1 Samwiri 1 - KITAWO MALEŊ Catholic

Elikana gi peco pere i Silo

¹ Oyido nitie jal moro m'ilwoŋo ni Elikana m'oyido bedo Rama i piny matendere tendere Efrayim. Go oyido obedo wod pa Yeroham aka nyakwar Elihu ma jowok i peco pa Tohu i nono pa Zuf Jaefrayim.

² Elikana onwaŋo nitie gi mon ario nyingi jo Hana kodi Penina. Penina onwaŋo nitie gi nyithindho aka Hana ongoye gine.

³ Kisi oro Elikana gi peco pere oyido jokidho Silo lamo Rwoth Were gi miyo go cowirok kam'oyido wot Eli, Hofin gi Finehas oyido jotiyo paka jocway ri Were i wi migam.

⁴ Kisi hongo k'oyido Elikana cowere, oyido miyo nyithindho pere gi cege Penina adec ma cowirok.

⁵ Go bende oyido miyo Hana adec ma cowirok manyakare kwoŋbedo onwaŋo omaro go swa makada nende Rwoth oyido k'omiyo go nyithindho.

⁶ To Penina nyek Hana oyido omo iye aka miyo go nge kwoŋbedo go oyido ongoye gi nyithindho.

⁷ Kisi oro k'onwaŋo jokidho kwayo i Ot pa Rwoth, Penina oyido yetayeta Hana. Gime omiyo go ywak aka k'onyalo kiri cemo.

⁸ Ameno to Elikana cwore penjo go ni, “Raŋo ikicem? Raŋo cunyin ramin? Initie kodan; akiloy rin yac apar?”

Kwayo pa Hana

⁹ Ndelo acel munyo jotieko cemo gi medho i Ot pa Rwoth Silo, Hana oay malo. Eli jacway ri Were i wi migam oyido omako kabedo pere i dhiot pa Rwoth.

¹⁰ Rembo opoŋ i cuny Hana, to cako kwayo Rwoth.

¹¹ Go otimo cikirok me, “Rwoth Were pa lwak jolweny, nenan, ŋeca perin! Neni teko paran aka ipoyan! Wiyin wokiri wowil kodan! K'inomiyan nyathi majayac, aciko miyin go kicutho aka akibino lielo ye wiye.”

¹² Hana omedere kwayo Rwoth hongo malac, to Eli neno dhok go.

¹³ Go okwayo gi cunye kada dhoke bende oyido yawere ongoye gim'oyido winjere. Gime omiyo Eli paro ni go onwaŋo omer.

¹⁴ To Eli wac rigo ni, “Ilamero kiri keraŋo? Kwany woko mero perin ka.”

¹⁵ Go odwoko ni, “Be! Jadwoŋ, akimer! Ongoye gim'atieko madho! Anitie i litho aka awok konjo ri Rwoth.

¹⁶ Mondo ikir'ipar ni ajakidakana, awok kwayo i nger no kwoŋbedo arembo odoko cunyan raman.”

¹⁷ Eli owaco rigo ni, “Kadhi i siem, weyi Rwoth Were pa Joisiraili omiyin gim'ikwayo go.”

¹⁸ Go odwoko ni, “Noknok ipoyan.” Odok to cako cemo aka nge doko k'omako go.

Nywolirok pa Samwiri

¹⁹ Yawere odikin joay, jolamo Rwoth aka munyo jocowo jodok Rama. Elikana oŋeyo cege Hana, to Rwoth winjo kwayo pere

²⁰ I hongo no won Hana ogamo iye to nywolo wode, aka ocwoko rigo nyinge ni Samwiri; dwoŋ mere ni, “Akwayo Rwoth go.”

Hana miyo Rwoth Samwiri

²¹ Hongo doko otundo ma Elikana gi peco pere gibe jokidho Silo miyo Rwoth cowirok ma kisi oro kodi miyo go cowirok manyakare m'oyido go ociko.

²² To rume Hana k'okidho gi jo, kole go owaco ri cwore ni, “Kur tekin go owey dhoth abino tero go i Ot pa Rwoth.”

²³ Elikana odwoko ni, “Ongoye wac, tim gim'iparo ni ber; bedi peco tundo cuka go owey dhoth. Weyi Rwoth wokel cikirok perin i kare.” Ameno to Hana doŋ peco aka okuro wode cuka oweyo dhoth.

²⁴ Munyo go otieko weyo dhoth, jokidho Silo, aka jotero rwath ma jaoro adek, agono acel ma moko, gi pien dhiaŋ m'opoŋ'iye vini, aka jotero Samwiri ma fodi go ŋic i Ot pa Rwoth Silo.

²⁵ Munyo jotieko thumo rwath no, jotero ri Eli.

²⁶ Hana owaco rigo ni, “Mondo jadwoŋ ipoyan? Aŋat'abedo dhako ma ndelo no ocungo ka, munyo kwayo Rwoth.

²⁷ Oyido akwayo ni Rwoth womiyan nyathi aka go otieko winjo kwayo paran.

²⁸ Riameno amiyo Rwoth go; ka go fodi kwo i piny ka, go bino bedo apa Rwoth.” To jolamo Rwoth kenyo.