2 Kerin 13 - KITAWO MALEŊ Catholic

Kere Yehoahaz ma Isiraili

¹ I oro ma piero ario g'adek ma dhum pa Yowas paka kere ma Yuda, Yehoahaz obedo kere ma Isiraili, aka odhumo i Samaria ma oro apar g'abirio.

² Oluwo tim pa Yerobowam, aka otimo reco kwoŋ Rwoth to miyo Isiraili timo reco, go k'oŋuto weyo tim pere marac.

³ Ameno nge pa Rwoth oliel kwoŋ Isiraili, aka oweyo kere Hazael ma Siria kodi wode Benhadad kikengila Isiraili kisi hongo.

⁴ Kenyo kere Yehoahaz okwayo Rwoth, aka munyo Rwoth oneno nger ma kere ma Siria oyido diyo Joisiraili, odwoko kwayo pere.

⁵ Riameno Rwoth omiyo Joisiraili jatel m'obotho jo wok i cingi Josiria, aka Joisiraili jobedo gi siem paka con.

⁶ To Joisiraili jok'oŋuto reco ma kere Yerobowam omiyo jo timo, to jomedere timo, aka cal pa were madhako Asera odoŋ i Samaria.

⁷ Yehoahaz oyido odoŋ nyaka gi cwo piero abic ma jogwey kayina, cawila apar, kodi cwo 10,000 ma jowotho, kwoŋbedo kere ma Siria oyido oreyo ma jodoŋ to nyono jo paka fukefuke.

⁸ Gigipiny man je ma kere Yehoahaz otimo kodi tim pere ma miseni ondiki i kitawo ma kigana ma mako kwoŋ kerin ma Isiraili.

⁹ Go otho aka oyiki go i Samaria to wode Yehowas lunjo go paka kere.

Kere Yehowas ma Isiraili

¹⁰ I oro ma piero adek g'abirio ma dhum pa kere Yowas ma Yuda, Yehowas obedo kere ma Isiraili, aka odhumo i Samaria ma oro apar g'aucel.

¹¹ Go bende otimo reco kwoŋ Rwoth aka oluwo kite pa kere Yerobowam, m'omiyo Isiraili timo reco.

¹² Gigipiny man je ma Yehowas otimo kodi tim ma miseni i lweny kwoŋ kere Amaziya ma Yuda ondiki i kitawo ma kigana ma mako kwoŋ kerin ma Isiraili.

¹³ Yehowas otho aka oyiki go i kaliel pa kerin i Samaria, to wode Yerobowam mar'ario lunjo go paka kere.

Tho pa Elisa

¹⁴ Jatuci wac Were Elisa two omako matek, aka munyo go cegin tho, kere ma Isiraili okidho bonge wendo rigo to waco ni, “Baba paran, Baba paran! In iŋat'oyido ithielo Isiraili!”

¹⁵ Aka Elisa owaco rigo ni, “Kwany atum abor kodi aserin.” Aka go okwanyo.

¹⁶ Kenyo Elisa owaco rigo ni, “Yikere celo.” Kere otimo ameno aka Elisa oketho cinge kwoŋ cingi kere.

¹⁷ Kenyo kere oluwo wac pa Elisa to yawo dirisa ma ŋiyo Siria. Elisa omiyo go or ni, “Cel asere.” Aka tekin kere celo, Elisa owaco ni, “Ibedo asere pa Rwoth ma bino loyo gine Josiria. Ibino lweny gi Josiria i Afek cuka inokengila jo.”

¹⁸ Kenyo Elisa owaco ri kere nike wokwany aserin m'odoŋ wocel gine piny i lowo. Kere ocelo piny didek kende to weyo.

¹⁹ Elisa omako nge gi kere aka owaco ni, “Oyido iripo celo piny dibic kosa diucel, ŋey ikengila Josiria kicutho; to ibino kikengila jo didek kende.”

²⁰ Elisa otho aka oyiki go. Onyo kisi oro kitipa pa Jomowab oyido jomonjo lowo ma Isiraili.

²¹ Ndelo acel, onen acel kwoŋ kitipin no i kaliel pa jacwo moro, aka ji m'oyido jotiŋo del jobolo i kaliel pa Elisa to joringo woko. Tekin del no geyo cokin pa Elisa, jacwo no kwo pere odwoko to ay malo.

Lweny i dier Isiraili gi Siria

²² Kere Hazael ma Siria odiyo Joisiraili i hongo ma dhum pa Yehoahaz je.

²³ To Rwoth omako gi jo wor kodi wor aka k'oweyo orey jo woko, to okonyo jo ro cikirok pere gi Abraham, Isaka, kodi Yakobo; aka go wiye k'owil gi ji pere.

²⁴ Munyo kere Hazael ma Siria otho, wode Benhadad obedo kere.

²⁵ Kenyo kere Yehowas ma Isiraili okengila Benhadad didek aka omako tindin madongo m'oyido Benhadad omako i hongo ma dhum pa Yehoahaz, ba Yehowas.