Agecin 23 - KITAWO MALEŊ Catholic

¹ K'ibedo piny cemo gi jadhum, kaŋasa maber gima nitie ruwaŋin.

² K'initie gi woro mathoth, diy dwondin.

³ Ikir'iwanya cemo pa jadhum, nyalo bedo ni go temin.

⁴ Ikir'iol gi temo dwaro ŋaŋo, bedi mariek kwero.

⁵ Ilabwok kareno orere woko, ka won oay gi bwombe abwap, paka ango yupolo.

⁶ Ikir'icam cemo pa jogwondo, kosa iwanya cemo pajo.

⁷ Kole jocale yer i lokoro, jowaco rin ni, “Cemi aka imedhi!” To jokinyuthi gima jowaco.

⁸ Ilaŋoko gim'oyido itieko camo, aka ilanyeko kisangala perin.

⁹ Ikir'iluw ka jamiŋo winjo, go lacayo rieko ma wac perin.

¹⁰ Ikir'ikodi kew macon, kosa iroc i lowo pa nyithindho kic.

¹¹ Kole jaboth pajo tek, go lakiosa rijo kwoŋin.

¹² Kethi paro perin i gim'ifonjin, aka ciki ithin ri wac ma rieko.

¹³ Ikir'igal gi miyo nyithindho perin gir'acula, k'icwado jo gi luth, jokilatho,

¹⁴ K'icwado jo gi luth, ilabotho kwo pajo kwoŋ piny pa jom'otho.

¹⁵ Nyathi paran, ka cunyin riek, cunyan bende lakisangala.

¹⁶ Adundo paran lasiemere, k'iluwo gim'otire.

¹⁷ Ikir'iyey cunyin womaki nyeko gi joreco, to medere lworo Rwoth.

¹⁸ Adieri kwo ma yuwaŋe nitie, aka geno perin kilarumo.

¹⁹ Winji, nyathi paran, aka ibedi mariek, ŋey ipar kwoŋ yo perin.

²⁰ Ikir'ibedi i dier jomedho, kosa i dier joworo ma jocamo riŋo.

²¹ Kole jomero gi joworo joladoŋ jocandi, aka nindo lamiyo jowocaki ruko okuto.

²² Winji benin m'onywolin, aka ikir'icay yokin ka go oti.

²³ Nyew adieri, t'ikir'itana, nyew rieko, fonji kodi niaŋ.

²⁴ Ba joma jotimo gim'otire jolakisangala swa, ŋata nywolo wode mariek lakisangala gi go.

²⁵ Weyi benin gi yokin jowosangala, weyi ŋata nywolin wosiemere.

²⁶ Nyathi paran, miyan cunyin, aka luw yo paran.

²⁷ Kole malaya obedo bur maluth, aka dhako ma timo cot obedo jwom madiny.

²⁸ Go kiyo ji paka jakwo, aka medo miyo ji kweth ngoye g'adieri.

²⁹ Ŋa, manitie gi kidamba kodi rem? Ŋa manitie gi dhaw, aka ŋa ma geŋisa? Ŋa m'olimo adhola nono, aka ŋa ma waŋe obokere?

³⁰ Jono ma jogalo i medho, jono ma jomedo temo ruwo math m'opokere.

³¹ Ikir'inen vini k'obokere, ka walo i kikopo, aka pie mothmoth.

³² Rumacen kaco paka thwol, aka ŋulo kwir paka malasaŋ.

³³ Waŋin laneno gigipiny kicar, aka ilaparo t'iluwo gima kiniaŋere.

³⁴ Ilacale ŋata tadere i dier nam, paka ŋat'onindo malo wi kisul mel.

³⁵ Ilawaco ni, “Jogoyan, t'akilimo litho, akiwinjo kada litho. Alacew sawa adi? Aripo medho kendo.”