2 Jokorintho 3 - KITAWO MALEŊ Catholic

Jotic ma Cikirok Manyen

¹ Onyo cale pa wawegi odoko wayumere? Kosa nyalo bedo ni paka joman, onyo wabende wayenyo balwa ma foyo wan riwin kosa ma wok bongi win?

² Kole wiwegi wibedo balwa mawan, m'ondiki i cuny wan, ma dhano je ŋeyo odoko soma.

³ Nenere kamaler ni wibedo balwa ma Kristo won ondiko ma mako kwoŋ tic mawan. Aka k'ondiki gi bwino kwoŋ telin m'orudi, to ondiki gi Cuny Maleŋ pa Were makwo kwoŋ telin ma cuny ji.

⁴ Wawaco gime gi miseni rupiri wanitie gi geno i Were kwoŋ Kristo.

⁵ To ki ni rupiri wawegi wan gi nyalo ma timo kisi gimoro, to nyalo mawan wok bongi Were.

⁶ Go omiyo wanyalo tiyo ri cikirok manyen, ma k'obedo apa Cik m'ondiki, to apa Cuny Maleŋ, rupiri Cik m'ondiki kelo tho, to Cuny miyo kwo.

Dwoŋ manitie i Cikirok Manyen

⁷ To k'inen Cik ma kelo tho, m'ondiki kwoŋ tele m'orudi obino gi dwoŋ m'oasere, ma Joisiraili jok'onyalo como waŋ gin kwoŋ Musa ro pilin ma waŋe, kad'onwaŋo kidho rumo woko,

⁸ onyo dwoŋ ma wok i tic pa Cuny Maleŋ okadhi meno didi?

⁹ K'inen tic m'oyido kelo kwoŋ ji banja obedo gi dwoŋ ameno, onyo tic ma kelo tiro ri ji obedi gi dwoŋ loyo meno didi?

¹⁰ Wanyalo waco ni, rupiri dwoŋ ma pama onyo kalo macon, dwoŋ macon kere onyo orumo woko.

¹¹ Ato k'agima rumo woko obino gi dwoŋ, meno gima yindira cil gi cil nitie gi dwoŋ maloyo.

¹² Am'omiyo paka wanitie gi geno me, wabedo miseni swa.

¹³ Wakical Musa, m'oboyo waŋe gi nanga, ni Joisiraili jowokiri jowoneni pilin ma waŋe ka mojere to leny woko.

¹⁴ Paro pajo adieri oyido othore, rupiri kiri konon ka josoma cikirok macon, nanga ma umo waŋ jo no fodi doŋadoŋa. Nanga no ware woko denge ka dhano ojolo Kristo.

¹⁵ Aka kiri gi pama won ama, ka josoma Cik pa Musa, nanga no fodi umo auma paro pajo.

¹⁶ To ka dhano owire bongi Rwoth aka nyaka nanga no ware woko.

¹⁷ Onyo Rwoth, i luwo me, obedo Cuny; aka kama Cuny pa Rwoth niye, siem bedo kenyo.

¹⁸ Wajoje, onyo, wanyutho dwoŋ pa Rwoth gi waŋ wan ma k'oum; aka dwoŋ no, ma wok bongi Rwoth m'obedo Cuny, loko wan i cal pere, gi dwoŋ ma medere ameda.