2 Jokorintho 2 - KITAWO MALEŊ Catholic

¹ Am'omiyo, aridho paro nike akiri doko abin bongi win ramo cuny win kendo.

² Aka k'aramo cuny win, ŋa man ma d'omiyan kisangala makiweno win won m'atieko ramo cuny win?

³ Andiko riwin balwa aka ŋey k'abino bongi win, ji ma d'omiyan kisangala kiri jowomiyan gut ayino. Kole ageno kwoŋ wijoje nike kisangala paran bedo mewin bende.

⁴ Andiko riwin ma cunyan odwoyere kendo raman, gi pigi waŋan madit, ki ma ramo cuny win, to ma miyo win ŋeyo paka amaro win.

Cwako jakibenga

⁵ Onyo, ka moro obenga, kiram cunyan, to ramo cuny win ayino, ka akitero wac no bor tektek.

⁶ Gir'acula ma ji mathoth kwoŋ win jotieko miyo go won romo.

⁷ Kucel, onyo pama wiripo cwako go gi miyo go miseni, wowey bedo gi gut madwoŋ, to cunye ŋedhere woko.

⁸ Am'omiyo, akwayo win ni winyuthi go mar mewin.

⁹ Kole me am'omiyo andiko riwin balwa no: Onwaŋo amito ŋeyo paka wiciro maber tem no, gi ŋeyo paka ndir je wiyikere winjo fonji paran.

¹⁰ Ka wicwako nyatoro i reco pere, abende acwako go. Kole ka acwako, k'inen adieri ripo acwaki nyatoro, meno acwako go ma bero mewin i waŋ Kristo,

¹¹ ŋey wageŋ Sitan loyo wan gi rieko; ato waŋeyo can pere.

Rembo pa Paulo i Trowa

¹² Medo kwoŋ meno, munyo atundo Trowa kam'akidho tit'iye Wac Manyen Maber mapa Kristo, anwaŋo ni Rwoth oyido oyawo ran royo ma tic kenyo.

¹³ To fodi oyido an gi rembo kwoŋbedo akinyalo nwaŋo omin wan Tito kenyo. Am'omiyo asewila ji ma kenyo t'akidho yu Makedonia.

Loyo lweny i Kristo

¹⁴ To Were wofoy rupiri go noknok telo wan i loyo lweny i Kristo. Were oro wan paka jomikwenda pere ma miyo Kristo woŋeyere ri ji je pa ŋwece kur ma tweyo piny.

¹⁵ Kole wacal ŋwece buban mamit ma Kristo waŋo ri Were ma kidho ri joma ibotho jo kodi joma rwenyo woko.

¹⁶ Ri joma jorwenyo woko, wacal ŋwece ma kelo tho; to ri joma ibotho, wacal ŋwece kur ma kelo kwo. Onyo ŋa ma dinyal tic me?

¹⁷ Wakical jomathoth man, ma jooro mikwenda pa Were ma nwaŋ'iye lim; to rupiri Were ooro wan, waluwo g'adieri ruwaŋ go, paka jotic pa Kristo.