1 Petero 5 - KITAWO MALEŊ Catholic

Mwendi pa Were

¹ Onyo paka abende abedo jadwoŋ i kitipa pa jom'oyeyo, kendo paka ŋat'oneno candirok m'obedo ri Kristo, odoko paka ŋata bende ibino poko ye go dwoŋ m'ilanyutho, agoyo koko ri jotel ma kitipin pa jom'oyeyo ma jo ni dier win,

² ni bedi win jokwath pa sidwol rombo ma Were omiyo win, aka wileki jo gi maro mewin, paka Were mito witim, makiweno g'arom. Tiyi win, m'ongoye woro pesa, to ro maro tic ri jowoti win adieri.

³ Wikiri widhum joma okethi i kur mewin gi mbaka, to bedi win ranen ri sidwol.

⁴ Aka ka Jakwath Madwoŋ onenere, wibino limo sangaria ma didwoŋ ma kilawiro cal to rumo.

⁵ Ameno bende, wijoma fodi soye wiripo winjo jotel mewin gi mwolo. Aka wijoje ruki win mwolo ma tiyo ri jowoti win pa nanga; kole ndiko waco ni, “Were lwenyo gi jopakirok, to miyo joma wegi jobwonere nema.”

⁶ Am'omiyo, bwonere win, i cingi Were ma dimeni, ŋey nyaka go bino tiŋo win malo i hongo m'oripo.

⁷ Kethi win rembo mewin je kwoŋ go, rupiri go dewo kwoŋ win.

⁸ Bedi win ma wiŋeyo dhumo kwo mewin ma wineno. Kole jakwor mewin, jwogi, riwo piny pa simbwor ma hola, munyo rango nyatoro m'omwony.

⁹ Piem win gine, munyo wicungo matek i yeyo mewin, rupiri wiŋeyo ni jowoti win ma joyeyo i piny gipi bende onyo joluwo i kiti candirok no.

¹⁰ To ka witieko candirok mathin, Were ma nigi nema je, m'olwoŋo win ni wopok win ye dwoŋ ma cil gi cil i Kristo, won bino miyo win meni, to miyo wicungo ma wicwiny i yeyo.

¹¹ Ri go meni wobedi cil gi cil. Ameno.

Moth macowe

¹² Andiko riwin balwa macek me gi kony pa Silvano, m'atero paka omera m'ogenere. Amito medo win meni gi ridho riwin nike me obedo nema pa Were adieri. Cungi win matek iye.

¹³ Kitipa pa joma yeyo nyawoti win ma Babilon, ma Were bende am'oyero, dhiro riwin moth, gi Mariko wodan bende.

¹⁴ Mothere win akor gi mar manyakristo. Weyi siem wobedi gi wijoje ma wibedo apa Kristo.