Agecin 10 - KITAWO MALEŊ Catholic

Agecin pa Solomon

¹ Me agecin pa Solomon: Nyathi mariek miyo bamere kisangala, to nyathi mamiŋ kelo ri yokimere ywak.

² Ŋaŋo m'ilimo gi kidakana kikony, to timo gim'otire botho kwo.

³ Rwoth kiyey kec woneki jom'otire, to go kwero jokidakana limo gima jomito.

⁴ Cingi jo ma bol kelo candi, to cingi jo mayil yil kelo ŋaŋo.

⁵ Ŋatariek keco cemo ka jocek, to nyathi ma nindo i hongo ma keco, obedo nyathi ma timo giwickwot.

⁶ Silwany nitie ri jomabeyo, to dhok jokidakana pano gwayo.

⁷ Poyo jom'otire obedo silwany, to nyingi jokidakana kipoy.

⁸ Jomariek jolawinjo or, to jomamiŋ jolarere.

⁹ Ongoye teko ma lamako joma timo adieri, t'ilaŋeyo tim pa jokidakana.

¹⁰ Ŋata diyo waŋe acel kelo teko, to ŋata kwero gimarac gi miseni kelo siem.

¹¹ Wac pa ŋataber obedo cakirok ma kwo, to wac pa jakidakana pano gwayo.

¹² Dakirok guro gwayo, to mari umo kibenga je.

¹³ Rieko nitie i dhok ŋata nigi niaŋ, to luth obedo ri ŋey jamiŋo.

¹⁴ Jomariek jocoko ŋeyo, to jomamiŋ ma jogoyo dhok jo jokelo rerok cegin.

¹⁵ Thoŋino pa joŋaŋo obedo cel pajo, candi pa jocandi obedo kisika pajo.

¹⁶ Kemba pa jom'otire obedo kwo, to magowa pa jakidakana obedo reco.

¹⁷ Nyatoro ma winjo fonji nitie i ger ma kwo, to ŋata kwero tiro lokere jawoth kicar.

¹⁸ Dhok jo ma twodo pano dakirok, aka jamisegey obedo jamiŋo.

¹⁹ Ka wac nitie kidhur, kibenga kingoye, to ŋata gwoko dhoke nyutho rieko.

²⁰ Wac pa ŋataber cale feza macil, to paro pa jakidakana ongoye kony.

²¹ Wac pa jom'otire pidho ji kweth, to jomamiŋ jotho ro miŋo.

²² Silwany pa Rwoth ama miyo ŋaŋo, aka go kimed'iye kumo.

²³ Timo gimarac cal gituko ri jamiŋo, to tim ma rieko obedo kisangala ri ŋata niaŋ.

²⁴ Gima jakidakana lworo layimere kwoŋe, t'ibino miyo ŋat'otire gima gomba.

²⁵ Ka koyo madwoŋ okudho, kwadho woko jokidakana, to jom'otire igeto jo cil gi cil.

²⁶ Paka gima wac bedo ri lak jo, gi yiro ri waŋ jo, ameno apaka joma nyap joŋedho cuny jodongo pajo.

²⁷ Lworo Rwoth kelo kiyindira, to oro pa jokidakana labedo macek.

²⁸ Geno pa jom'otire gike mere obedo kisangala, to geno pa jokidakana kikel gimoro.

²⁹ Yo pa Rwoth obedo kapondo ri joma timo adieri, t'obedo rerok ri joma timo kidakana.

³⁰ Jom'otire jok'oyengere cil gi cil, to jokidakana k'oyey jo bedo i piny.

³¹ Dhok jom'otire luwo rieko, to lew jobanirok ilathumo woko.

³² Dhok jom'otire ŋeyo gimaber awaca, to dhok jokidakana waco banirok ayin.