2 Kerin 18 - KITAWO MALEŊ Catholic

Kere Hezekia ma Yuda

¹ I oro mar'adek ma dhum pa wod pa Ela, Hoseya kere ma Isiraili, Hezekia wod pa Ahaz obedo kere ma Yuda,

² munyo jaoro piero ario g'abic aka odhumo i Yerusalem ma oro piero ario g'abuŋwen. Yokimere oyido ilwoŋo ni Abija, nyar Zekaria.

³ Oluwo kite pa kwari mere Daudi, aka otimo gim'osangala Rwoth.

⁴ Onyeko woko kalamo manyakafir, oturo woko sirin ma telin, to toŋo woko cal pa were madhako Asera. Go bende oturo woko thwol ma ywel ma Musa oyido otimo m'ilwoŋo ni Nehusitan, kole cuka ndelo no Joisiraili oyido fodi jowaŋo rigo buban ma miyo go dwoŋ.

⁵ Hezekia oketho geno pere kwoŋ Rwoth, Were pa Isiraili; Yuda k'obedo gi kere man kendo paka go, kwoŋ ma jopen dhumo rigo kosa ma jodhumo rumacen.

⁶ Go obedo g'adieri ri Rwoth aka k'okwero winjo Rwoth, to, oneno nike okuro Or je ma Rwoth oyido omiyo Musa.

⁷ Ameno Rwoth obedo gi go, aka kisi gima go otimo okidho maber. Ogwenyere kwoŋ kere ma Asiria aka okwero tiyo rigo.

⁸ Hezekia okengila Jofilistia, aka onyaga pecin pajo wok kwoŋ cale mathin loyo tundo kwoŋ tindi madwoŋ loyo, kiri gi Gaza kodi adec m'othoko.

⁹ I oro mar'aŋwen ma dhum pa Hezekia, m'oyido obedo oro mar'abirio ma dhum pa kere Hoseya wod pa Ela, kere Salimanesa ma Asiria omonjo Isiraili to cego Samaria.

¹⁰ I oro mar'adek ma cego, Samaria opodho. Me oyido oro mar'aucel ma dhum pa Hezekia, aka oro mar'abuŋwen ma dhum pa Hoseya.

¹¹ Kere ma Asiria otero Joisiraili i Asiria paka jotwec aka oketho i tindi madwoŋ Hala, megi cegin gi malawa Habor iy'adec ma Gozan, aka megi i tindin madongo ma Mediya.

¹² Samaria opodho kwoŋbedo Joisiraili jok'owinjo Rwoth Were pajo, to joturo cikirok ma Rwoth otimo gi jo aka jok'oluwo cik ma ŋeca pa Rwoth, Musa oyido omiyo jo. Jok'onyalo winjo kosa luwo.

Joasiria jotisa Yerusalem

¹³ I oro mar'apar g'aŋwen ma dhum pa kere Hezekia, Senakerib kere ma Asiria omonjo tindin madongo m'otinda ma Yuda to mako.

¹⁴ Hezekia ooro jamikwenda bongi Senakerib m'oyido nitie i Lakis ni, “Atimo gi komo, mondo weyi monjan, aka abino culin gim'inomiti je.” Senakerib odwoko nike Hezekia wodhiri rigo kilo 10,000 ma feza kodi kilo gana acel ma zahabu.

¹⁵ Hezekia odhiro ri Senakerib feza je ma Ot pa Rwoth kodi ma kakan ma ot pa kere.

¹⁶ Hezekia bende ohalo woko zahabu ma thigin ma Ot pa Rwoth kodi zahabu ma go won oyido oumo gine miangin ma thigin, to dhiro ri Senakerib.

¹⁷ Senakerib ooro jolweny madwoŋ wok i Lakis monjo Hezekia i Yerusalem; aka oyido telere gi jodhum pere adek ma malo. Munyo jotundo, jocungo i yo ma jokwoc nangin jotiyo iye, yu fereji ma kelo pi i kidiwa ma malo.

¹⁸ Kenyo jolwoŋo Hezekia, aka jodhum pere adek jokidho romo gi jo; Eliakim wod pa Hilikia m'oyido jatel ma peco pa kere, Sebina jandiko ma kapido, kodi Yowa wod pa Asaf m'oyido jandiki gima timere je.

¹⁹ Acel kwoŋ jodhum ma Asiria owaco rijo ni, “Kere ma Asiria mito ŋeyo gima miyo Hezekia bedo gi miseni ameno.

²⁰ Iparo nike wac kende nyalo tero kabedo pa gilweny kodi meni? Ŋa m'iparo nike bino konyin gwenyirok kwoŋ Asiria?

²¹ Neni, igeno nike kere ma Misir bino konyin, to meno kedi luth m'otur, ma bino cwowo cingi ŋata thenere kwoŋe. Ameno apaka Farawo kere ma Misir nitie ri jono ma jogeno go.”

²² “Kosa winowaci ran nike wigeno Rwoth Were mewin. Obedo sawin pa Rwoth kodi migame pere ma Hezekia onyeko, munyo owaco ri ji ma Yuda gi Yerusalem lamo i migam ma Yerusalem kende.

²³ Onyo biye win, wabedi gi piem i nyingi kere ma Asiria. Abino miyo win kayinin gana ario ka winonwaŋ cwo ma romo ma jonyalo gweyo jo!

²⁴ Wikinyal kiri lweny gi jadhum mathin loyo i Asiria, aka kucel wiparo nike Misir bino dhiro riwin cawilin kodi cwo ma jogweyo kayinin!

²⁵ Kole Rwoth won ama okonyan monjo piny mewin. Rwoth won ama owaco ran nike amonji aka irey woko.”

²⁶ Kenyo Eliakim, Sebina, kodi Yowa jowaco rigo ni, “Jadwoŋ, luw gi wan dhoaramayik. Ikir'iluw gi wan dhohiburu, kwoŋbedo ji ma kor ot je jowinjo.”

²⁷ Go odwoko ni, “Wiparo nike kere ooran waco riwin kodi kere kende gime? Be aluwo bende gi ji ma jobedo i kor ot, ma bende jobino camo ceth pajo to jomadho lac pajo, paka win bende.”

²⁸ Kenyo go oay malo aka okoko i dhohiburu ni, “Winji win gima kere madwoŋ, kere ma Asiria waco riwin!

²⁹ Go gwoko win nike wikiri wiyey Hezekia wowondi win. Go kinyal botho win wok i cingan.

³⁰ Aka wikiri wiyey go wodwoŋi win geno Rwoth. Wikiri wipar nike Rwoth bino konyo win, kosa nike go bino juko jolweny mawan ma Asiria mako tindi madwoŋ me.

³¹ Wikiri wiwinji Hezekia; kole kere ma Asiria waco ni, ‘Tim win siem kodan aka wiwok bongan, kenyo kisi nyatoro bino camo vini pere, kodi nyandere pere, aka kisi nyatoro bino madho pi ma waŋ pere won;

³² cuka anobin t'atero win i lowo ma cale lowo mewin, lowo ma ŋano kodi vini, lowo ma mugat kodi ndelo vini, lowo ma yen oliv kodi mo kic, ŋey wikiri witho to wikwo. Wikiri wiyey Hezekia womiŋi win paro nike Rwoth bino botho win.

³³ Nitie were pa piny moro je m'otieko botho lowo pere wok i cingi kere ma Asiria?

³⁴ Werin ma Hamath kodi Aripad jonitie kune? Werin ma Sefarivayim, Hena, kodi Iva jonitie kune? Jobotho Samaria wok i cingan?

³⁵ Keraŋo ma werin ma piny me je jobotho piny pajo wok i cingan, ma Rwoth ripo botho Yerusalem wok i cingan?’ ”

³⁶ To ji oyido joliŋ aka jok'odwoko go. Kole kere oyido owodho or ni, “Wikiri widwoki go.”

³⁷ Kenyo Eliakim, Sebina, kodi Yowa joyeco nangin pajo i rem, aka jokidho to jokowo ri kere gima jadhum ma Asiria oyido owaco.