2 Petero 1 - KITAWO MALEŊ Catholic

¹ Balwa m'owok bongi Simon Petero, jatic kendo jamoor pa Yesu Kristo. Ri joma i tiro pa Were mawan kendo Jaboth, Yesu Kristo, omiy jo yeyo ma diwelo paka mawan.

² Weyi nema gi siem wobedi mewin i thotho i ŋeyo Were kodi Yesu Rwodhiwan.

Ridho lwoŋo pa Were gi yer pere

³ Meni pa Were omiyo wan gimoro je ma wayenyo ma bedo i kwo ma lworo Were, rupiri waŋeyo ŋat'olwoŋo wan gi dwoŋ kodi bero pere won.

⁴ Ameno go omiyo wan, mic m'ociko madwoŋ swa kendo ma diwelo, ŋey ka walimo mic me wabino both kwoŋ reco manitie i piny ka ro awanya, to wadonjo i kula ma nyawerewere.

⁵ Riameno, tem win paka winyalo medo bero kwoŋ yeyo mewin; kodi niaŋ kwoŋ bero;

⁶ kodi kurok kwoŋ niaŋ; kwoŋ kurok mewin medi win ciro; kwoŋ ciro medi win lworo Were;

⁷ kwoŋ lworo Were medi win'iye woro jom'oyeyo jowot win; aka kwoŋ woro jom'oyeyo jowot win medi win'iye marok.

⁸ Ka wimedo bedo gi gima beyo me madit, bino loko win mayil to wibedo gi kony i rieko mewin kwoŋ Rwodhiwan Yesu Kristo.

⁹ To ka nyatoro ongoye gi gima beyo me, meno kere go waŋe neno ma riprip aka wiye owil ni otiek lonyo go kwoŋ reco pere.

¹⁰ Am'omiyo, jowotan, tem win paka winyalo ridho lwoŋo kodi yer mewin; ka witimo ameno wik'opodhi i yeyo mewin.

¹¹ Ameno, ibino jolo win maber donjo i Ker makirum mapa Rwodhiwan kendo Jaboth mawan Yesu Kristo.

Wac atuca

¹² Am'omiyo ndir je abino poyo win gigipiny me, kada witieko ŋeyo jo aka wicungo kiri matek i adieri ma witieko jolo.

¹³ Aparo ni obedo gim'otire ka acewo paro mewin to wipoyo gigipiny me kafodi akwo,

¹⁴ rupiri aŋeyo ni acegin lunyo woko delkwoŋan me paka Rwodhiwan Yesu Kristo otieko nyuthan kamaler.

¹⁵ Aka abino temo paka anyalo neno ni kada k'atieko weyo piny me fodi wibino poyo gigipiny me.

Jakony m'oneno dwoŋ pa Kristo

¹⁶ Wakicungo kwoŋ kigana acwoga munyo watito riwin bino pa Rwoth Yesu Kristo gi meni, to waneno dwoŋ pere gi waŋ wan.

¹⁷ Ato oyido wanitie munyo Were Bawan miyo go dwoŋ ma malo, munyo dwondi jo m'owok bongi Dwoŋ ma Malo ca oluwo rigo, munyo waco ni, “Me Wodan m'amaro ma asangala gine!”

¹⁸ Wawegi wawinjo dwondi ŋato munyo luwo wok i polo, kareno oyido wanitie gi Yesu wi got.

¹⁹ Aka, wanitie gi wac pa jotuci wac m'otiek ridho. Wibino timo maber ka wiketho paro mewin kwoŋe; kole obedo pa lero ma meny kama col cuka ndelo yawere to lero pa sulwe m'odikin menyo cuny win.

²⁰ To ma kalo me, poyi win nike ongoye ŋata won ocwogo wac m'otuci i Ndiko Maleŋ.

²¹ Ato ongoye mikwenda pa Were m'otuci m'owok i mito pa dhano, to ji jobedo i meni pa Cuny Maleŋ munyo jotuco mikwenda m'owok bongi Were.