1 Samwiri 3 - KITAWO MALEŊ Catholic

Lwoŋo pa Samwiri

¹ I hongo no munyo jayac Samwiri tiyo ri Rwoth kareno Eli ama nyutho go gir'atima, wac ma wok bongi Rwoth oyido nok, aka kiri menyirok pa Rwoth bende oyido k'obedo gima kisi ndelo.

² Wor acel, Eli m'oyido waŋe onyo kinen m'otire nindo i kisika pere,

³ Samwiri bende oyido nindo i Kabedo Maleŋ kam'oyido Kakan Maleŋ ma Cikirok pa Rwoth nitie iye. Mafodi ŋamba k'oriedo, munyo tala pa Rwoth fodi k'otho,

⁴ Rwoth olwoŋo Samwiri, “Samwiri! Samwiri!” To Samwiri dwoko ni, “An e!”

⁵ To go ay aka oringo bongi Eli to waco ni, “An e! Kole ilwoŋan” To Eli dwoko go ni, “Akilwoŋin gik inindi.” Ameno to Samwiri gik nindo.

⁶ Rwoth doko olwoŋo Samwiri madirio, aka go oay to kidho bongi Eli to waco ni, “An e kole ilwoŋan.” Eli odwoko ni, “Akilwoŋin, wodan, kidhi inindi.”

⁷ Samwiri onwaŋo fodi okuya ni oyido obedo Rwoth, rupiri Rwoth oyido fodi k'oluwo ye gi go.

⁸ Rwoth doko olwoŋo Samwiri ma didek, aka go oay to kidho bongi Eli to waco ni, “An e, kole ilwoŋan.” Kenyo Eli oniaŋ ni Rwoth ama lwoŋo jayac no.

⁹ Ameno Eli owaco rigo ni, “Kidhi inindi, aka ka go doko olwoŋin, wac ni, ‘Luw Rwoth kole ŋeca perin winjo.’ ” Ameno Samwiri ogik nindo.

¹⁰ To Rwoth bino aka ocungo kenyo to lwoŋo go paka con mere ni, “Samwiri! Samwiri” To Samwiri dwoko ni, “Luw Rwoth, kole ŋeca perin winjo.”

¹¹ Kenyo Rwoth owaco ri Samwiri ni, “Neni, acegin timo gimarac swa ri Joisiraili ma nyatoro m'owinji je bino bwok.

¹² I ndelo no abino kelo ri ot pa Eli gir'acula m'atieko luwo kwoŋe, wok i cakirok tundo i gike.

¹³ Atieko waco rigo ni alamiyo peco pere gir'acula makicutho ro reco ma go oŋeyo; rupiri wot go joluwo kwoŋan kicar.

¹⁴ Riameno akwoŋo Eli gi peco pere ni ongoye mic kosa cowirok ma bino lwoko woko reco me cil gi cil.”

¹⁵ Samwiri onindo kiri odikin to ay to yawo thigin ma Ot pa Rwoth. Lworo omako go tito ri Eli kwoŋ menyirok me.

¹⁶ Eli to lwoŋo go to waco rigo ni, “Samwiri, wodan!” To go dwoko ni, “Ey jadwoŋ.”

¹⁷ Eli to penjo go ni, “Rwoth owaco rin aŋo? Ikir'ikan gimoro je kwoŋan. Were bino miyin gir'acula matek k'ikiwaco ran gimoro je ma go owaco rin.”

¹⁸ Ameno Samwiri owaco rigo gimoro je m'ongoye gima go okano. To Eli waco ni, “Go obedo Rwoth weyi go wotim gimaber rigo.”

¹⁹ Munyo Samwiri dongo, Rwoth oyido nigi go aka omiyo gimoro je ma go owaco tundo i kare.

²⁰ Ameno ji je ma piny Isiraili, wok i witum ma piny tundo i man, joŋeyo ni Samwiri oyido obedo jatuci wac Were.

²¹ Rwoth omedere nyuthirok i Silo kama go omenyere to luwo iye gi Samwiri. Aka kisi ka Samwiri oluwo, Joisiraili je jowinjo go.