2 Jokorintho 10 - KITAWO MALEŊ Catholic

Paulo lwenyo gi thielo tic pere

¹ An Paulo, agoyo koko riwin; an m'iwaco ni amwol k'anitie gi win, to abedo jamaker riwin ka an bor gi win. Akwayo win gi mwolo kodi ŋono pa Kristo, ni

² wikiri wimiyan abedi jamaker riwin k'abino; kole aŋeyo adieri paka anyalo bedo jamaker mager gi joma joparo ni watiyo g'atoŋa ma piny.

³ Adieri wanitie i piny; to wakilweny paka piny lwenyo.

⁴ Ato gilweny ma waoro k'obedo gilweny manyapiny, t'obedo gilweny pa Were ma dimeni, ma ŋinyo woko cel kada m'oger matek nedi,

⁵ gi kedho woko rageŋ je ma piem, kodi gimoro je ma tiŋere malo aka temo juko rieko pa Were, to mako paro manyadhanodhano je wogiki winjo Kristo.

⁶ Aka ka witieko mwole kicutho, aka wabino yikere miyo tim je ma cay gir'acula.

⁷ Onyo neni win paka gigipiny nitie. Ka moro kwanere paka dhano pa Kristo, meno ber, to go ripo ŋeyo ni wabende wabedo ji pa Kristo paka go.

⁸ Kole angoye giwickwot, kad'atieko yumirok ye gi meni ma Rwoth omiyo wan ma geto yeyo mewin, aka ki ma reyo win woko.

⁹ Akimiti wocale pa amito bwoko win gi balwin paran.

¹⁰ Jomoro jowaco ni, “balwin pa Paulo ger aka diwac mapek, to ka go won nitie gi wan go nyap, aka luwo pere ongoye gimoro!”

¹¹ Joma pameno ripo ŋeyo ni ongoye pokirok i gima wandiko i balwin mawan ka wangoye, kodi gima wabino timo ka wanitie kenyo gi win.

¹² Ato wakitem kwanirok kosa pimirok kodi jomoro ma jokethere tiŋirok malo. Joma wegi jopimere aka joyumere kendi gin meno joma jokiriek.

¹³ To wan, yumirok mawan k'okali kew; bino bedo i kew ma tic ma Were oketho riwan, ma rwako kiri tic mawan riwin iye.

¹⁴ Aka wakikadhi bor gi kew mawan ka wayumere, rupiri win won ama wabino bongi win, munyo wakelo Wac Manyen Maber kwoŋ Kristo.

¹⁵ Am'omiyo wakiyumere gi tic pa joman ayin. Kucel, wageno ni yeyo mewin bino dongo, aka wabino nyalo timo tic madwoŋ maloyo i dier win.

¹⁶ Meno aka wanyalo tito Wac Manyen Maber i piny man ma kalo ka mewin, ma wakiyumere gi tic ma joman ama jotieko timo i ndelo pa dhano man.

¹⁷ Paka ndiko waco, “Ŋata mito yumirok, woyumere i Rwoth.”

¹⁸ Kole k'obedo joma wegi jopakere ma ji yere gi jo, to joma Rwoth won am'oyero ayino ama ji yere gi jo.