Agecin 14 - KITAWO MALEŊ Catholic

¹ Dhako mariek geto peco pere, to dhako mamiŋ reyo woko gi cinge.

² Jono ma jotimo gim'otire jolworo Rwoth, to ŋata tim pere rac cayo go.

³ Luwo pa jomamiŋ obedo luth ri dieŋey jo, to dhok ŋatariek kwonga go.

⁴ Kama mirikwa ongoy'iye, cemo ongoye; cemo kweth bino gi meni pa mirikwa.

⁵ Jakony ma genere kitwodi, to jakony ma jatwodo luwo twodo.

⁶ Jodelok jorango rieko to jokinwaŋ, to ŋeyo yot ri ŋata niaŋ.

⁷ Ikir'ibedi bongi jamiŋo, rupiri ongoye gima go nyalo fonjin.

⁸ Ŋatariek timo gima go oŋeyo, to miŋo pa jamiŋo wondo go.

⁹ Jomamiŋ jokirembi ka jotimo gimarac, to jomabeyo josangala gi ŋono pa Were.

¹⁰ Adundo won oŋeyo litho mere, aka ongoye jakicar ma riwere i kisangala mere.

¹¹ Ibino reyo woko peco pa jakidakana, to wema pa ŋataber bino cungo matek.

¹² Nitie royo ma cal p'otire ri dhano, to i gike mere nitie royo ma tho.

¹³ Kiri i nyero cuny jo ramo jo, to gike ma kisangala bedo ywak.

¹⁴ Joreco jolimo olemo ma yo pajo, aka jomabeyo bende jolimo olemo ma tim pajo.

¹⁵ Ŋatamiŋ yeyo kisi gimoro, to dhano mariek kaŋasa woth pere.

¹⁶ Ŋatariek gwokere to wire woko kwoŋ gimarac, to jamiŋo kidiy cunye to timo gimoro kicar.

¹⁷ Dhano ma kwako mako nge timo gimiŋo, aka dhano ma tim pere rac ji dak go.

¹⁸ Ji mamiŋ jolunjo miŋo, to jomariek iruko rijo sangaria ma ŋeyo.

¹⁹ Joreco jobino miyo jomabeyo dwoŋ, aka jokidakana jolabedo i waŋkac pa jom'otire.

²⁰ K'ibedo jacandi kiri joger perin jokimitin, to joŋaŋo jonigi merin kweth.

²¹ Jono ma jocayo wadi jo jobedo joreco, to josilwany a jono ma jomako wor gi jocandi.

²² Jono ma jotimo can marac meno kibedi gi komo? Jono ma jotimo can maber jonwaŋo wor gi genirok.

²³ I tic matek je ma dhano timo, kemba nitie i iye, to luwo kende kelo candi.

²⁴ Sangaria pa jomariek obedo ŋaŋo pajo, to jomamiŋ bende iŋeyo jo ro miŋo pajo.

²⁵ Jakony ma luwo adieri botho jomathoth, to ŋata luwo twodo meno obedo jacami sereko.

²⁶ I lworo Rwoth dhano cungo ma kiyengere, aka nyithindho pa nger ŋato jolanwaŋo kapondo.

²⁷ Lworo Rwoth obedo cakirok ma kwo, ŋey dhano wogwokere kwoŋ bwo ma tho.

²⁸ Dwoŋ pa kere obedo ji kweth ma go dhumo, to m'ongoye ji jadhum sika woko.

²⁹ Ŋata kikwakere mako nge nigi niaŋ madwoŋ, to dhano ma kwakere mako nge miyo miŋo dwoŋ.

³⁰ Cuny m'okwe miyo del bedo maber, to nyeko miyo cokin top.

³¹ Jono ma jodiyo jocandi joyeto jacwec pajo, to jono ma jomako wor gi joma bu gimoro jomiyo go dwoŋ.

³² Jokidakana ikengila jo gi tim pajo marac, to jom'otire jonwaŋo kapondo i tiro pajo.

³³ Rieko bedo iy'adundo pa ŋata nigi niaŋ, to k'iŋeyere i pal cuny jomamiŋ.

³⁴ Tiro miyo nono dongo, to reco obedo wickwot ri ji.

³⁵ Ŋeca ma timo tic gi rieko sangala kere, to keme pere nitie kwoŋ jatic meno ma timo giwickwot.