2 Samwiri 10 - KITAWO MALEŊ Catholic

Daudi kengila Joamon kodi Josiria

¹ Rumacen ma hongo moro, Nahas kere ma Amon otho, aka wode m'ilwoŋo ni Hanun ama olunjo go.

² To kere Daudi waco ni, “Ripo anyuthi wor ri Hanun paka bamere Nahas ndir no otimo ran.” Ameno Daudi ooro jomikwenda bongi Hanun kisekera go ro tho pa bamere. Munyo jomikwenda no jotundo Amon,

³ jomic rieko pa Hanun jowaco rigo ni, “Iparo adieri ni Daudi ooro jomikwenda me kisekera in ma woro benin? Daudi ooro jomikwenda pere me bino ŋeyo nyaliŋliŋ ma tindi madwoŋ me ŋey wonyali mako!”

⁴ Hanun omako jomikwenda pa Daudi aka olielo adec ye tik gin, oyeco nangin pajo, to riemo jo woko.

⁵ Wickwot omako jomikwenda me dok peco. Aka munyo Daudi owinjo gim'otimere rijo, odhiro rijo wac ni jowobedi Yeriko cuka ye tik gin twi.

⁶ Munyo Joamon joneno ni joloko Daudi jakwor pajo, jokidho to jonyewo jolweny 20,000 ma Siria wok i tindin madongo Bethrehob gi Zoba, cwo 12,000 wok Tob, kodi kere ma Maka gi cwo pere 1,000.

⁷ Munyo Daudi owinjo, ooro Yowab gi jolweny pere gibe lweny gi jo.

⁸ Joamon joŋanjo, aka jocanere i dhiot ma waŋkac. Josiria ma Zoba gi ma Rehob, kodi cwo ma Tob, kodi Maka, oyido jonitie kakendi gin kam'othangere.

⁹ Munyo Yowab oneno ni jolweny oyido jonyalo monjo go gi yuwiye kiri gi yucen, oyero jolweny mabeyo kwoŋ jolweny pa Isiraili, aka oketho jo kam'oŋiyere gi Josiria.

¹⁰ Jolweny m'odoŋ Yowab oketho jo i cingi Abisay omin go; aka oketho jo kam'oŋiyere gi Joamon.

¹¹ Yowab owaco ri Abisay ni, “K'ineno ni Josiria jokengila an, ibin ikonyan; to ka aneno ni Joamon jokengila in alabino konyin.

¹² Bedi jamiseni! Weyi walweny matek ri ji mawan aka ri tindin madongo pa Were mawan. Aka weyi mito pa Rwoth wotimere!”

¹³ Yowab gi cwo pere jodhire cegin monjo Josiria, to Josiria joringo woko.

¹⁴ Munyo Joamon joneno Josiria joringo woko, jo bende joringo woko kwoŋ Abisay aka jogik i tindi madwoŋ. Kenyo Yowab oweyo lweny gi Joamon, aka odok Yerusalem.

¹⁵ To munyo Josiria joneno ni Joisiraili jokengila jo, jocokere kanyacel.

¹⁶ Kere Hadadeza ooro ji moro, aka okeli Josiria je m'oyido jonitie yuwok ceŋ ma malawa Yufrete; aka jobino Halam munyo jamituka jolweny pa Hadadeza m'ilwoŋo ni Soba ama telo jo.

¹⁷ Munyo Daudi owinjo, ocoko jolweny ma Isiraili je kanyacel, aka joŋado malawa Yordan to jobino Helam kama Josiria jocaner'iye to joŋiyere gi jo. Lweny ocakere,

¹⁸ aka Joisiraili joriemo woko Josiria. Daudi gi cwo pere joneko cwo ma Siria 700 ma jogweyo cawila, kodi cwo 40,000 ma jogweyo kayina, aka jowumiya Sobak jamituka jolweny pa Hadadeza, to tho kenyo.

¹⁹ Munyo kerin m'oyido jobedo ŋecin pa Hadadeza joneno ni Joisiraili jokengila jo, jotimo siem gi Joisiraili, aka jolokere ŋecin pajo. Aka Josiria lworo omako jo doko konyo Joamon.