1 Timothe 2 - KITAWO MALEŊ Catholic

Lamo i kitipa pa jom'oyeyo

¹ Am'omiyo marapena, aoro win ywakirok ri Were, kwayo, poyo joman i kwayo, gi foyo Were ri ji je.

² Kwayo ri kerin kodi joman je ma jonitie iy'adhum, ŋey wabedi i kwo m'okwe ma siem, munyo walworo Were aka wabedo gi kite ma ripo.

³ Gime ber aka sangala Were Jaboth mawan,

⁴ ma mito ni ji je jowobothi to jolimo ŋeyo adieri.

⁵ Kole Were nitie acel, aka nitie ŋat'acel ma riwo Were gi ji, jal m'ilwoŋo ni Kristo Yesu,

⁶ m'omiyere ma botho ji je. Meno obedo gir'anena, i hongo m'otire, ni Were mito ji je jowobothi.

⁷ Me am'omiyo odiman bedo jamoor kendo jatiti wac ri Jopath, fonjo mikwenda ma mako kwoŋ yeyo kodi adieri. (Akitwodi, to, awaco gir'adieri!)

⁸ Am'omiyo ayenyo ni kamoro je ji jowokway, ma jomiyere ri Were aka jotiŋo cingi gin malo i kwayo, m'ongoye nge kosa kiŋunyaŋunya.

⁹ Kendo amito ni mon joworuki nangin mabeyo ma ripo, gi gwokirok; ma jok'ocowo paro pajo i kedo wic ma yodirok, kosa jaŋo kwoŋ gin thiwino ma zahabu kosa atege ma welo kosa ruk ma welo ma malo.

¹⁰ To jowobedi gi tim mabeyo paka ripo gi mon ma jowaco ni jolworo Were.

¹¹ Mon joripo winjo fonji munyo jokudere gi mwolo.

¹² Akiyey mon fonjo kosa bedo gi meni kwoŋ cwo, joripo liŋ.

¹³ Kole otel cweyo Adam, aka nyaka ocwey Eva,

¹⁴ Adam k'amowondi, dhako am'owondi to turo cik pa Were.

¹⁵ To kad'ameno, dhako bino limo both i nywolo nyithindho, ka go ocwire i yeyo kodi mar gi leŋo, kodi kurok maber.