2 Samwiri 12 - KITAWO MALEŊ Catholic

Ageca pa Nathan gi ŋuto pa Daudi

¹ Rwoth ooro Nathan jatuci wac Were bongi Daudi waco rigo ni, “Obedo cwo ario i tindi moro madwoŋ, acel oyido oŋaŋ, aka acel jacandi.

² Jaŋaŋo oyido nitie gi rombo kodi dhok kweth

³ aka jacandi oyido nitie gi nyaka siwen rombo pere m'onyewo; aka odongo peco pere kanyacel gi nyithindho pere. Rombo me oyido cemo i sen pere, aka medho iy'agwata pere won, aka oyido go tiŋo rombo me i tiende pa nyare.

⁴ Ndelo acel, wendo obino peco pa jaŋaŋo, aka go oyido k'omito kwanyo acel kwoŋ rombo kosa dhok pere wothum ri wendo no; kwanyo woko go okwanyo siwen rombo pa jacandi ama go othumo to rweyo gine wendo pere.”

⁵ Kenyo nge omako Daudi gi jaŋaŋo aka owaco ni, “Akwoŋere i nyingi Rwoth makwo ni jacwo m'otimo gime ripo wotho;

⁶ aka go ripo woculi rombo no diŋwen, rupiri otimo gi gero.”

⁷ Nathan owaco ri Daudi ni, “Ibedo jacwo no. Aka me a gima Rwoth Were pa Isiraili waco, ‘Ayerin bedo kere ma Isiraili, aka abothin wok i cingi Saulo.

⁸ Amiyin ker gi mon pa Saulo to alokin kere ma Isiraili gi Yuda. Aka k'inen me oyido kiromin, dinyo amedin i dito.

⁹ To onyo raŋo m'ikwero luwo or paran? Raŋo itimo gimarac ruwaŋ Rwoth? Imiyo oneki Uriya i lweny; aka iweyo Joamon joneko go, aka onyo imayo go cege.

¹⁰ Onyo riameno, i kisi luse ji, kwoŋ nyikwayin bino bedo m'ilaneko jo gi toŋ rupiri ikwero winjan, aka ikwanyo cipa Uriya.’

¹¹ Rwoth waco ni, ‘Neni, abino kelo rin teko wok i ot perin won; aka abino kwanyo mon perin t'amiyo jager perin ma bino nindo gi jo odieceŋ par

¹² Itimo gime manyaliŋliŋ, t'abino timo gime odieceŋ par, ŋey Joisiraili je joneni.’ ”

¹³ Daudi owaco ri Nathan ni, “Atimo reco ruwaŋ Rwoth.” Nathan odwoko go ni, “Rwoth otieko cwako rin; ikilatho.

¹⁴ To rupiri icayo Rwoth munyo itimo gime, nyathi perin bino tho.”

¹⁵ Ameno Nathan odok peco. Aka Rwoth ogoyo nyathi ma ciliendi Uriya onywolo ri Daudi gi two.

Wod pa Daudi tho

¹⁶ Daudi okwayo Were ŋey nyathi wobedi maber. Orio, aka kisi ka wor otundo odonjo i kisika pere to nindo piny i dier ot.

¹⁷ Jotel ma peco pere jokidho bonge aka jotemo tiŋo go malo, to go kwero aka k'ocemo gi jo kanyacel.

¹⁸ Munyo ndelo abirio okadho, nyathi otho. Jotel pere jolworo waco rigo. Aka jowaco ni, “Neni, munyo nyathi fodi kwo, waluwo gine to k'onyalo winjo wan; t'onyo ka wanowaci rigo ni nyathi otho go nyalo miyo kwo pere litho.”

¹⁹ Munyo Daudi oneno jomwoŋo, go oniaŋ ni nyathi otho aka openjo jo ni, “Nyathi otho?” Jodwoko ni, “Ey, go otho.”

²⁰ Kenyo Daudi oay malo wok piny, okidho to lwokere, owire gi mo, owiro nangin pere, aka okidho to lamo i Ot pa Rwoth. Munyo go ogik i ot pere, okwayo cemo, aka okeli rigo to camo piyo.

²¹ Jotel pere jodhier to jopenjo go ni, “Me ginaŋo m'itimo? Mafodi nyathi kwo, iywak aka iriyo rigo; to tekin nyathi tho, iay malo t'icemo!”

²² Daudi odwoko ni, “Ey, ariyo t'aywak mafodi go kwo, rupiri oyido aparo ni Rwoth nyalo mako kodan wor to botho go.

²³ T'onyo pama go otieko tho; raŋo ariy? Anyalo dwoko kwo pere kendo? Alakidho bonge to go kiladwoko bongan.”

Nywolirok pa Solomon

²⁴ Daudi oyomo cuny cege Bathseba, aka onindo gine to Bathseba nywolo wode ma Daudi ocwoko ni Solomon. Aka Rwoth omaro Solomon

²⁵ aka omiyo jatuci wac Were Nathan miyo go nyinge ni Yedidia rupiri Rwoth oyido omaro go.

Daudi mako tindi madwoŋ Raba

²⁶ Munyo gigipiny me timere, Yowab omedere lweny gi Joamon, aka omako tindi pajo madwoŋ Raba.

²⁷ Yowab ooro jomikwenda bongi Daudi gi wac ni, “Amonjo Raba, aka atieko mako thenge mere ma pi wok gine.

²⁸ Onyo pama, coki jolweny perin m'odoŋ kanyacel, imonji tindi in won; rupiri anyalo mako tindi to ilwoŋo gi nyingan.”

²⁹ Ameno Daudi ocoko jolweny pere kanyacel, aka jokidho Raba to jomonjo aka jomako.

³⁰ Daudi okwanyo sangaria pa Molek were pa Joamon, m'oyido nitie gi zahabu ma romo kilo piero adek g'abic aka oyido nitie gi telin ma welo to ketho i sangaria pere. Daudi bende okelo gigipiny mathoth ma jonyaga wok i tindi madwoŋ.

³¹ Go okelo ji ma Raba aka omiyo jo tic gi musimeno, kwe ma nyweny, le ma nyweny, aka omiyo jo goyo matafal. Otimo gime ri ji ma tindin pa Joamon man. Kenyo Daudi gi cwo pere jogik Yerusalem.