2 Samwiri 20 - KITAWO MALEŊ Catholic

Seba wire ri Daudi

¹ Oyido nitie jacwo ma bukony, m'oyido ilwoŋo ni Seba wod pa Bikri, janono pa Benyamin. Go ogoyo gwara to koko ni, “Wangoye gi adec i Daudi, aka wangoye gi gir'alunja i wod pa Yese; Kisi jacwo wodoki i wema pere, a Isiraili!”

² Ameno Joisiraili je jojwango Daudi aka jokadho gi Seba. To cwo ma Yuda jodoŋ ka joworo Daudi aka joluwo Daudi wok Yordan kiri Yerusalem.

³ Munyo Daudi otundo i cel pa kere pere i Yerusalem, otero mon pere apar ma gi thenge m'oyido oweyo kuro cel pa kere, aka oketho jo i cingi jokur. Omiyo jo gima jomito, to doko k'obedo gi jo. Ociero jo woth kamoro je doko i kwo pajo gipi, aka jobedo paka ji ma cwogi jo otho.

⁴ Kenyo kere owaco ri Amasa ni, “Lwoŋ cwo ma Yuda je kanyacel, aka idwoki gi jo ka bongan i ndelo adek.”

⁵ Ameno Amasa okadho lwoŋo jo; aka k'onyalo dwoko i sawa ma kere ocik'iye go ni wodwoki.

⁶ Ameno kere owaco ri Abisay ni, “Pama Seba bino miyo wan teko loyo Absalom. Kwany cwo paran, aka wiluw go; ka k'obedo ameno go bino mako tindin m'othok gi cel to kwale riwan.”

⁷ Onyo cwo pa Yowab, jokur pa kere, gi jolweny man joweyo Yerusalem, to jokadho rango Seba.

⁸ Munyo jotundo i got madwoŋ iy'adec ma Gibeon, Amasa oromo gi jo. Yowab oyido orukere ri lweny, gi toŋ pere iy'atum bor otweyo gi del. Munyo Yowab ocore yunyime, toŋ opodho wok iy'atum bor.

⁹ Yowab owaco ri Amasa ni, “Initie nedi mere paran?” Aka omako ye tike gi cinge ŋey wocwiy lembe.

¹⁰ To Amasa oyido k'oneno toŋ man m'oyido nitie i cingi Yowab; ameno Yowab ocwowo iye aka gir iye onyule woko piny. Kenyo won Amasa otho, aka Yowab k'ocwowo go kendo. Kenyo Yowab gi omin go Abisay jomedere rango Seba.

¹¹ Acel kwoŋ cwo pa Yowab ocungo cegin gi delkwoŋ Amasa, aka owaco ni, “Kisi ŋata nitie i thenge pa Yowab gi Daudi woluwi Yowab.”

¹² Delkwoŋ Amasa oyido oriere kenyo oumere gi remo i dier yo. Jalweny pa Yowab no oneno ni kisi nyatoro oyido cungo neno, ameno go oywayo delkwoŋ Amasa wok i yo to tero i sa, aka oumo gi bilangit.

¹³ Munyo otiek kwanyo woko delkwoŋ Amasa wok i yo, kisi nyatoro oluwo Yowab rango Seba.

¹⁴ Seba oluwo gi adec ma nonin je i Isiraili, aka otundo i tindi madwoŋ Abel Beth Maka, aka jonono pa Bikri je jocokere, aka joluwo go i tindi madwoŋ.

¹⁵ Cwo pa Yowab jowinjo ni Seba oyido nikenyo, aka jobino to jomako tindi madwoŋ no. Jogero kor ot ma lowo to thenere kwoŋ kor ot ma woko, aka jocako kunyo piny ma kor ot ŋey wopodhi piny.

¹⁶ Oyido nitie dhako mariek swa i tindi madwoŋ m'okoko gi kor ot ni, “Winji! Winji! Waci win ri Yowab wobin ka, amito luwo gine.”

¹⁷ Yowab okidho cegin gi go; aka dhako no openjo ni, “Ibedo Yowab?” Yowab odwoko ni, “Ey a an.” Dheno owaco ri Yowab ni, “Winjan jadwoŋ.” Yowab odwoko ni, “Awinjo.”

¹⁸ Onyo dheno owaco ri Yowab ni, “Cango oyido iwaco ni, ‘Kidhi i tindi madwoŋ Abel inwaŋ radwok.’ Meno a gima jotimo.

¹⁹ Tindi mawan dwoŋ, acel kwoŋ tindin ma disiem aka jowinjo i Isiraili. Raŋo itemo reyo woko? Raŋo imito reyo woko gim'obedo apa Rwoth?”

²⁰ Yowab odwoko ni, “Be, akibino reyo kosa nyeko tindi mewin madwoŋ.

²¹ Meno k'obedo can mawan. Jacwo m'ilwoŋo ni Seba wod pa Bikri, ma wok i piny matendere tendere Efrayim, otiŋo cinge malo kwoŋ kere Daudi. Miyan win go i cingan, aka abino eye woko i tindi madwoŋ.” Dheno odwoko ni, “Walabolo rin wic go gi kor ot.”

²² Kenyo dheno okidho bongi ji ma tindi madwoŋ gi rieko pere. Aka joŋado ŋuti Seba to jobolo gi kor ot ri Yowab. Yowab ogoyo gwara ma nyutho cwo pere ni jowoeye woko i tindi madwoŋ; aka jodok peco. Yowab odok i Yerusalem bongi kere.

²³ Yowab oyido obedo jamituka jolweny pa Joisiraili; aka Benaya wod pa Yehoyada oyido obedo jatel pa jokur pa Daudi.

²⁴ Adoram oyido obedo jatel pa jorom ji tic; aka Yehosafat wod pa Ahilud oyido obedo jandiko gi jakan gima timere je.

²⁵ Seva oyido obedo jandiko; aka Zadok gi Abiatha oyido jobedo jocway ri Were i wi migam i ker pa Daudi.

²⁶ Ira m'owok i tindi ma Yayir bende oyido obedo jacway ri Were i wi migam pa Daudi.