2 Samwiri 23 - KITAWO MALEŊ Catholic

Wac pa Daudi macowe

¹ Me wac pa Daudi macowe: “Wac pa Daudi wod pa Yese wac pa jacwo m'otiŋ malo, ŋata Were pa Yakobo owiro gi mo jacwogi wer maŋon ri Isiraili.

² Cuny pa Rwoth luwo i an, aka wac pere ni lewan.

³ Were pa Isiraili otieko luwo, tele pa Isiraili otieko waco ran; ka nyatoro dhumo ji gi tiro, dhumo munyo lworo Were,

⁴ keko kwoŋ jo pa lero m'odikin, pa ceŋ maliel odikin ma pondeponde ongoye, pa koth ma miyo lum twi wok i lowo.

⁵ Aka ameno apaka Were bino miyo nyikwayan silwany, rupiri go otimo kodan cikirok ma cil gi cil, cikirok ma kilatur, cikirok ma kilawire. Meno a gim'amito, meno bino bedo loyo paran, aka Were bino ketho i kare.

⁶ To ji ma bu Were jocale kudhin m'obol woko ongoye ŋata nyalo mako jo gi cinge nono.

⁷ To jacwo ma mako jo ruko nyweny kodi lew toŋ, to mac rego jo woko.”

Jolweny pa Daudi ma jotek

⁸ Me a nyingi jolweny pa Daudi ma jotek. Marapena obedo Yoseb Basebeth ma wok Tacemon m'otelo ji adek lweny gi cwo 800 aka joneko joje i lweny acel.

⁹ Ŋata luwo go kwoŋ cwo adek ma jotek me oyido obedo Eliazar wod pa Dodo janono pa Aho. Ndelo acel go kodi Daudi jocayo Jofilistia m'oyido jocokere kenyo lweny, aka cwo ma Isiraili joringo.

¹⁰ To Eliazar ay malo aka oredho piny Jofilistia cuka cinge ool to cinge moko i abor; ndelo no Rwoth oloyo lweny madwoŋ swa. Munyo lweny orumo, Joisiraili jodwoko kama Eliazar oyido nitie iye, aka jogonyo gilweny kwoŋ jom'otho.

¹¹ Ŋati mar'adek kwoŋ cwo adek ma joŋeyere obedo Sama wod pa Age ma Harar. Jofilistia oyido jocokere Lehi, kam'oyido nitie ndelo ŋor. Joisiraili joringo Jofilistia,

¹² aka Sama ocungo gi tiende ario i ndelo, ogwoko, aka oneko Jofilistia; aka Rwoth oloyo lweny madwoŋ i ndelo no.

¹³ Munyo ndir ma keco cegin tundo, adek kwoŋ cwo piero adek ma jotek joloro piny i ŋungu ma Abidulam, kama Daudi oyido nitie iye, kucel kitipa pa Jofilistia oyido joketho kambi i milelo Refayim.

¹⁴ I waŋceŋ no Daudi oyido nitie kam'okanere, aka Jofilistia oyido jonitie i Bethelehem.

¹⁵ To Daudi owinjo nike mito dok peco aka owaco ni, “Bedi nyatoro moro oyido nyalo miyan pi amadha wok i waŋ pi manitie i waŋkac ma Bethelehem!”

¹⁶ Kenyo cwo adek ma joŋeyere jorire gi i kambi pa Jofilistia, jotwomo pi wok i waŋ pi ma waŋkac ma Bethelehem, aka jokelo ri Daudi. To Daudi k'onyalo madho; to konjo woko paka mic ri Rwoth,

¹⁷ aka owaco ni, “Rwoth, akinyalo madho pi me! Dinyo ocale paŋini amadho remo pa cwo me ma jojala kwo pajo!” Ameno go okwero madho. Meno a tim ma miseni pa cwo adek ma joŋeyere.

¹⁸ Abisay omin Yowab, aka wod pa Zeruya am'oyido obedo jatel pa cwo piero adek ma jotek. Go olwenyo g'abor pere kodi cwo 300 to neko jo, aka oŋeyere swa kwoŋ cwo adek.

¹⁹ Go oyido oŋeyere swa kwoŋ cwo piero adek, aka obedo jamituka pajo; to go oyido k'oŋeyere swa paka cwo adek ca.

²⁰ Benaya wod pa Yehoyada ma wok Kabizel bende oyido obedo jacwo ma jamaker; otimo gigipiny madongo kweth, to neko kiri jolweny madongo ario ma Jomowab. Ndelo moro go odonjo i bur munyo tor cwe to neko simbwor.

²¹ Go bende oneko jacwo m'ogaŋere ma Jamisir m'oyido nitie gi toŋ. Benaya omonjo go g'abiro, aka omayo Jamisir toŋ wok i cinge to neko go gine.

²² Me a tim ma miseni ma Benaya wod pa Yehoyada otimo, aka omiyo go nyinge kwoŋ cwo adek ca.

²³ Go oyido oŋeyere kwoŋ cwo piero adek, to oyido k'oŋeyere swa paka cwo adek ca. Aka Daudi oketho go paka jatel pa jokur pere.

²⁴ Asahel omin Yowab oyido obedo acel kwoŋ cwo piero adek; Elihanan wod pa Dodo ma wok Bethelehem,

²⁵ Sama ma wok Harod, Elika ma wok Harod,

²⁶ Helez ma wok Pelet, Ira wod pa Ikes ma wok Tekowa,

²⁷ Abieza ma wok Anathoth, Mebunay ma wok Husa,

²⁸ Zalmon ma wok Aho, Mari ma wok Netofa,

²⁹ Heleb wod pa Bana ma wok Netofa, Itay wod pa Ribay ma wok Gibeya i Benyamin,

³⁰ Benaya ma wok Pirathon, Hidai ma wok milelo cegin gi Gas,

³¹ Abialbon ma wok Araba, Azimaveth ma wok Baurim,

³² Eliaba ma wok Salibon, wot Yasen, Yonathan,

³³ Sama ma wok Harar, Ahiyam wod pa Sarar ma wok Harar

³⁴ Elifelet wod pa Ahasibay ma wok Maka, Eliam wod pa Ahithofel ma wok Gilo,

³⁵ Heziro ma wok Kamel, Paray ma wok Arab,

³⁶ Igal wod pa Nathan ma wok Zoba, Bani ma wok Gad,

³⁷ Zelek ma wok Amon, Naray ma wok Beroth, jago pa Yowab wod pa Zeruya,

³⁸ Ira ma wok Ithira, Gareb ma wok Ithira,

³⁹ Uriya ma wok Hiti; joje piero adek g'abirio.