1 Kerin 8 - KITAWO MALEŊ Catholic

Ikelo Kakan ma Cikirok i Ot pa Were

¹ Kenyo kere Solomon ocoko jotel je ma nonin kodi pecin ma Isiraili i Yerusalem, kelo malo Kakan ma Cikirok pa Rwoth wok i tindi madwoŋ pa Daudi, Zayon.

² Aka cwo je jocokere bongi kere Solomon i kalima i dwe ma Ethanim, dwe mar'abirio.

³ Munyo jotel je jotieko cokirok, jocway ri Were i wi migam jotiŋo malo Kakan ma Cikirok

⁴ aka jotero i Ot pa Were. Jolevi kodi jocway ri Were i wi migam bende jotero Wema Maleŋ gi gigipiny mere je i Ot pa Were.

⁵ Kere Solomon kodi ji je jocokere ruwaŋ Kakan ma Cikirok aka jomiyo cowirok ma rombo kodi dhok kweth ma kikwanere.

⁶ Kenyo jocway ri Were i wi migam jokelo Kakan ma Cikirok i Kabedo Maleŋ Loyo, i ŋangi cwec ma jobwombi gin.

⁷ Bwombi gin m'oyare oumo Kakan ma Cikirok kodi gute m'otiŋ gine.

⁸ Gike ma gute oyido nyalo nenere ka nyatoro ocungo tirtir ruwaŋ Kabedo Maleŋ Loyo, makiweno gi kaman je. (Gutin no fodi jonitie kenyo kiri konon.)

⁹ Oyido ongoye gima nitie i Kakan ma Cikirok kwanyo woko telin mapando ario ma Musa oyido oketh'iye i got Sinai, munyo Rwoth otimo cikirok gi Joisiraili munyo jowok i Misir.

¹⁰ Paka jocway ri Were i wi migam oyido jowok i Ot pa Were, pondeponde oumo,

¹¹ ŋey jocway ri Were i wi migam jok'onyalo gik timo tic pajo, rupiri dwoŋ pa Rwoth opoŋ i Ot pa Rwoth.

¹² Kenyo Solomon okwayo ni, “In, Rwoth, iketho waŋceŋ i polo, kucel iyero bedo i pondeponde kodi mudho.

¹³ Onyo atieko geto rin ot maŋon, kam'ilabed'iye cil gi cil.”

Solomon luwo gi ji

¹⁴ Paka ji oyido jocungo kenyo, kere Solomon owire to ŋiyo jo, aka okwayo Were miyo jo silwany.

¹⁵ Solomon owaco ni, “Rwoth Were pa Isiraili wopak! Okuro cikirok pere m'otimo ri baba Daudi, munyo owaco ni,

¹⁶ ‘Wok i hongo m'awodho ji paran wok i Misir, fodi akiyero tindi madwoŋ i lowo ma Isiraili ma Ot pa Were ripo woget'iye kam'inyalo laman'iye. T'ayerin, Daudi, dhumo ji paran.’

¹⁷ Baba Daudi oyido ocano geto Ot pa Were ma lamo Rwoth Were pa Isiraili,

¹⁸ to Rwoth owaco rigo ni, ‘Oyido itire mito geto ran Ot pa Were,

¹⁹ to ikibino geto. Obedo wodin, wodin won, ama bino geto ran Ot pa Were.’ ”

²⁰ “Aka onyo Rwoth okuro cikirok pere. Alunjo baba paka kere ma Isiraili, aka atieko geto Ot pa Were ma lamo Rwoth Were pa Isiraili.

²¹ Atieko bende ketho kabedo ri Kakan ma Cikirok manitie iye telin mapando ma cikirok ma Rwoth otimo gi kwarere mawan munyo owodho jo wok i Misir.”

Kwayo pa Solomon

²² Kenyo Solomon ocungo ruwaŋ migam i waŋ cokirok pa Joisiraili, aka orieyo cinge yupolo,

²³ to kwayo ni, “Awi Rwoth, Were pa Isiraili, ongoye Were ma cale in, i polo malo kosa i piny! Ikuro cikirok perin gi ji perin aka inyutho mar makiwire ka jowotho ruwaŋin gi cuny jo je.

²⁴ Itieko kuro cikirok m'itimo gi baba Daudi, konon kisi wac otundo i kare.

²⁵ Onyo riameno, Awi Rwoth, Were pa Isiraili kur bende cikirok man m'itimo gi baba munyo iwaco rigo nike noknok acel kwoŋ nyikwaye bino dhumo paka kere ma Isiraili, k'inen jowinjin paka go.

²⁶ Ameno onyo, Awi Were pa Isiraili, weyi kisi gim'iciko baba Daudi, ŋeca perin wotundi i kare.”

²⁷ “To Were, inyalo adieri bedo i piny? Ma kiri polo je kilac rin ma romin, ameno Ot pa Were m'ageto me obedi malac ma romin nedi?

²⁸ Rwoth Were paran, abedo ŋeca perin. Winji kwayo paran, aka imiyan gim'akwayin konon.

²⁹ Kur Ot pa Were me odieceŋ kodi wor, kabedo m'itieko yero ni wolamin'iye. Winjan k'aŋiyo Ot pa Were me t'akwayo.

³⁰ Winji kwayo paran gi kwayo pa ji perin ka joŋiyo kabedo me to jokwayo. I nyingin i polo winji wan aka icwaki reco mawan.”

³¹ “K'osegeya nyatoro timo gimarac ri nyawote t'ikelo go ruwaŋ migam perin i Ot pa Were kwoŋirok nike go ongoye gi banja,

³² Awi Rwoth, winji gi polo aka ithumi banja ri ŋecin perin. Miy gir'acula ri ŋatarac aka iwey ŋat'ongoye gi banja wokadhi.”

³³ “Ka ji perin Isiraili, jokwor pajo jokengila jo kwoŋbedo jotimo reco kwoŋin, to jowire bongin kendo to jobino i Ot pa Were me, pusirok gi mwolo,

³⁴ winji jo gi polo. Cwaki reco pajo, aka idwoki jo i lowo m'imiyo kwarere pajo.”

³⁵ “K'itweyo koth kwoŋbedo ji perin jotimo reco kwoŋin, ka jopusere to joŋiyo Ot pa Were me kwayin gi mwolo,

³⁶ winji jo gi polo. Cwaki reco pa kere kodi reco pa Joisiraili. Fonji jo timo gim'otire. Kenyo, Awi Rwoth, dhiri koth i lowo perin me, m'imiyo ji perin paka lim pajo alunja.”

³⁷ “Ka kec kosa two nundu obedi i lowo, kosa koyo malieth kosa tome bonyo, onyeki cemo, kosa jokwor pa ji perin jomonji jo iy'acel kwoŋ tindin pajo madongo, kosa two moro je obedi i dier jo,

³⁸ winji kwayo pajo. Ka Joisiraili perin moro, wok i ŋuto ma cuny gin, jotiŋ cingi gin malo i Ot pa Were me,

³⁹ winji kwayo pajo. Winji jo gi peco perin i polo, cwaki jo, aka kony jo. In kende iŋat'iŋeyo paro ma cuny nyatoro. Tiyi gi kisi nyatoro paka yenyere,

⁴⁰ ŋey jowolworin i kwo pajo je i lowo m'imiyo kwarere mawan.”

^41-42 “I nger acel ka japath, ma k'obedo acel kwoŋ ji perin owinji kwoŋ dwoŋ perin kodi gigipiny madongo m'itieko timo ri ji perin, to bino lamin kodi kwayin i Ot pa Were me,

⁴³ winji kwayo pere. I polo, kam'ibed'iye, winji go aka tim gima go kwayin timo, ŋey nonin je i piny gibe jowoŋeyin aka jowowinjin, paka ji perin Isiraili jotimo. Kenyo jobino ŋeyo nike Ot pa Were m'ageto me kabedo m'iripo lamin'iye.”

⁴⁴ “K'imiyo ji perin cik kadho i lweny gi jokwor pajo to jokwayin, kama jobed'iye je, ka joŋiyo tindi madwoŋ me m'iyero kodi Ot pa Were m'ageto rin me,

⁴⁵ winji kwayo pajo. Winji jo i polo aka miy jo loyo.”

⁴⁶ “Ka ji perin jotimi reco kwoŋin, kole ongoye ŋata kitim reco, to i nge perin iweyo jokwor pajo kikengila jo, t'itero jo paka jojiera i lowo man, makada nende lowo no obedi bor swa,

⁴⁷ kucel ka joŋuti reco pajo i lowo m'oter'iye jo paka jojiera, to jopusere, to joywak rin i lowo no, ka jowaco ni, ‘Watimo reco, watimo gi komo; aka watimo gikidakana,’

⁴⁸ Ka jopusere gi cuny jo je kodi adundo pajo je i lowo pa jokwor pajo, ka joŋiyo lowo me, m'imiyo kwarere pajo, tindi madwoŋ me m'iyero, kodi Ot pa Were m'ageto rin me,

⁴⁹ kenyo winji kwayo pajo. Gi peco perin i polo winji jo aka maki wor gi jo.

⁵⁰ Cwaki reco pajo je kodi gwenyirok pajo kwoŋin, aka miy jokwor pajo jowoteri jo gi wor.

⁵¹ Kole jobedo ji perin won m'iwodho wok i Misir mac m'odheth no.”

⁵² “Mondo ŋiy ji perin Isiraili kodi kere pajo gi ŋono, aka winji kwayo pajo noknok ka jolwoŋin ri kony.

⁵³ Kole itieko ketho jo gicen kwoŋ nonin je ma piny, bedo ji perin won, paka iciko luwo bongi ŋeca perin Musa munyo iwodho kwarere mawan wok i Misir.”

Kwayo macowe

⁵⁴ Rumacen munyo Solomon otieko kwayo Rwoth, oay malo ruwaŋ migam, kama go oyido ogur'iye conge gi cinge malo.

⁵⁵ Gi dwonde ma malo okwayo Were womiy ji je m'oyido jocokere kenyo silwany. Solomon owaco ni,

⁵⁶ “Rwoth wopak m'omiyo ji pere siem paka ociko nike latimo. Okuro cikirok pere ma gir'aura m'omiyo luwo bongi ŋeca pere Musa.

⁵⁷ Rwoth Were mawan wobedi gi wan paka obedo gi kwarere mawan; weyi go wokiri wowey wan kosa wojwangi wan,

⁵⁸ weyi womiy wan winjo go, ŋey wawothi i yo pere, aka wakur cik kodi Or pere je m'omiyo kwarere mawan.

⁵⁹ Weyi Rwoth Were mawan wopoy i hongo je kwayo paran me, aka weyi wobedo gi wor ri ji pere kodi kere pajo, paka kisi ndelo go mito.

⁶⁰ Aka ŋey nonin je ma piny jowoŋey nike Rwoth kende obedo Were; ongoye man.

⁶¹ Weyi win, ji pere, wibedi gi adieri noknok ri Rwoth Were mawan, kuro cik kodi Or pere je paka witimo konon.”

Solomon miyo Rwoth Ot pa Were

⁶² Kenyo kere Solomon kodi ji je jomiyo Rwoth cowirok.

⁶³ Solomon omiyo Rwoth cowirok ma siem ma dhok 22,000 kodi rombo 120,000. Aka ameno kere kodi ji je joketho i cingi Rwoth Ot pa Were.

⁶⁴ I ndelo no won Solomon oloko dier diedipo maleŋ, yuwaŋ Ot pa Were, aka omiyo kenyo mic awaŋa gikululu, mic ma cemo manyinge, kodi mic mabor ogwaŋe paka cowirok ma siem. Otimo gime kwoŋbedo migam ma ywel oyido thin ri cowirok me je.

⁶⁵ Ameno Solomon kodi Joisiraili je jotimo kalima ma ndelo abirio. Oyido nitie lwak ji wok i ger ma Hamath tundo yumalo kodi kew gi Misir yupiny.

⁶⁶ I ndelo mar'abirio Solomon osewila ji dok peco. Jopako go aka jodok peco munyo josangala ro silwany kweth ma Rwoth oyido omiyo ŋeca pere Daudi kodi ji pere Isiraili.