1 Samwiri 29 - KITAWO MALEŊ Catholic

Jolweny pa Jofilistia jokwero kony pa Daudi

¹ Jolweny pa Jofilistia jocokere i tindi Afek, aka jolweny pa Joisiraili jocokere milelo i tindi Yezirel.

² Kerin abic pa Jofilistia joŋanjo gi jolweny pajo i kitipin ma miya gi ganin; aka Daudi gi cwo pere joŋaŋo yu dieŋey jo gi kere Akis.

³ Jomituka jolweny pa Jofilistia joneno Daudi gi cwo pere to jopenjo ni, “Joebulaniya me jotimo aŋo ka?” Kere Akis odwoko jomituka jolweny pa Jofilistia ni, “Me Daudi ŋeca pa Saulo, kere pa Joisiraili. Go otieko bedo kodan ma hongo malac tundo gunyo ni; aka fodi akinwaŋo kwoŋe raco moro je cuka go bin bongan.”

⁴ Jomituka jolweny pa Jofilistia jomako nge gi Akis to waco rigo dhiro Daudi ogik i tindi ma Akis omiyo go; aka jokwero Daudi kidho i lweny gi jo rupiri joparo ni go bino lokirok jakwor pajo to neko jo ma mito dwoŋo Saulo.

⁵ Jomedo waco ni, “Me ki Daudi ma mon jowero kwoŋe to jomielo ni, ‘Saulo oneko ganin pere, aka Daudi piero ganin pere?’ ”

⁶ Akis olwoŋo Daudi bonge to waco rigo ni, “Akwoŋere rin i nyingi Rwoth makwo ni, oyido ibedo ran jar'adieri, aka oyido awinjo maber yeyin kidho kodan i lweny. Ongoye komo m'atieko nwaŋo kwoŋin wok cuka ibin bongan. To kerin man jokiwinji maber kodin.

⁷ Riameno dok i siem, aka Ikir'itim gima bino miyo jo winjo marac.”

⁸ Daudi openjo Akis ni, “Aŋo marac m'atimo jadwoŋ? K'inen iwaco ni fodi ikinwaŋo komo i an wok cuka acak tiyo rin, t'onyo raŋo akir'akadhi kodin jadwoŋ paran kere, lweny gi jokwor perin?”

⁹ Akis odwoko Daudi ni, “Ri an won aŋeyo paka ingoye g'apuse ruwaŋan pa malaika pa Were; to kad'ameno jomituka jolweny pa Jofilistia man jowaco ni, ‘Ikilakidho gi wan i lweny.’

¹⁰ Riameno dikin odikin in gi cwo perin ma wiringo wok bongi Saulo to wibino bongan; wiripo ay odikin swa to wikadho mafodi waŋceŋ k'owoki.”

¹¹ Ameno Daudi gi cwo pere joay yawere odikin to jogik Filistia, aka Jofilistia jomedere kadho i Yezirel.