2 Jokorintho 8 - KITAWO MALEŊ Catholic

Pok manyakristo

¹ Onyo wutmera, wamito wiŋey nema pa Were m'otieko nyuthirok i dier kitipa pa jom'oyeyo ma Makedonia.

² I tem pajo ma loŋo gi teko ma jolimo, kisangala pajo omedere cuka omiyo jobedo gi yomo ma cuny i wodho mic pajo, kada wegi oyido jocandi.

³ Anyutho win ni adieri jopoko gigipiny kweth paka jonyalo; aka ma kalo kiri kenyo. Aka i yenyo pajo wegi,

⁴ jokwayo wan g'amen ni jowolimi silwany ma konyo ji pa Were i Yuda.

⁵ Jokalo kiri kam'onwaŋo wanyalo geno! Marapena wegi jomiyere ri Rwoth; aka rumacen, gi mito pa Were, jomiyere riwan bende.

⁶ Riameno wakwayo Tito, m'ocako tic me, ni womedere gine, aka wokonyi win wicow tic ma ŋono me.

⁷ Paka wimiyere i gimoro je ma winigine: I yeyo, i luwo, kodi niaŋ, iketho kinen kodi i maro wan ameno bende neni win ni wimedere loyo i silwany ma poko bende.

⁸ Akikethi cik moro, to amito ŋeyo ka mar mewin obedo mar'adieri; am'omiyo anyutho win paka joman joketho kinen i miyo kony.

⁹ Kole wiŋeyo nema pa Rwodhiwan Yesu Kristo ni kada go oyido oŋaŋ, olokere jacandi ri bero mewin, ŋey go woloki win jom'oŋaŋ kwoŋ candi pere.

¹⁰ Me a paro m'amiyo win kwoŋ wac no: I oro m'orumo wiŋati witelo poko; aka ki meno kende to bende wiŋati witelo bedo gi mito ma timo ameno.

¹¹ Am'omiyo, medere win gine wicow tic no! Kethi win kinen icowo tic no paka oyido wiketho i timo can mere, aka tim win ameno kodi gima winigine.

¹² Kole ka win gi maro ma miyo mic, Were bino jolo mic mewin cungo kwoŋ gima winitie gine amiya, makiweno kwoŋ gima wingoye gine.

¹³ Wakimiti gonyo joman kareno wayimo kwoŋ win ayino bieto, to wamito thenge je wobedi marom;

¹⁴ to paka pama onyo wimore gi lim, ber ka wikonyo joma jocando gimoro. Aka rumacen, ka wibende wicando gimoro aka jomore gi lim, bende jobino konyo win. Ameno aka thenge je bino bedo marom.

¹⁵ Ato ndiko waco ni, “Ŋat'ocoko lim madit k'odoŋ gi m'oasa dito, aka ŋat'ocoko lim manok k'odoŋ gi m'oasa noko.”

Tito kodi jokwaŋ pere

¹⁶ Wafoyo Were m'oketho i cuny Tito maro ma konyo win paka wakonyo win.

¹⁷ Go oyeyo munyo wakwayo go bino, to ki meno kende; go oyido won bende oyikere am'omiyo go oridho bino bongi win.

¹⁸ Aka wadhiro go kodi omin wan m'omiy dwoŋ swa i kitipa pa jom'oyeyo Kristo je ro tic pere ma fonjo Wac Manyen Maber.

¹⁹ Medo kwoŋ meno, kitipa pa jom'oyeyo oyero go woth gi wan ka wamedere gi tic ma ŋono me ri dwoŋ pa Kristo, gi nyutho paka wan gi maro ma miyo kony.

²⁰ Wagwokere rupiri wakimiti kisigila kiŋunyaŋunya moro bongi ji i tic mawan ma tero mic madwoŋ me.

²¹ Wamiyere timo gim'otire, ki ruwaŋ Rwoth kende, to i waŋ ji bende.

²² Am'omiyo, waoro omin wan no gi jo; obedo ŋata watieko temo ndir mathoth, aka wanwaŋo ni go nigi maro m'oromo ma konyo; aka go ogeno win tektek.

²³ Ma mako kwoŋ Tito, meno jawodhan ma tiyo kodan i konyo win; aka wutmin wan man no jobedo jomikwenda ma jowok i kitipa pa jom'oyeyo aka jokelo ri Kristo dwoŋ.

²⁴ Am'omiyo, nyuthi win jo mar mewin, kodi gim'omiyo wayuma win rijo, ŋey kitipa pa jom'oyeyo je jowoŋey gino.