1 Petero 4 - KITAWO MALEŊ Catholic

Kwo m'olok manyen

¹ Am'omiyo, paka Kristo ocandere i delkwoŋe, wibende wiripo miyirok miseni gi kiti paro ma go obedo gine, rupiri ŋat'ocandere i delkwoŋe meno otieko thekirok gi gimarac.

² Riameno, wok gunyo ni, mito pa Were ama dhumo kwo pere gipi i piny ka makiweno awanya mareco ma del.

³ Witieko oro hongo m'oromo munyo oyido witimo gima joma bu Were joketho paro pajo i timo paka kidakana, awanya mareco ma waŋ i cuny jo, mero i kalima ma nyaworoworo, medho ma kitipa, gi lamo cal makicar.

⁴ Aka joma bu Were no jouro nike wikiriwere gi jo i timo gir'awanya mareco m'oasere no, am'omiyo joyeto win;

⁵ to jobino tito wac ri ŋat'oyikere thumo banja ri jomakwo kodi jom'otho.

⁶ Me am'omiyo otiti Wac Manyen Maber ri joma pama jotieko tho bende, ŋey wothum rijo banja i del paka ji je, to jobedo makwo paka Were i cuny.

⁷ Gik gimoro je orikere ocore cegin, am'omiyo bedi win milengela kendo ma widhumo kwo mewin aka winyal kwayo.

⁸ To maloyo gimoro je, mare win gi mar madwoŋ, rupiri mari umo reco madit.

⁹ Joli win jowoti win i pecin mewin m'ongoye kigeŋisa.

¹⁰ Paka kisi dhano olimo mic, or riwin ma konyo jowoti win, paka jokan mar'adieri ma mic pa Were m'opokere opokere.

¹¹ Nyatoro je ma fonjo wac pa Were ripo fonjo paŋini obedo wac pa Were won; nyatoro je ma timo tic wotim gi meni ma Were miyo go, aka ŋey i gimoro je womiy Were pak kwoŋ Yesu Kristo, madwoŋ gi meni obedo apere, cil gi cil. Ameno.

Candirok paka jakristo

¹² Jowotan m'amaro, wikiri widhier kwoŋ tem malith ma wicander'iye, paŋini gima ki ma kisi ndelo timere riwin.

¹³ Kucel sangala win nike wiriwere gi Kristo i candirok pere, ŋey rumacen kisangala wopoŋ i cuny win ka onyuthi dwoŋ pere.

¹⁴ Wijosilwany k'oyeti win ro oro nyingi Kristo; dwoŋ mere ni Cuny ma nigi dwoŋ aka apa Were, nitie i win.

¹⁵ To wongoye moro kwoŋ win ma wocandere paka janek, kosa jakwo, kosa ŋat'otimo raco madwoŋ, kosa ma rire i tic pa joman.

¹⁶ To ka moro kwoŋ win candere kwoŋbedo go jakristo, wiye wokiri wokwoti, to wofoy Were ayino ni go ilwoŋo go gi nyingi Kristo.

¹⁷ Ato ndir otundo ma thumo banja aka lacako gi ji pa Were won. Onyo ka kidho cako gi wan, obedi nedi ri joma jokiyey Wac Manyen Maber ma wok bongi Were?

¹⁸ Kole ndiko waco ni, “Ka tek ri jom'otire limo both; onyo aŋo m'obedi ri joma kilwor Were kodi joreco?”

¹⁹ Am'omiyo, joma candere rupiri obedo mito pa Were rijo, joripo medo miyirok ri jacwec pajo ma genere gi medo timo gima beyo.