2 Timothe 2 - KITAWO MALEŊ Catholic

Jalweny pa Yesu Kristo ma genere

¹ To in, wodan, bedi gi meni kwoŋ nema manitie i Kristo Yesu.

² Ter wac m'iwinjan afonjo ruwaŋ jokony mathoth ma jowinjo, aka ikethi i cingi ji ma genere, ma bende jobino nyalo fonjo joman.

³ Ciri candirok kodi wan, paka jalweny pa Kristo Yesu ma genere.

⁴ Ongoye Jalweny ma ruwere i wac pa ji ma kisi ndelo, rupiri go mito kisangala jatel pere ma miyo go or.

⁵ Ameno bende, jaŋwec ma piem kinyal limo kemba ka bende k'oluwo cik mere.

⁶ Jafur m'otieko tiyo matek ripo limo pok marapena ma gim'okec.

⁷ Pari kwoŋ gim'awaco, aka Rwoth bino miyin ŋeyo dwoŋ gigipiny me je.

⁸ Poyi Yesu Kristo, ma Were ocerino go kwoŋ jom'otho, m'obedo nyakwar Daudi. Me a Wac Manyen Maber m'afonjo,

⁹ kendo m'acandere rigo aka onyo otweyan kiri pa ŋat'otimo kibenga madwoŋ. To wac pa Were k'otwey i lijegere.

¹⁰ Am'omiyo aciro gimoro je ri bero pa ji pa Were m'oyer, ŋey jo bende jowonyal limo both manitie i Kristo Yesu, kanyacel gi dwoŋ ma cil gi cil.

¹¹ Me obedo wac m'otire: “Ka watieko tho gine, wabende wabino kwo gine;

¹² Ka waciro candirok, wabende wabino dhumo gine; Aka ka wakwedere kwoŋe, go bende bino kwedere kwoŋ wan;

¹³ ka wakibedo jom'ogenere, go doŋ ŋat'ogenere, rupiri go kinyal won kwedirok kwoŋe.”

Jatic ma Were sangala gine

¹⁴ Bedi munyo ipoyo jo gigipiny me, aka waci rijo nyatirtir ruwaŋ Were ni kiri jowodhawere kwoŋ wac rupiri meno kikel bero moro, to nyeko ji ma jowinjo ayino.

¹⁵ Tem paka inyalo kisangala Were, paka jatic ma wiye kikwoti gi tic pere, aka fonjo m'otire wac mar'adieri mapa Were.

¹⁶ Eye i piem ma Were ongoy'iye, rupiri meno bino miyo ji jomedere kwero lworo Were.

¹⁷ Gima jofonjo bino bedo paka adhola m'odheth ma medo camo del. Jofonji ario me a Himenawo kodi Fileto.

¹⁸ Jome jotieko weyo adieri aka onyo jomieno yeyo pa joman munyo jowaco ni cerino pa ji otieko bedo.

¹⁹ To tiendi geto m'ocwiny ma Were otieko ketho kiyengere, aka me a wac m'ondiki kwoŋe: “Rwoth oŋeyo joma jobedo apere.” Odoko ni, “Nyatoro je m'obedo apa Rwoth ripo eye woko kwoŋ tim mareco.”

²⁰ I ot malac nwaŋere acerin kodi atewe ma nger je: Megi obedo ma zahabu gi feza, megi ma mbawo kodi lowo; megi aora i ndelo madwoŋ, to megi aora i ndelo ma kisi ndelo.

²¹ Ka moro olonyo kwo pere kwoŋ gigipiny mareco, go bino bedo acero m'ioro iy'atoŋa madwoŋ, m'oketh gicen ri Rwoth aka nigi kony rigo, rupiri oyikere woor go i tic mabeyo kendekende.

²² Am'omiyo, weyi awanya ma thino, aka lweny ri tiro, yeyo, mar, kodi siem, kanyacel gi joma kwayo Rwoth gi cuny gin m'olony.

²³ To eye kwoŋ piem ma miŋo kodi paro masisiri; at'iŋeyo nike gigipiny no kelo dhaw.

²⁴ Jatic pa Rwoth kiripi bedo jadhawirok, to ripo bedo jawor ri ji je. Ripo bende bedo manyalo fonji kendo ma diyo cunye,

²⁵ aka tiro joma piemo gine gi mwolo. Kole nyalo bedo ni Were bino miyo jo hongo ma ŋuto to joŋeyo adieri.

²⁶ Gikenyo jobino bedo mariek to joboth kwoŋ bwo pa Jwogi, m'onwaŋo omako jo aka miyo jo timo gima go mito.