2 Samwiri 11 - KITAWO MALEŊ Catholic

Daudi gi Bathseba

¹ I hongo ma oro, ma kerin jomaro kidh'iye i lweny, Daudi ooro Yowab kodi jotel pa jolweny pere kodi jolweny ma Isiraili gibe; aka jokengila Joamon. To Daudi k'okadho i lweny, go odoŋ Yerusalem.

² Ndelo acel, i hongo m'othieno, Daudi oay i kanindo pere aka oidho malo ma ot pere. Munyo go wotho idho malo, oneno dhako moro lwokere. Dhako no oyido ŋon swa.

³ Daudi to oro jamikwenda moro niaŋ kwoŋ ŋata dhako no obedo; aka onwaŋere ni manago oyido Bathseba nyar Eliam, aka cipa Uriya Jahiti.

⁴ Daudi ooro jomikwenda omo Bathseba, jokelo go bonge to Daudi nindo gine (Bathseba oyido nyaka otieko ruko dwe.) Kenyo go odok peco.

⁵ Rumacen mere, Bathseba oniaŋ ni ogamo iye, aka odhiro wac ri Daudi miyo go ŋeyo.

⁶ Daudi odhiro wac ri Yowab ni, “Dhiri ran Uriya Jahiti.” Ameno Yowab bende odhiro Uriya bongi Daudi.

⁷ Munyo Uriya otundo bongi Daudi, Daudi openjo go k'inen Yowab gi jolweny oyido jober, kodi nger ma lweny oyido medere iye.

⁸ Kenyo Daudi owaco ri Uriya ni, “Dok peco iywomere ma hongo moro.” Uriya oeye bongi Daudi, aka Daudi odhiro ri peco pere mic.

⁹ To Uriya k'odok peco; okidho to nindo i waŋkac ma peco pa kere gi jokur pa Daudi.

¹⁰ Munyo Daudi owinjo ni Uriya k'onindo peco pere, openjo Uriya ni, “Nyaka idwoko m'oyido ikibedi gi cegin; to raŋo ikidoki peco?”

¹¹ Uriya odwoko ni, “Cwo ma Isiraili gi Yuda jonitie i lweny, aka Kakan ma Cikirok pa Were nitie bongi jo; aka jadwoŋ paran Yowab jamituka jolweny kodi jotel pa jolweny jotimo kambi i sa kam'othangere. Anonyal nedi dok peco cemo gi medho, t'anindo gi dhako paran? Paka ikwo aka doko paka cunyin kwo, akibino timo gigipiny me.”

¹² Ameno Daudi owaco rigo ni, “Doŋ ka konon, aka dikin abino dhirin igiki i lweny.” Ameno Uriya obedo Yerusalem ndelo no gi yawere.

¹³ Aka Daudi olwoŋo go cemo othieno, ocemo to medho aka omer. To doko wor no Uriya k'odok peco pere; kwanyo woko onindo i par pere bongi jokur pa Daudi.

¹⁴ Yawere odikin, Daudi ondiko balwa ri Yowab, aka omiyo Uriya ni woter rigo.

¹⁵ I balwa no Daudi ondiko ni, “Kethi Uriya yuwiye kama lweny lieth'iye swa, k'itieko timo ameno, ringi t'iweyo woneki go.”

¹⁶ Riameno munyo Yowab oyido mako tindi madwoŋ, odhiro Uriya kama jokwor oyido jolweny'iye matek.

¹⁷ Jokwor pa Joisiraili jowok i tindi madwoŋ, aka jolwenyo gi cwo pa Yowab; jotel pa jolweny pa Daudi megi jotho, aka kiri Uriya je oneki.

¹⁸ Kenyo Yowab ooro jamikwenda bongi Daudi waco rigo gima mako kwoŋ lweny,

¹⁹ aka ociko go ni, “K'itieko waco ri kere wac ma mako kwoŋ lweny,

²⁰ go nyalo mako nge to penjin ni, ‘Raŋo wicore cegin gi tindi madwoŋ lweny gi jo? Oyido wikiŋey ni jonyalo bolo aserin gi kor ot?

²¹ Wikipoy nger ma Abimelek wod pa Gideon onek'iye? Obedo i Thebez ma dhako moro obolo tele piny gi kor ot to neko go. Raŋo to wicore cegin gi kor ot?’ Ka kere openjin ameno, wac rigo ni, ‘Jatel pa jolweny perin Uriya bende otho.’ ”

²² Jamikwenda no obino bongi Daudi, aka owaco rigo gima Yowab ooro go gine ni wowaci.

²³ Jamikwenda no owaco ri Daudi ni, “Jokwor mawan oyido jotek loyo wan, jowok i tindi madwoŋ to jobino lweny gi wan kam'othangere, to wariemo jo kiri i waŋkac ma tindi madwoŋ.

²⁴ Aka jobolo aserin gi kor ot, to megi kwoŋ jotel pa jolweny perin jotho; kiri Uriya je oneki.”

²⁵ Daudi owaco ri jamikwenda no ni, “Waci ri Yowab ni wokiri worembi, rupiri k'ikidho i lweny ikinyal ŋeyo ni ŋa ma latho. Waci rigo womonji tindi madwoŋ aka womaki.”

²⁶ Munyo Bathseba owinjo ni oneki cwore, oywako go.

²⁷ Munyo hongo ma ywak orumo, Daudi olwoŋo Bathseba i peco pere, aka olokere cege to nywolo rigo nyathi. To gima Daudi otimo k'osangala Rwoth.