2 Kerin 25 - KITAWO MALEŊ Catholic

Podho pa Yerusalem

¹ Zedekia ogwenyere kwoŋ kere Nebukadineza ma Babilon, ameno Nebukadineza obino gi jolweny pere je to monjo Yerusalem k'apar ma dwe mar'apar i oro mar'abuŋwen ma dhum pa Zedekia. Joketho kambi woko ma tindi madwoŋ, jogeto cel thoko,

² aka jothoko cuka oro mar'apar g'acel ma dhum pa Zedekia.

³ Ka ndelo abuŋwen ma dwe mar'aŋwen i oro no won, kec oyido kec i piny ma ji jongoye gi cemo,

⁴ aka otur kor ot ma tindi madwoŋ. Makada nende jolweny pa Jobabilon oyido jothoko tindi madwoŋ, kere Zedekia kodi jolweny pere jokwale wor gi yo ma ndelo pa kere to joluwo gi waŋkac ma riwo kor udi ario, aka joringo yuthenge ma milelo Yordan.

⁵ To jolweny pa Jobabilon joriemo kere, jomako go kam'obipere cegin gi Yeriko, aka jolweny pere jokedhere kwoŋe.

⁶ Kenyo jomako Zedekia to jotero go bongi kere Nebukadineza m'oyido nitie i tindi madwoŋ Ribina, aka Nebukadineza othumo rigo banja.

⁷ Joneko wot Zedekia munyo go neno gi waŋe; kenyo Nebukadineza omiyo ogol waŋ Zedekia t'itweyo go gi lijegere, aka oter go i Babilon.

Ireyo woko Ot pa Rwoth

⁸ Ka ndelo abirio ma dwe mar'abic i oro mar'apar g'abuŋwen ma dhum pa kere Nebukadineza ma Babilon, Nebuzaradan, jamic rieko pa kere kodi jamituka pa jolweny pere jodonjo i Yerusalem.

⁹ Nebuzaradan owaŋo woko Ot pa Rwoth, cel pa kere, kodi udi pa ji madongo je i Yerusalem,

¹⁰ aka jolweny pere joturo piny kor tindi madwoŋ.

¹¹ Kenyo Nebuzaradan otero i Babilon ji m'oyido jodoŋ i tindi madwoŋ, jondijo ma jodoŋ kodi jono m'oyido jotiŋo cingi gin ri Jobabilon.

¹² To weyo jocandi loyo mogo, m'oyido jongoye gi lim moro tiyo i ndelin vini kodi ndelin.

¹³ Jobabilon joturo mathindho thindho sirin ma ywel kodi magal m'oyido jonitie i Ot pa Rwoth, kanyacel gi pipa malac ma ywel, aka jotero ywel mere i Babilon.

¹⁴ Jo bende jokadho gi mwiko kodi siniya m'aketho buru ma migam, gigipiny ma talin, acero ma jolo remo ma cowirok, acero ma waŋo buban, kodi gigipiny ma ywel je m'oyido ioro i Ot pa Rwoth.

¹⁵ Jokadho gi gigipiny je m'otimi ma zahabu kosa feza, kiri g'acero mathindho kodi sapikere ma tiŋo cuk mac.

¹⁶ Gigipiny ma ywel ma kere Solomon otimo ri Ot pa Rwoth, sirin ario, magal, kodi pipa malac oyido jokipimere.

¹⁷ Sirin ario oyido jocale; kisi acel mita aboro i ŋawirok, gi raŋaw i wiye, mita 1.3 i ŋawirok kodi cal ma lijegere m'okedi m'okicin gi cal ma pomo m'otimi gi ywel.

Itero ji ma Yuda i Babilon

¹⁸ Nebuzaradan bende omako Seraya jadwoŋ pa jocway ri Were i wi migam, Zefania jocway ri Were i wi migam ma luwo i dwoŋ, kodi jodhum ma Ot pa Rwoth adek.

¹⁹ I tindi madwoŋ omako jamituka pa jolweny acel, jomic rieko pa kere abic m'oyido fodi jodoŋ kenyo, ŋata luwo jamituka pa jolweny i dwoŋ m'oyido jandiko ma lweny, kodi cwo piero aucel man ma jodongo.

²⁰ Nebuzaradan otero jo bongi kere Nebukadineza i tindi madwoŋ Ribila

²¹ iy'adec ma Hamath. Kenyo kere omiyo ocwadi t'ineko jo. Ameno otiŋ ji ma Yuda wok i piny pajo.

Gedalia, gavana ma Yuda

²² Kere Nebukadineza oketho Gedalia, wod pa Ahikam aka nyakwar Safan gavana ma Yuda telo ji m'oyido jodoŋ i Yuda.

²³ Munyo Joyuda ma jotel pa jolweny kodi jolweny m'oyido jok'otiŋo cingi gin ri Jobabilon jowinjo gime, joriwere gi Gedalia i Mizipa. Jotel pa jolweny me oyido jobedo Isimayil wod pa Nathania, Yohana wod pa Kareya, Seraya wod pa Tanhumeth ma wok i tindi Netopa, kodi Yezania ma wok Maka.

²⁴ Gedalia owaco rijo ni, “Amiyo win wac paran ni wikiri wilwor jodhum pa Jobabilon. Bedi win i lowo me, tiyi win ri kere ma Babilon, aka kisi gimoro bino bedo maber gi win.”

²⁵ To i dwe mar'abirio i oro no won, Isimayil wod pa Nathania aka nyakwar Elisama, ma wok peco pa kere okidho i Mizipa gi cwo apar, omonjo Gedalia to neko go. Go bende oneko Joisiraili kodi Jobabilon m'oyido jonitie kenyo.

²⁶ Kenyo Joisiraili je ma joŋaŋ kodi ma jocandi kanyacel gi jotel pa jolweny joringo i Misir kwoŋbedo oyido jolworo Jobabilon.

Igonyo Yehoyakin wok i katwec

²⁷ I oro ma Evilmerodak obedo kere ma Babilon, onyutho kere Yehoyakin ma Yuda wor to gonyo go wok i katwec. Gime ka piero ario g'abirio i dwe mar'apar g'ario i oro ma piero adek g'abirio wok cuka tweyi Yehoyakin.

²⁸ Evilmerodak otero gine wor, aka omiyo go kabedo ma wor loyo kerin man je m'oyido jonitie i twec i Babilon.

²⁹ Ameno oyey Yehoyakin wiro nangin pere ma katwec kodi bedo kanyo cemo kanyacel gi kere i meza pa kere i kwo pere je.

³⁰ Kisi ndelo i kwo pere omiy go pesa ma noknok ri gima go mito.