth miyo waŋ joje lero.

¹⁴ Ka kere thumo banja ri jocandi ma kitim nyakucel, ker pere labedo cil gi cil.

¹⁵ Gir'acula gi tiro nyathi kelo rieko, to nyathi ma jalithirok kelo wickwot ri yokimere.

¹⁶ Ka jakidakana dhumo, reco medere, to jom'otire jolabedo makwo neno podho pa nger jono.

¹⁷ Miy nyathi gir'acula, aka kilamiyin rembo, lamiyo cunyin wosangala.

¹⁸ Kama menyirok ongoye i iye, ji jorwenyo yo, to josilwany a jono ma jokuro cik pa Were.

¹⁹ Wac kende kitir ŋecin, makada nende joniaŋ, jokilawinjo.

²⁰ Ŋata kwakere gi luwo, kiri jamiŋo je nitie gi geno loyo go.

²¹ Ŋata miyo ŋeca pere kisi gimoro wok i thino, i gike mere ŋeca no labedo rigo teko.

²² Ŋata mako nge jadhaw kicar, aka timo reco kweth.

²³ Noro pa dhano kelo podho pere, to ŋata mwol lalimo dwoŋ.

²⁴ Bedo mere gi jakwo obedo dak kwo perin won, kwoŋbedo ikinyal luwo adieri ro kwoŋirok m'itimo.

²⁵ Lworo dhano obedo ciko bwo, to ŋata geno Rwoth bedo maber.

²⁶ Ji kweth jodwaro wor wok bongi jadhum, to Rwoth ama miyo tiro.

²⁷ Jokidakana jobedo amien ri jom'otire, aka jom'otire jobedo amien ri jokidakana.