1 Samwiri 13 - KITAWO MALEŊ Catholic

Lweny kodi Jofilistia

¹ Munyo iloko Saulo kere, oro pere oyido k'oŋeyere, aka go odhumo Isiraili ma hongo macek.

² Saulo oyero cwo 3,000 aka odhiro ma jodoŋ dok peco; aka cwo 2,000 kwoŋ jono jodoŋ gi go Mikmas kodi i piny matendere tendere Bethel, to oro cwo 1,000 gi Wode Yonathan kidho Gibeya, iy'adec pa Benyamin.

³ Yonathan okengila jomituka jolweny pa Jofilistia m'oyido jonitie i Geba; to Jofilistia je jowinjo gime. Saulo ooro jomikwenda kudho gwara i piny Isiraili paka rom lwoŋo Joebulaniya kidho i lweny.

⁴ Munyo Joisiraili jowinjo ni Saulo okengila jamituka mapa jolweny pa Jofilistia, aka ni Joisiraili oyido jolokere marac ruwaŋ Jofilistia, joyeyo lwoŋo kidho riwirok gi Saulo i Gilgal.

⁵ To Jofilistia jocokere lweny gi Joisiraili; oyido jonitie gi cawila ma lweny 30,000 cwo ma jogweyo kayina 1,000 kodi jolweny kweth. Jokidho to jocokere Mikmas, yuthenge ma wok ceŋ ma Bethaven.

⁶ Jofilistia jomonjo Joisiraili matek, to jomiyo jo lworo. Joisiraili man jopondo i ŋungin, i kerin, i tiendi gote, i buce, kodi i jwombe;

⁷ Aka jomegi joŋado malawa Yordan to jopor iy'adec ma Gad kodi Giliad. Saulo oyido fodi nitie i Gilgal, aka ji m'oyido jonitie gi go jokirin gi lworo.

⁸ Saulo okuro Samwiri i Gilgal ma ndelo abirio paka Samwiri oyido owaco rigo, to Samwiri oyido fodi k'obino. To ji jocako kedhirok weyo Saulo.

⁹ To Saulo waco ni, “Keli ran win cowirok awaŋa, kodi cowirok ma siem.” To go miyo cowirok awaŋa.

¹⁰ To munyo nyaka go cegin cowo miyo cowirok awaŋa, Samwiri otundo. Saulo okidho to jolo Samwiri.

¹¹ Samwiri openjo go ni, “Aŋo m'itimo?” Saulo odwoko ni, “Munyo aneno ji jokedhere kwoŋan, aka oyido fodi ikibino i ndelo m'oyido iciko; aka kiri Jofilistia oyido jocokere Mikmas,

¹² t'awaco ni, ‘Jofilistia jokidho monjan i Gilgal ka aka fodi akikwayo silwany wok bongi Rwoth.’ Ameno aromere miyo cowirok an won.”

¹³ Samwiri odwoko Saulo ni, “Itimo gimiŋo; ikiluwo or pa Rwoth Were perin, ma go omiyin; bedi nende iluw or pa Rwoth, dinyo go oweyo nyikwayin to jodhumo Isiraili cil gi cil.

¹⁴ To paka ikiluwo or pere, dhum perin k'omedere. Rwoth otieko rango jacwo ma kacunye; aka oyero go dhumo ji pere.”

¹⁵ Samwiri oay i Gilgal to kidho Gibeya iy'adec pa Benyamin. To Saulo kwano jolweny pere m'oyido jonitie bonge to nwaŋo ni joromo cwo 600.

Lweny i dier jolweny pa Jofilistia kodi jolweny pa Yonathan

¹⁶ Saulo, gi wode Yonathan, kodi cwo m'oyido jonitie gi jo jocokere Geba iy'adec pa Benyamin; to Jofilistia jocokere Mikmas.

¹⁷ Jolweny pa Jofilistia joay kam'oyido jocokere iye to jokidho monjo Joisiraili i kitipin adek; kitipa acel jokidho yo Ofira iy'adec ma Suwal,

¹⁸ kitipa man jokidho yo Bethhoron, to man jokidho yo got m'oŋiyere kodi milelo ma Zeboyim yuthim.

¹⁹ I hongo no oyido jothedhi gigipiny jongoye i piny Isiraili gipi rupiri Jofilistia oyido jokimiti Joebulaniya oro ndijo no ma cwogo abor gi toŋ.

²⁰ To oyido ka Joisiraili jomito pako kwe dhok, kosa kwe acingi, kosa le, kosa ringin pajo, oyido joloro to jokidho bongi Jofilistia.

²¹ Pako kwe dhok gi kwe acingi oyido penzi acel mathin, aka pako le gi yiko pingo oyido penzi ario.

²² Ameno i ndelo ma lweny, jolweny pa Joisiraili oyido ongoye manitie kodi toŋ kosa toŋ kwanyo woko Saulo kodi wode Yonathan.

²³ Jofilistia jooro kitipa pa jolweny pajo kuro ger ma Mikmas.