1 Samwiri 18 - KITAWO MALEŊ Catholic

¹ Munyo Daudi otieko luwo gi Saulo, wod pa Saulo, Yonathan omako mere gi Daudi, aka omaro Daudi paka go won omaro kwo pere.

² To Saulo k'oyeyo Daudi dok bongi bamere wok ndelo no.

³ Yonathan omaro Daudi swa to miyo jo kwoŋirok bedo mere cil gi cil.

⁴ Yonathan olunyo woko law m'oyido oruko to miyo Daudi, gi lweny pere, kiri toŋ, kwot, gi thol ma piere to miyo Daudi.

⁵ Kisi tic ma Saulo ooro go je, Daudi otimo maber aka Saulo oyero go bedo jasirikale madwoŋ. Gime osangala ji je kodi jolweny man madongo.

Saulo mako nyeko gi Daudi

⁶ Munyo Daudi dwoko, munyo otieko neko Goliath, mon jowok i kisi tindi pa Joisiraili bino romo gi kere Saulo; aka oyido jowero gi kisangala, jomielo, jogoyo tongol, aka joyengo seke.

⁷ Mon jofore ka jowero ni, “Saulo oneko ganin, to Daudi neko gana dipar.”

⁸ Saulo owinjo marac to mako nge, aka k'owinjo maber. Go owaco ni, “Ri Daudi jokwano gana dipar, aka ran jokwano ganin kende. Go ama jolaketho kere ma luwo?”

⁹ Ameno won wok ndelo no Saulo ocako neno Daudi gi waŋe marac.

¹⁰ I ndelo ma luwo mere, Were odhiro cuny m'ocido to monjo Saulo; to Saulo ero luwo pa ŋata neko omako. Daudi oyido nitie goyo tongol pere paka kisi ndelo, aka Saulo oyido omako toŋ pere.

¹¹ Saulo owaco i cunye ni, “Alabolo toŋ me to cwowo go i kor ot.” Saulo to bolo toŋ dirio ni woneki Daudi to Daudi leŋo go.

¹² Saulo obedo gi lworo ri Daudi rupiri Rwoth oyido nigi Daudi aka ojwango go.

¹³ Ameno Saulo odhiro Daudi gicen to oro go telo jolweny 1,000; aka Daudi bende otelo jo i lweny.

¹⁴ Daudi oyido timo maber i kisi gimoro rupiri Rwoth oyido nigi go.

¹⁵ Munyo Saulo oneno ni Daudi oyido timo kisi gimoro maber, lworo pere ri Daudi omedere.

¹⁶ To kisi nyatoro i Yuda gi Isiraili omaro Daudi rupiri go am'oyido telo jo kidho i lweny.

Daudi nywomo nyar Saulo

¹⁷ Ndelo acel, Saulo owaco ri Daudi ni, “K'inobedi jalweny ma jamisen, aka jar'adieri, nyaran Merab ee; abino miyin go bedo cegin.” Saulo oyido paro ni i nger me go won oyido k'oneki Daudi; kwanyo woko Jofilistia ama jonek go.

¹⁸ Daudi odwoko Saulo ni, “An aŋa gi peco pa baba; ma ripo abedi or kere gipi!”

¹⁹ To munyo hongo otundo ma Daudi oyido ripo ni wonywom Merab, Saulo omiyo Adiriel ma wok Mehola Merab, i kabedo pa Daudi.

²⁰ I hongo acel no, nyar Saulo m'ilwoŋo ni Mikal oyido jomitere gi Daudi. Saulo owinjo maber munyo nyatoro moro owaco rigo.

²¹ Saulo oyeyo Daudi nywomo nyare Mikal nyaka woor Mikal ma ciko Daudi to Jofilistia joneko go. Ameno to Saulo doko waco ri Daudi ni, “Ibino bedo oran.”

²² Saulo omiyo ŋecin pere cik ni, “Weci win gi Daudi manyaliŋliŋ wiwaci rigo ni, ‘Neni, kere winjo maber kodin, aka kiri wan je wamarin; onyo pama bedi or kere.’ ”

²³ Ŋecin pa kere jowaco ri Daudi, to go dwoko jo ni, “Wiparo ni obedo gimathin bedo or kere, ma bende wineno paka ajacandi, aka asisiri?”

²⁴ Ŋecin pa Saulo jokowo rigo gima Daudi owaco.

²⁵ Saulo ooro ŋecin pere waco ri Daudi ni, “Kere kimiti wok bongin gigipiny ma nywom, kwanyo woko go mito wok bongin gima nyutho ni Jofilistia miya acel jotho; paka culo kwor kwoŋ jokwor pere.” Me apaka Saulo oyido paro ni Jofilistia jolaneko Daudi.

²⁶ Ŋecin pa Saulo jowaco ri Daudi gima Saulo owaco aka Daudi owinjo maber bedo or kere. Ameno mafodi ndelo k'orumo,

²⁷ Daudi gi cwo pere jokidho aka joneko Jofilistia miya acel. Daudi okwano ri Saulo gima nyutho ni Jofilistia jotho, ŋey go wobedi or kere. Ameno Saulo omiyo Daudi nyare Mikal bedo cege.

²⁸ To munyo Saulo oneno, oŋeyo ni Rwoth oyido nitie gi Daudi, aka kiri Joisiraili gi nyar Saulo Mikal je oyido jomaro go.

²⁹ Gime omiyo Saulo lworo Daudi, aka Daudi omedere bedo jakwor pere.

³⁰ Jomituka jolweny pa Jofilistia oyido jobino lweny gi Joisiraili, aka i kisi lweny Daudi oyido timo maber loyo jolweny pa Saulo madongo je. I cowe mere omiyo nyingi go dwoŋ.