2 Kerin 6 - KITAWO MALEŊ Catholic

Gir'aura ma wic le

¹ Ndelo acel kitipa pa jotuci wac Were ma Elisa oyido telo jogeŋisa rigo ni, “Neni, kabedo ma wabed'iye i tel perin thin swa!

² Miy wan wakidhi i Yordan watoŋ yen mogo, ŋey wanyal geto kabedo.” Elisa odwoko ni, “Meno ber.”

³ Kenyo acel kwoŋ jo okwayo go wokadhi gi jo, aka oyeyo.

⁴ Aka jokadho kanyacel. Munyo jotundo i Yordan, jocako tic.

⁵ To munyo acel kwoŋ jo toŋo yath, wic le pere opodho i pi, aka oywaki ri Elisa ni, “Anotim aŋo jadwoŋ? Obedo le akwaya.”

⁶ Elisa openjo ni, “Opodho kune?” Munyo jalo onyutho go kama le opodh'iye, otoŋo luth to bolo i pi aka le omol wi pi.

⁷ Elisa owaco ni, “Kwany.” Ameno jalo oguŋo piny to kwanyo.

Elisa gi Josiria

⁸ Ndelo acel kere ma Siria oyido lwenyo gi Joisiraili. Oluwo gi jotel pa jolweny pere to yero kaketho kambi pere.

⁹ To Elisa odhiro wac ri kere ma Isiraili gwoko go wokiri wokidhi kanyago kwoŋbedo Josiria oyido jociko jo kenyo.

¹⁰ Ameno kere ma Isiraili ogwoko ji m'oyido jobedo i kabedo no, aka jokure. Gime otimere dikweth.

¹¹ Cuny kere ma Siria orembo swa kwoŋ gime, olwoŋo jotel pa jolweny pere aka openjo jo ni, “Ŋa kwoŋ win manitie i thenge pa kere pa Isiraili?”

¹² Acel kwoŋ jo odwoko ni, “Ongoye kwoŋ wan jadwoŋ paran. Jatuci wac Were Elisa waco ri kere ma Isiraili kisi gim'iwaco makada nende iwaci manyaliŋliŋ i kisika perin.”

¹³ Kere owaco ni, “Dwar win kama go nitie iye aka abino mako go.” Munyo owaci rigo nike Elisa oyido nitie i Dothan,

¹⁴ ooro jolweny madwoŋ kodi punde kodi cawilin. Jotundo i tindi wor aka jothoko.

¹⁵ Yawere odikin maŋic ŋeca pa Elisa oay malo to wok woko, aka neni jolweny gi kayinin kodi cawilin oyido jothoko tindi. Ogik bongi Elisa aka owaco rigo ni, “Jadwoŋ wanitie i kidamba, wanotim aŋo?”

¹⁶ Elisa odwoko ni, “Ikir'ibwoki, kole wadit gi ji ma jonitie i thenge mawan loyo ji ma jonitie i thenge pajo.”

¹⁷ Kenyo Elisa okwayo ni, “Rwoth, yaw waŋe aka wonen!” Ameno Rwoth oyawo waŋ ŋeca pa Elisa, oŋiyo malo to neno got opoŋ gi kayinin kodi cawilin ma mac thoko Elisa.

¹⁸ Aka munyo Josiria jomonjo, Elisa okwayo ni, “A Rwoth goy cwo me gi waŋtho!” Rwoth owinjo kwayo pere aka ogoyo jo gi waŋtho.

¹⁹ Kenyo Elisa okidho bongi jo aka owaco ni, “Me ka royo aka me ka tindi ma wirango; luwan win, aka abino tero win bongi jacwo ma wirango.” Aka otero jo i Samaria.

²⁰ Tekin jodonjo i Samaria, Elisa okwayo ni, “A Rwoth yaw waŋ ji me jowonyal neno.” Ameno Rwoth odwoko kwayo pere to yawo waŋ jo to joneno nike oyido jonitie i Samaria.

²¹ Munyo kere ma Isiraili oneno jolweny ma Siria, openjo Elisa ni, “Baba, aneki jo? Aneki jo?”

²² Elisa odwoko ni, “Be, ikir'ineki jo. Oyido inyalo neko jolweny m'imako g'abor perin kodi kwot perin? Miy jo cemo kodi gir'amadha, aka iwey jowodoki bongi kere pajo.”

²³ Ameno kere ma Isiraili otimo kalima madwoŋ rijo, aka rumacen odhiro jo dok bongi kere ma Siria. Wok kenyo Josiria joweyo kinyaga i piny ma Isiraili.

Mako Samaria

²⁴ Rumacen ma hongo, Benhadad kere ma Siria otelo jolweny pere je kwoŋ Isiraili to mako tindi madwoŋ Samaria.

²⁵ Aka ro gime kec madwoŋ obedo Samaria tundo kama wic punda oyido nyewo feza piero aboro, aka gram 200 ma woyo akuro oyido feza abic.

²⁶ Onyo kere ma Isiraili oyido luwo dho kor ot ma tindi madwoŋ, to dhako moro koko ni, “Konyan, jadwoŋ kere!”

²⁷ Kere odwoko ni, “K'inen Rwoth kinyal konyin, anokonyin nedi? Anitie gi ŋano kosa vini?

²⁸ Teko perin aŋo?” Dhako no odwoko ni, “Ndelo ca dhako me owaco ran nike akel wodan wacam aka wacam apere yawere.

²⁹ Ameno watedo wodan to wacamo go. Aka yawere munyo awaco rigo nike wacam wode bende, to kere go oyido okano wode.”

³⁰ Munyo kere owinjo wac pa dhako no, oyeco woko nangin pere, aka ji m'oyido jonitie cegin gi kor ot joneno nike kere oyido oruko kutiya i wi nangin pere.

³¹ Kere owaco ni, “Weyi Were wonekan k'inen wic Elisa k'oŋadi mafodi piny k'oyutho!”

³² Aka ooro jamikwenda mako Elisa. Kome Elisa oyido nitie peco gi jodongo mogo m'oyido jowendo rigo. Mafodi jamikwenda pa kere k'otundo, Elisa owaco ri jodongo no ni, “Janek no eno ooro dhano nekan! Onyo ka otundo ka cegi win thigo aka wikiri wiyey go donjo. Kere won gipi luwo go cen.”

³³ Aka ma fodi Elisa luwo, kere obino bonge aka owaco ni, “Rwoth am'okelo teko me kwoŋ wan! Raŋo akuri go wotim gimoro?”