1 Yohana 2 - KITAWO MALEŊ Catholic

Kristo jakony mawan

¹ Andiko riwin gime, nyithindho paran, ŋey wikiri witim gimarac, to ka moro otimo gimarac, wanitie gi Yesu Kristo ŋat'otire, ma pido riwan bongi Bamere.

² Go won a cowirok ma miyo icwako reco mawan, to ki reco mawan kende, to reco pa ji je ma piny.

³ Me a gima miyo waridho ni waŋeyo go: Ka wawinjo or pere.

⁴ Ka moro waco ni, aŋeyo go, to kiwinji or pere, meno ŋato jatwodo aka adieri ongoye i go.

⁵ To ŋata winjo wac pere, meno a ŋata mar pere ri Were ocowere kicutho. Me apaka wanyalo ridho ni wakwo i Were:

⁶ Ŋata waco ni go kwo i Were ripo bedo gi tim paka cango apa Yesu Kristo.

Or manyen

⁷ Jowotan m'amaro, or ma andiko riwin me kinyen; obedo or macon, ma witieko bedo gine wok con. Or macon me obedo mikwenda ma witieko winjo.

⁸ To or m'andiko riwin nyen, aka adieri mere nenere i Kristo kodi i win bende, rupiri mudho onyo eye woko aka lero mar'adieri ama pama onyo meny.

⁹ Ŋata ŋoyo ni go nitie i lero, ma to go odak omin, meno fodi nitie i mudho ayino.

¹⁰ Ŋat'omaro nyawote ama nitie i lero, aka ongoye gi gimoro ma miyo go timo gimarac.

¹¹ To ŋat'odak nyawote meno nitie i mudho aka woth'iye, aka kuya kama go com'iye, rupiri mudho otieko kelo rigo thowaŋ.

¹² Nyithindho paran, andiko riwin, rupiri otiek cwako reco mewin ro nyingi Kristo.

¹³ Andiko riwin bacere nan, rupiri wiŋeyo ŋat'otieko bedo wok i cakirok. Andiko riwin, soye ma nyaka wiay, rupiri witieko loyo jwogi, Ŋatarac. Andiko riwin nyithindho, rupiri wiŋeyo Were Bawan.

¹⁴ Andiko riwin, bacere ji, rupiri wiŋeyo go m'otieko bedo wok i cakirok. Andiko riwin, soye ma nyaka ay, rupiri winitie gi meni; wac pa Were bedo i win, aka witieko loyo Jaraco.

¹⁵ Wikiri wimar piny kosa gimoro je ma piny. Ka moro omaro piny meno mar pere ri Bawan ongoye.

¹⁶ Ato gimoro je ma piny paka awanya marac ma del, kodi awanya ma waŋ jo, kodi pakirok kwoŋbedo gima dhano nitie gine kosa m'otimo, k'obedo apa Bawan, t'obedo apa piny ayino.

¹⁷ Piny kodi kisangala mere je rumo; to joma timo gima Were mito jobino kwo cil gi cil.

Jakwor pa Kristo

¹⁸ Nyithindho paran, kole me ndir ma gike; ato witieko winjo paka Jakwor pa Kristo bino; gunyo ni jokwor pa Kristo kweth jotieko nenere, aka meno apaka waŋeyo ni gike nicegin.

¹⁹ Adieri ji me oyido jokiripi i kweth mawan, am'omiyo joweyo wan; bedi joripo i kweth mawan, di jobedo gi wan, to joeye ŋey wonenere kamaler ni ongoye moro kwoŋ jo ma iy'adieri oyido joripo i kweth mawan.

²⁰ To Kristo otieko wiro kwoŋ win mo ma Cuny Maleŋ am'omiyo wiŋeyo adieri.

²¹ Riameno andiko riwin, ki ni rupiri wikuya adieri; to rupiri wiŋeyo, aka bende wiŋeyo ni ongoye twodo ma wok kwoŋ adieri.

²² Onyo, ŋa ma jatwodo? Jatwodo meno ŋata waco ni Yesu k'obedo Kristo. Aka ŋato jakwor pa Kristo, rupiri go kwero Were Bawan gi Wode.

²³ Kole ŋata kwero Wod Were meno kwero Bamere bende; odoko ŋata jolo Wod Were meno jolo Bamere bende.

²⁴ Am'omiyo, ridhi win maber kano i cuny win mikwenda ma wiwinjo wok con. K'agima wiwinjo wok con odoŋ i cuny win, meno ndir je wibino doŋ gi wode kodi Bamere i kwo mewin.

²⁵ Aka me a gima Kristo won gipi ociko miyo wan: Manago kwo makirum.

²⁶ Andiko riwin gime ma mako kwoŋ joma jotemo wondo win.

²⁷ To ma mako kwoŋ win, Kristo otieko wiro kwoŋ win mo ma Cuny Maleŋ pere. Ka tekin Cuny Maleŋ pere nitie i win, odoko wikiyeny moro wofonji win. Kole wir ma Cuny no won fonjo win kwoŋ gimoro je, aka gima go fonjo obedo adieri makiweno twodo, onyo doŋ win i Kristo.

²⁸ Ey, nyithindho paran, nere win i go, ŋey wibedi gi miseni madwoŋ ka go omenyere aka wik'opondi rigo ro wickwot i Ndelo ma go ladwok'iye.

²⁹ Wiŋeyo ni Kristo obedo tiro; riameno wiŋeyo ni moro je ma timo gim'otire meno go nyathi pa Were.