Agecin 1 - KITAWO MALEŊ Catholic

Cwe mar'agecin

¹ Me agecin pa Solomon wod pa Daudi, kere ma Isiraili.

² E agecin ma bino konyin ŋeyo rieko gi fonji, niaŋ dwoŋ wac gi gima wac no nyutho i thutho.

³ Jofonjo nger ma bedo gi rieko, nger ma bedo g'adieri, tiro gi bedo ŋataber.

⁴ Jonyalo miyo ŋata nitie gi ŋeyo bedo mariek, to jofonjo soye bedo jondijo.

⁵ Weyi jomariek bende jowowinji to jolimo cwe i fonjirok, aka joma yero bero jowolimi ndijo,

⁶ ŋey jowoniaŋ dwoŋ ageca gi gim'opanere, wac pa jomariek gi sikoiyiko pajo.

Mic rieko ri soye

⁷ Lworo Rwoth obedo cakirok ma ŋeyo; to jomamiŋ jocayo rieko gi fonji.

⁸ A nyathi paran, winji fonji pa benin, aka ikir'ikwer fonji pa yokin.

⁹ Me kwoŋbedo jobedo junga ri wiyin, gi thiwino ri ŋutin.

¹⁰ Nyathi paran, ka joreco jodwoŋin, ikir'iyey.

¹¹ Ka jowaco ni, “Luw wan, weyi warangi dhano waneki; weyi watim apondi ri ŋata bubanja,

¹² paka piny pa jom'otho weyi wamwonyi jo makwo, aka gipi, paka joma jokadho piny i bur.

¹³ Walanwaŋo ŋaŋo kweth, to wapoŋo udi mawan gi gim'onyaga.

¹⁴ Bol win kwir mewin i dier wan; wajoje walabedo gi mugowa acel.”

¹⁵ Nyathi paran, ikir'imakere gi jo, bedi bor gi jo.

¹⁶ Kole tiendi jo kwakere timo gimarac, aka joredo neki.

¹⁷ Obedo gipilok ciko bwo, ka winyo m'imito mako neno,

¹⁸ to cwo me jotimo apondi ma neko jo wegi! Jotimo apondi ri kwo pajo wegi.

¹⁹ Meno a nger gike pa jono je ma jolimo gimoro iy'akaka, aka cowo kwo pajo wegi.

Rieko lwoŋo

²⁰ Winji! Rieko lwoŋo i royo, i kabedo m'oyawere go tiŋo dwonde.

²¹ Go lwoŋo gi dwonde ma malo, i waŋkac ma tindi madwoŋ go tuco wac pere.

²² “Kiri keraŋo, awi joniaŋ macek ma wilamito bedo mamiŋ? Kiri keraŋo ma jonyero jolayodere i nyero pajo, to jomamiŋ jokwero ŋeyo?

²³ Winji win apuse paran, alakonjo kwoŋ win paro paran, t'amiyo win ŋeyo wac paran.

²⁴ Kwoŋbedo atieko lwoŋo win to wikwero, atieko yaro cingan to ngoye ŋat'owinjo.

²⁵ Wikidewo kwoŋ rieko paran je m'amiyo win, aka wikiyeyo ni atir win.

²⁶ An bende alanyero win ka winopodhi i teko; alanyero win ka lworo madwoŋ obin.

²⁷ Ka kirin obin riwin paka koyo madwoŋ, to teko mewin bino paka asur, ka litho gi kumo obino kwoŋ win.

²⁸ Nyaka wilalwoŋan, t'ak'oye; wilarangan kisi kamoro, to wik'onwaŋan.

²⁹ Kwoŋbedo widak bedo gi ŋeyo, aka wikiyero lworo Rwoth.

³⁰ Wikwero rieko paran je m'amiyo win, to wiŋisa kisi gimoro m'atemo tiro gine win.

³¹ Riameno wilacamo olemo ma tim mewin, aka tim mewin won lamiyo witwo.

³² Ji ma jongoye gi ŋeyo jotho kwoŋbedo jokwero rieko. Jomamiŋ jotho kwoŋbedo jokidew.

³³ To jono ma jowinjan jolabedo maber. Teko k'omaki jo, m'ongoye lworo raco.”