2 Samwiri 22 - KITAWO MALEŊ Catholic

Wer pa Daudi ma Loyo

¹ Munyo Rwoth otieko botho Daudi wok i cingi Saulo gi jokwor pere man, Daudi owero wer me ri Rwoth.

² Rwoth a tele paran, kapondo paran, aka jaboth paran.

³ Were paran obedo tele paran, i go a kapondo paran. Kwot paran, aka meni paran ma bothi, kapondo paran, jaboth paran; ma bothan wok iy'akaka.

⁴ Alwoŋo Rwoth, aka bothan kwoŋ jokwor paran. Rwoth wopak!

⁵ Asur ma tho oswana an, asur ma rerok othokan,

⁶ adasa ma piny ma tho othokan, aka bwo ma tho ocomere kodan.

⁷ I kidamba paran alwoŋo Rwoth, alwoŋo Were paran wokonyan. I ot pere owinjo dwondan, aka ywak paran owinjere i ithe.

⁸ Kenyo piny okirin aka oyengere, kindi polo oyengere aka okirin rupiri Were oyido omako nge.

⁹ Yiro oduny wok i ywor ume, mac ma reyo owok i dhoke cuk mac m'odheth owok bonge.

¹⁰ Oyeco polo to loro piny, gi pondeponde m'opoto i par tiende.

¹¹ Ogweyo cwec manitie gi bwombe m'ilwoŋo ni kerubim, aka oay gi bwombe pa koyo.

¹² Oumere gi mudho thoko, aka pondeponde m'opoto, m'opoŋ'iye pi othoko go

¹³ wok kwoŋ lero ruwaŋe cuk mac m'odheth owok.

¹⁴ Kenyo Rwoth omor wok i polo aka dwondi Were Madwoŋ Maloyo owinjere.

¹⁵ Ocelo aserin aka okedho woko jokwor pere; gi menyin ma lithkoth omiyo jo ringo.

¹⁶ Pendi nam odoŋ kamaler, aka kindi piny oyawere munyo Rwoth obwoko jokwor pere aka ohola rijo i nge.

¹⁷ Rwoth otundo piny wok malo aka omakan, to ywayan wok i pi maluth kweth.

¹⁸ Rwoth obothan kwoŋ jokwor paran ma jotek kodi kwoŋ jono ma jodakan; kwoŋbedo oyido jotek swa loyan.

¹⁹ Jomonjan munyo oyido anitie i teko, to Rwoth ogwokan.

²⁰ Okonyan wok i raco obothan rupiri owinjo kodan maber.

²¹ Rwoth miyan kemba cungo kwoŋ tiro paran, go miyan silwany kwoŋbedo angoye gi banja.

²² Atieko kuro yo pa Rwoth, aka akiwire kwoŋ Were paran timo kidakana.

²³ Atieko luwo cik pere je, atieko luwo or pere je.

²⁴ Oyido angoye g'apuse ruwaŋ go, aka angoye gi komo.

²⁵ Riameno Rwoth omiyan kemba cungo kwoŋ tiro paran, kole oŋeyo nike alony ruwaŋe.

²⁶ A Rwoth, itimo adieri ri joma timo rin adieri, aka ikipusa ji ma jongoye g'apuse.

²⁷ Inyutho cilo ri ji ma cuny gin cil, t'igeri ri jokidakana.

²⁸ Ibotho ji mamwol, aka imwolo jonoro.

²⁹ In Rwoth, ibedo tala paran, aka iloko mudho paran lero.

³⁰ Imiyan meni ma monjo jokwor paran gi dwoŋ maloyo kwot pajo.

³¹ Were me, tim pere otire, cikirok pa Rwoth tundo i kare, Go cale kwot, ri ji je ma jopondo i go.

³² Rwoth kende a Were Were kende a tele mawan.

³³ Were me obedo kapondo paran matek aka kwonga yo paran.

³⁴ Otimo tiendan m'ocwiny pa tiendi kol, aka kethan gi geno wi gote.

³⁵ Go thedho cingan ri lweny, ŋey anyal oro kwot asere m'otimi gi ywel.

³⁶ A Rwoth, ikwonga an aka ibothan, kony perin omiyan bedo ŋatadwoŋ.

³⁷ Igwokan wokiri womakan, aka tiendan k'ocer.

³⁸ Ariemo jokwor paran aka aneko jo; akiwire gik cuka asika woko jo.

³⁹ Aredho jo piny, aka jokinyal ay malo; akengila jo aka joriere ruwaŋan.

⁴⁰ Imiyan meni ma lweny kodi loyo kwoŋ jokwor paran.

⁴¹ Imiyo jokwor paran ŋwec kwoŋan aka asika woko ji ma jodakan.

⁴² Joywak ri kony, to ngoye ŋat'okony jo, jolwoŋo Rwoth, to Rwoth kidwoki jo.

⁴³ Aŋinyo jo pa fukefuke ma lowo; anyono jo pa cwodho i yo.

⁴⁴ Ibothan gwenyirok gi ji aka ikuro dhum paran i piny je; ji m'oyido akuya am'onyo adhumo.

⁴⁵ Jopath jobino bwonirok ruwaŋan aka tekin jowinjo kwoŋan to joluwo cik paran.

⁴⁶ Miseni pajo rumo, aka jobino gi kirin wok i kapondo pajo.

⁴⁷ Rwoth kwo! Kwot paran wopak! Tuci dwoŋ pa Were matek ma bothan!

⁴⁸ Go miyan loyo kwoŋ jokwor paran; ketho nonin i dhum paran

⁴⁹ aka bothan kwoŋ cwo ma jomaker. A Rwoth, imiyan loyo kwoŋ jokwor paran aka ikwonga an kwoŋ cwo ma jomaker.

⁵⁰ Am'omiyo apakin, awi Rwoth, i dier nonin je, awero wer ma pakin.

⁵¹ Were miyo kikengila madongo ri kere pere; go nyutho mar makiwire ri ŋata go oyero, ri Daudi gi nyikwaye cil gi cil.