2 Kerin 11 - KITAWO MALEŊ Catholic

Kere Athalia ma Yuda

¹ Onyo munyo Athalia yok Ahazia owinjo nike oneki wode, owodho or nike woneki ji ma peco pa kere je.

² To Yehoseba, nyar kere Yoram, aka nyamin Ahazia, okwanyo Yowas wod pa kere Ahazia to kwalo go kwoŋ wote m'oyido icegin neko to ketho go kodi japidi pere i kisika i Ot pa Rwoth ŋey wokiri woneki go.

³ Yehoseba okano jayac i Ot pa Rwoth ma oro aucel munyo Athalia dhumo pa nyamicala.

⁴ To i oro mar'abirio Yehoyada jacway ri Were i wi migam olwoŋo jatel pa jokur ma keri kodi jokur ma cel pa kere aka owaco rijo bino i Ot pa Rwoth, kam'omiyo jo yeyo i kwoŋirok gima go oyido ocano timo. Onyutho jo Yowas wod pa kere Ahazia

⁵ aka omiyo jo or me ni, “Me a gima wiripo timo ka wibino tic i ndelo ma Sabato, acel wiy adek kwoŋ win jowokuri cel pa kere,

⁶ acel wiy adek man jowokuri waŋkac ma Sur aka acel wiy adek man jowokuri waŋkac ma yuŋey jokur man.

⁷ Kitipin ario ma jokitiy i ndelo ma Sabato jowokuri kere i Ot pa Rwoth.

⁸ Wiripo kuro kere Yowas g'abor mewin i cingi win, aka ŋat'ocore cegin gi win woneki.”

⁹ Jotel pa jolweny joluwo gima Yehoyada owaco rijo aka jokelo cwo pajo bonge; meno ma jokitiy i ndelo ma Sabato, kodi meno ma jotiyo i ndelo ma Sabato.

¹⁰ Yehoyada omiyo jotel pa jolweny abore kodi kwote m'oyido obedo apa kere Daudi aka oyido okan i Ot pa Rwoth.

¹¹ Oketho jokur, kisi jacwo g'abor i cinge thoko Ot pa Rwoth kuro kere.

¹² Kenyo Yehoyada otelo Yowas woko, oketho sangaria i wiye, to wodho or ma dhumo paka kere. Kenyo owir Yowas aka onyuthi go paka kere. Ji jogoyo adhoŋ aka jokoko ni, “Yindira kere!”

¹³ Athalia nyamicala owinjo woy pa jokur kodi ji, aka oredo i Ot pa Rwoth, kama ji oyido jocokere iye.

¹⁴ Kenyo munyo go oŋiyo, kere oyido ocungo cegin gi siro i dhiot ma Ot pa Rwoth cungo kwoŋ kwer. Jotel pa jolweny, jokudhi gwara, kodi ji je oyido jokoko gi kisangala ka jokudho gwara. Athalia oyeco nangin pere i rem to koko ni, “Sereko, Sereko!”

¹⁵ Yehoyada oyido k'omito nike woneki Athalia cegin gi Ot pa Rwoth, ameno omiyo jotel pa jolweny cik ni, “Ter win go i dier bol pa jokur, aka neki win ŋat'otemi botho go je.”

¹⁶ Jomako go to jotero go i cel pa kere, aka joneko go kenyo i waŋkac pa Kayina.

Yehoyada ketho wirok

¹⁷ Yehoyada jacway ri Were i wi migam omiyo kere kodi ji timo cikirok gi Rwoth nike jobino bedo ji pa Rwoth, aka go bende otimo cikirok i dier kere kodi ji.

¹⁸ Kenyo ji je jokidho i ot pa Bal to jokedho piny; joŋinyo migame kodi cal je, to joneko Matan jacway ri were i wi migam pa Bal ruwaŋ migame. Yehoyada oketho jokur tic i Ot pa Rwoth,

¹⁹ aka go, jotel pa jolweny, jokur pa kere, kodi jokur ma cel pa kere jokwaŋo kere wok i Ot pa Rwoth kiri i cel pa kere, kareno ji je joluwo jo. Yowas odonjo gi waŋkac pa jokur aka otero kabedo pere i kom pa kere.

²⁰ Ji je oyido jopoŋ gi kisangala, aka tindi madwoŋ oyido okwe, paka Athalia oyido oneki i cel pa kere.

²¹ Yowas obedo kere ma Yuda munyo jaoro abirio.