1 Timothe 3 - KITAWO MALEŊ Catholic

Jotel i kitipa pa jom'oyeyo

¹ Me wac m'otire: Ka nyatoro wanya bedo jatel ma kitipa pa jom'oyeyo, go wanya tic maber swa.

² Jatel ripo bedo dhano m'ongoye gi komo; go ripo bedo jadhako acel, m'oŋeyo kuro nge, ma niaŋ maber, ma timo gi dwoŋ, m'oŋeyo jolo ji peco pere; go ripo bedo ni nyalo fonjo maber.

³ Kiripi bedo jamero kosa jagero, to wobedi ŋata mwol ma ki jadhaw; aka wokiri womar pesa.

⁴ Go ripo bedo ŋata nyalo tic ma peco pere maber, to fonjo nyithindho pere mwolo gi miyo ji dwoŋ.

⁵ Ato ka dhano kinyal tic ma peco pere won, onyali nedi kuro kitipa pa jom'oyeyo pa Were?

⁶ Go wokiri wobedi dhano ma nyaka owire manyen i yeyo, ameno go nyalo kwoto gi pakirok t'ithumo rigo banja, paka othum ri Jwogi.

⁷ Go ripo bedo dhano ma ji ma woko jomiyo dwoŋ, aka nyaka k'ocay go to podho i bwo pa Jwogi.

Jokony i kitipa pa jom'oyeyo

⁸ Jokony ma kitipa pa jom'oyeyo bende joripo bedo joma kiti jo otire, ma ki jotwodo, jokiri jowobedi jomero kosa joma wor i lim;

⁹ joripo cwire kwoŋ nyaliŋliŋ ma yeyo kodi paro m'otire.

¹⁰ Iripo temo jo kutho, aka ka jotire, nyaka jonyalo tic paka jokony.

¹¹ Mon pajo bende joripo bedo ji ma kiti gin otire, ma jokiwerawera gi luwo kicar; joripo bedo jom'oŋeyo kuro nge kendo joma genere i gimoro je.

¹² Jakony ma kitipa pa jom'oyeyo ripo bedo jadhako acel kende, aka jo kodi cege joripo kuro nyithindho kodi peco pajo maber.

¹³ Kole joma timo tic maber jolimo kacungo maber aka jonyalo luwo gi miseni kwoŋ yeyo manitie i Kristo Yesu.

Nyaliŋliŋ madwoŋ

¹⁴ Paka andiko balwa me rin, ageno bino nenin mayot.

¹⁵ To k'agalo, balwa me bino miyin iŋey kite ma waripo bedo gine i peco pa Were, m'obedo kitipa pa jom'oyeyo pa Were makwo, siro kendo cakirok p'adier.

¹⁶ M'ongoye kiganagana, nyaliŋliŋ ma yeyo mawan dwoŋ: Go onenere i cal pa dhano, Cuny Maleŋ onyutho paka go otire, aka jomalaika joneno go. Ofonji kwoŋ go i piny je, oyey go i piny gipi, aka oter go i polo.