1 Samwiri 22 - KITAWO MALEŊ Catholic

Tho pa jocway ri Were i wi migam

¹ Daudi oringo to kidho donjo i ŋungu tele cegin gi tindi Adulam. Munyo wutmin go gi ji je ma ot pa bamere jowinjo ni go nitie kenyo, jobino to joriwere gi go.

² Aka ŋatimoro je m'oyido nitie i kidamba, kisi ŋati m'oyido nitie i teko, kisi ŋati m'oyido nitie gi banja, aka kisi ŋati m'oyido nitie gi gwayo i cunye je jocokere bongi go; aka go olokere jatel pajo.

³ Daudi omedere wok kenyo to kidho i tindi Mizipa iy'adec ma Mowab aka owaco ri kere ma Mowab ni, “Mondo akwayin, weyi baba gi mama jowobin jobedi ka tundo kam'anoŋey gima Were kidho timo ran.”

⁴ Ameno Daudi oweyo jonywol pere Mowab, aka jobedo kenyo i hongo je ma Daudi oyido pondo i ŋungu tele.

⁵ Kenyo to jatuci wac Were Gad bino to waco ri Daudi ni, “Ikir'idoŋ i ŋungu tele ka; ngoye ka, aka kadhi i lowo ma Yuda.” Ameno to Daudi ngoye, aka okadho i lul ma Hereth.

⁶ Ndelo acel, Saulo oyido obedo i tipo i tiendi yath m'ilwoŋo ni tarmarisk i wi riete, aka oyido otiŋo toŋ pere i cinge; aka jolweny pere oyido jocungo jothoko go. T'iwaco rigo ni onwaŋ kama Daudi nitie iye.

⁷ Saulo owaco ri jolweny pere m'oyido jocungo thoko go ni, “Winji win, cwo ma nono pa Benyamin! Wiparo ni Daudi janono pa Yuda me bende omiy win ndelin gi ndelo vini, to miyo win bedo jomituka jolweny pere?

⁸ Meno ay'atoŋa m'omiyo wicamo ran sereko? Ongoye kada ŋat'acel kwoŋ win m'owaco ran ni wodan ma an won anywolo oriwere gi wod pa Yese. Ongoye kwoŋ win ŋati m'odewo waco ran ni Daudi, acel kwoŋ cwo paran won rango nger ma nekan, aka ni kiri wodan omiyo go meni ma nekan.”

⁹ Doweg Jaedom oyido ocungo kenyo gi jolweny pa Saulo to dwoko ni, “Aneno Daudi munyo okidho Nob bongi Ahimelek wod pa Ahitub.

¹⁰ Ahimelek openjo ri Daudi Rwoth gima Daudi otim to miyo go cemo moro g'abor pa Goliath Jafilistia.”

¹¹ Ameno kere Saulo ooro nyatoro lwoŋo Ahimelek gi wade pere je m'oyido jobedo jocway ri Were i wi migam, aka jobino bongi Saulo.

¹² Saulo owaco ri Ahimelek ni, “Winji Ahimelek.” Ahimelek odwoko ni, “An e jadwoŋ.”

¹³ Saulo openjo Ahimelek ni, “Raŋo in gi Daudi wicamo ran sereko? Raŋo imiyo go cemo g'abor, aka ipenjo Were gima go otim? Onyo pama go owire ran aka rango nger ma nekan!”

¹⁴ To Ahimelek dwoko ni, “Ŋa kwoŋ ŋecin perin je ma jar'adieri paka Daudi, go m'onywomo kiri nyarin, aka jatel pa jolweny perin, aka ji ma ot perin je joworo go!

¹⁵ Adieri apenjo rigo Were gir'atima, to meno k'obedo ma dicel an penjo rigo Were gir'atima. To ri camo rin sereko, jadwoŋ ikir'icwoki dhokan kosa ŋatimoro je ma peco paran. Ongoye gim'aŋeyo ma mako kwoŋ gime!”

¹⁶ Kere owaco ri Ahimelek ni, “Ahimelek in gi wade perin je wiripo tho.”

¹⁷ To Saulo waco ri jolweny pere m'oyido jocungo cegin bonge ni, “Neki win jocway i wi migam pa Rwoth! Joriwere gi Daudi aka jok'owaco ran ni go oringo, kiri munyo oyido joŋeyo con.” To jolweny pere jokwero tiŋo cingi jo malo neko jocway i wi migam pa Rwoth.

¹⁸ Ameno Saulo owaco ri Doweg ni, “Neki jo.” To Doweg neko joje. I ndelo no Doweg oneko jocway ri Were i wi migam piero aboro g'abic m'oyido joruko law pa jocway ri Were i wi migam.

¹⁹ Saulo doko to wodho or t'ineko ji je ma tindi Nob; tindi pa jocway ri Were i wi migam: Cwo, mon, nyithindho, nyithindho maŋic, dhok, punde, kodi rombo je oneki.

²⁰ To Abiatha, acel kwoŋ wot Ahimelek okwale aka okidho to riwere gi Daudi.

²¹ Abiatha owaco ri Daudi nger ma Saulo othumo iye jocway ri Were i wi migam.

²² Daudi owaco rigo ni, “Munyo aneno Doweg ndelo no Nob, aŋeyo ni go oyido lawaco ri Saulo.

²³ Bedi kodan ka Ikir'ilwor. Saulo mito nekan kodi in je, to ongoye gima latimere rin k'ibedo bongan.”