2 Kerin 23 - KITAWO MALEŊ Catholic

Kere Yosia kwanyo woko lamo manyakafir

¹ Kenyo Kere Yosia olwoŋo jotel je ma Yuda gi Yerusalem,

² aka okidho gi jo i Ot pa Were kanyacel kodi jocway ri Were i wi migam, jotuci wac Were kodi ji je, jocandi kodi joŋaŋo. Kere osoma kitawo ma cikirok m'onwaŋere i Ot pa Rwoth.

³ Kere ocungo cegin gi siro acel aka otimo cikirok gi Rwoth winjo go, kuro cik kodi Or pere gi cunye je kodi adundo pere je kodi ketho i tim gima cikirok mito paka ondiki i kitawo. Aka ji je bende jociko kuro cikirok.

⁴ Kenyo Yosia omiyo Hilikia jadwoŋ pa jocway ri Were i wi migam, jocway ri Were i wi migam ma joluwo go i dwoŋ, kodi jokur m'oyido jonitie i tic i waŋkac ma Ot pa Rwoth wodho woko gigipiny je m'oyido ioro ma lamo Bal, were madhako Asera, kodi micalin. Kere owaŋo woko gigipiny me je woko ma tindi madwoŋ cegin gi milelo Kidiron, to tero buru mere i Bethel.

⁵ Oriemo woko i tic jocway ri Were i wi migam ma kerin ma Yuda oyido joketho miyo cowirok i wi migam manyakafir i tindin madongo ma Yuda kodi i kabedo macegin gi Yerusalem. Kiri jocway ri Were i wi migam ma jowaŋo buban ri Bal, waŋceŋ, dwe, pondeponde, kodi micalin.

⁶ Owodho woko cal pa Asera i Ot pa Rwoth, otero woko ma tindi madwoŋ i milelo Kidiron, owaŋo to odo buru mere i fukefuke, aka oywoyo i limbo pa ji je.

⁷ Kere bende oturo woko udi pa cwo kodi mon m'oyido jobedo malayin i Ot pa Rwoth. (Kenyo a kama mon oyido jokwoyo iye kanzin ma lamo Asera.)

⁸ Okelo i Yerusalem jocway ri Were i wi migam m'oyido jonitie i tindin madongo ma Yuda, to loko makoc migame m'oyido jomiyo iye cowirok. Go bende oturo piny migame m'oyido omiy ri jwogi diegi cegin gi waŋkac ma Yosuwa gavana ma tindi madwoŋ ogeto, yuracam ma waŋkac madwoŋ ka idonjo i tindi madwoŋ.

⁹ Jocway ri Were i wi migam me oyido kiyey jo tic i Ot pa Rwoth, to oyido jonyalo camo mugat ma buthow m'imiyo jocway ri Were i wi migam wadi jo.

¹⁰ Kere Yosia bende oloko makoc Tofeth, kalamo manyakafir i milelo Hinom, ŋey wongoye ŋata nyalo miyo wode kosa nyare paka cowirok ma mic awaŋa ri were Molek.

¹¹ Go bende okwanyo woko kayinin ma kerin ma Yuda oyido joketho gicen ma lamo waŋceŋ, to waŋo cawilin m'oyido ioro i lamo me. Oyido ikano jo i diedipo ma Ot pa Rwoth, cegin gi waŋkac aka oyido kibor gi kama jadhum madwoŋ Nathan Melek oyido bed'iye.

¹² Kere Yosia oturo piny migame m'oyido kerin ma Yuda jogeto i wi cel pa kere malo ma kisika ma kere Ahaz oyido ogeto, kanyacel gi migame ma kere Manase ogeto i diedipo ario ma Ot pa Rwoth; oŋinyo migame mathindho thindho to bolo i milelo Kidiron.

¹³ Kere Yosia bende oloko makoc migame ma kere Solomon oyido ogeto yupodho ceŋ ma Yerusalem, yupiny ma got Oliv, ma lamo cal ma mienirok kodi ri Asitate were madhako ma Sidon, Kemos were ma Mowab, kodi Molek were ma Amon.

¹⁴ Kere Yosia oturo sirin ma tele mathindho thindho, otoŋo piny were madhako Asera, to umo piny kam'oyido jocungo iye gi cokin pa ji.

¹⁵ Kere Yosia bende oturo piny kalamo ma kere Yerobowam wod pa Nebat m'omiyo Joisiraili timo reco oyido ogeto i Bethel. Oŋinyo telin mere mathindho thindho to odo i fukefuke, aka owaŋo cal pa Asera bende.

¹⁶ Kenyo kere Yosia oŋiyo korin gi korin to neno kaliele mogo kenyo i wi tendere. Owaco wogol woko cokin mere wowaŋ i wi migam ŋey wokiri woor kendo. Gime otimere paka jatuci wac Were moro owaco munyo kere Yerobowam oyido ocungo i wi migam no i kalima moro. Kere Yosia oŋiyo korin gi korin aka oneno kaliel pa jatuci wac Were m'owaco ni gigipiny me bino timere,

¹⁷ aka openjo ni, “Meno kaliel pa ŋa?” Ji ma Bethel jodwoko ni, “Meno kaliel pa jatuci wac Were m'owok i Yuda to waco gigipiny m'itimo ri migam me.”

¹⁸ Yosia owodho or ni, “Weyi win paka nitie wikiri wigol cokin pere.” Ameno cokin pere kodi apa jotuci wac Were ma jowok i Samaria k'ogol.

¹⁹ I kisi tindi madwoŋ i Isiraili kere Yosia oturo piny kalamo manyakafir ma kerin ma Isiraili oyido jogeto to jokwinyo nge pa Rwoth. Otimo ri migame no je gima go oyido otimo i Bethel.

²⁰ Oneko woko jocway ri Were i wi migam ma joma bu Were i wi migame ma jotiyo iye, to waŋo cokin pa ji i wi kisi migam. Kenyo ogik i Yerusalem.

Kere Yosia camo kalima ma Kadho

²¹ Kere Yosia omiyo ji or camo kalima ma Kadho ma miyo Rwoth Were pajo dwoŋ, paka ondikere i kitawo ma cikirok.

²² Kole oyido ongoye kere ma Isiraili kosa Yuda m'ocamo kalima ma Kadho paka me wok i hongo ma jothum banja jodhumo iye.

²³ To i oro mar'apar g'aboro ma dhum pa Yosia, kalima ma Kadho ocam i Yerusalem.

Wirok man ma Yosia otimo

²⁴ Ma ridho cik m'ondiki i kitawo ma Hilikia jadwoŋ pa jocway ri Were i wi migam onwaŋo i Ot pa Rwoth, kere Yosia oriemo wok i Yerusalem kodi Yuda gipi jothieth, jojwok, werin ma udi, cal kodi gigipiny ma lamo manyakafir je.

²⁵ Oyido fodi ongoye kere m'ocalo go, m'otiyo ri Rwoth gi cunye je, g'adundo pere je gi meni pere je to luwo cik pa Musa je; aka ongoye kere man kendo m'ocalo go rumacen ma dhum pere.

²⁶ To keme pa Rwoth oyido fodi oliel kwoŋ Yuda gi gima kere Manase oyido otimo, aka kiri gunyo ni k'okwe.

²⁷ Rwoth owaco ni, “Abino timo ri Yuda gim'atieko timo ri Isiraili. Abino kwanyo jo woko ruwaŋan, aka abino jwango Yerusalem, tindi madwoŋ m'ayero, kodi Ot pa Rwoth kabedo m'oyido awaco ni iripo laman'iye.”

Gike ma dhum pa Yosia

²⁸ Onyo gigipiny man ma Yosia otimo ondiki i kitawo ma kigana ma mako kwoŋ kerin ma Yuda.

²⁹ I hongo ma dhum pere Farawo Neko kere ma Misir otelo jolweny pere i malawa Yufrete konyo kere ma Asiria. Kere Yosia otemo geŋo jo, aka oneki go i lweny i Megido.

³⁰ Jodhum pere joketho delkwoŋe i cawila aka jodwoko i Yerusalem to joyiko i limbo pa kerin. Ji ma Yuda joyero wod pa Yosia won Yehoahaz to joketho go kere lunjo bamere.

Kere Yehoahaz ma Yuda

³¹ Yehoahaz obedo kere ma Yuda munyo jaoro piero ario g'adek aka odhumo i Yerusalem ma dwe adek. Yokimere oyido obedo Hamutal nyar Yeremia ma wok i tindi madwoŋ Libina.

³² Go oluwo kite pa kwarere pere, to timo reco ruwaŋ Rwoth.

³³ Dhum pere orumo munyo Farawo Neko ma Misir otero go paka jatwec i Ribila i piny Hamath, to miyo Yuda culo kilo 3,400 ma feza kodi kilo 34 ma zahabu paka misolo.

³⁴ Farawo Neko oketho wod pa Yosia m'ilwoŋo ni Eliakim kere ma Yuda lunjo Yosia aka owiro nyinge ni Yekoyakim. Neko otero Yehoahaz i Misir to tho kenyo.

Kere Yekoyakim ma Yuda

³⁵ Yekoyakim ocoko misolo wok bongi ji marom gi lim pajo, manyalo culo misolo ma kere ma Misir oyido mito.

³⁶ Yekoyakim obedo kere ma Yuda munyo jaoro piero ario g'abic, aka odhumo i Yerusalem ma oro apar g'acel. Yokimere oyido obedo Zebida, nyar Pedaya ma wok i tindi Ruma.

³⁷ Yekoyakim oluwo kite pa kwarere mewin pere, to timo reco kwoŋ Rwoth.