1 Kerin 6 - KITAWO MALEŊ Catholic

Solomon geto Ot pa Were

¹ Rumacen ma oro 480 munyo Joisiraili jotieko eye wok i Misir, i oro mar'aŋwen ma dhum pa Solomon i Isiraili, i dwe mar'ario, dwe m'ilwoŋo ni Ziv, Solomon ocako geto Ot pa Were.

² Iye mere oyido mita piero ario g'abirio i boro, mita abuŋwen i laco, kodi mita apar g'adek g'adec i ŋawirok.

³ Kisika ma dhiot oyido mita aŋwen g'adec i lutho, mita abuŋwen i laco, malac paka kisika ma iye won.

⁴ Kor ot ma Ot pa Were oyido nitie gi dirisin woko, m'odire loyo ma iye.

⁵ Kwoŋ kor ot ma woko, i thenge kodi yuŋey Ot pa Were, ogeti udi acurcur adek, kisi acurcur oyido mita 2.2 i boro.

⁶ Acurcur ma pende loyo oyido mita 2.2 i laco, ma diere mita 2.7 i laco, aka ma wiye mita 3.1 i laco. Kor Ot pa Were i kisi dier ot oyido thin loyo dier ot ma pende ŋey kisikin wonyali bedo i wiy kor ot ma doko k'ogeti marabin.

⁷ Telin m'ogeti gine Ot pa Were oyido oyiki kam'ogol'iye jo, ŋey wongoye koko gi nyundu, le kosa cumin man ma nyweny paka oyido igeto Ot pa Were.

⁸ Waŋkac mar'acurcur ma pende oyido nitie yupiny ma Ot pa Were, gi madalin ma kidho i mar'ario gi mar'adek.

⁹ Ameno kere Solomon otieko geto Ot pa Were. Oketh'iye miango gi mbawin ma yath matek m'ilwoŋo ni sida.

¹⁰ Acurcur adek, kisi acurcur mita 2.2 i boro, oyido ogeti kwoŋ kor ot ma woko ma Ot pa Were, aka oyido oriw gi mbawin ma yath sida.

¹¹ Onyo Rwoth owaco ri Solomon ni,

¹² “K'inoluwi cik kodi or paran je, Abino timo rin gim'aciko benin Daudi.

¹³ Abino bedo i dier ji paran Isiraili i Ot pa Were me m'igeto, aka akibino jwango jo.”

¹⁴ Ameno Solomon otieko geto Ot pa Were.

Gigipiny ma iy Ot pa Were

¹⁵ Kor ot ma iye oyido oum gi mbawin ma sida wok piny kiri malo, aka dier ot mere oum gi mbawo yath madongo mabor.

¹⁶ Kisika ma iye, m'ilwoŋo ni Kabedo Maleŋ Loyo ogeti yucen ma Ot pa Were aka oyido mita abuŋwen i boro. Opok kwoŋ Ot pa Were gi mbawin ma yath sida wok piny tundo malo.

¹⁷ Kisika ma nyim Kabedo Maleŋ Loyo oyido mita apar g'aboro i boro.

¹⁸ Mbawin ma yath sida oyido oloki maŋon gi cal mar'asanda gi mawuwin, ŋey telin ma kor ot wokiri wonen.

¹⁹ Ogeti kisika ma iye yucen ma Ot pa Were kam'oketh'iye Kakan ma Cikirok pa Rwoth.

²⁰ Kisika ma iye me oyido mita abuŋwen i boro, mita abuŋwen i laco, kodi mita abuŋwen i ŋawirok, aka oum kwoŋe je gi zahabu. Migam oyido oum gi mbawo ma yath sida.

²¹ Iy Ot pa Were oyido oum gi zahabu, aka okethi lijegere m'otimi gi zahabu ariwa i dhiot ma kisika ma iye, m'oyido oum gi zahabu.

²² Iy Ot pa Were gipi oum gi zahabu, kiri gi migam ma Kabedo Maleŋ Loyo.

²³ Otimi cwec ma jobwombi gin ario aka okethi i Kabedo Maleŋ Loyo, aka kisi acel oyido mita 4.4 i boro.

^24-26 Joje oyido jorom i dwoŋo gi cal. Joje oyido jobwombi gin ario, aka kisi bwombi gin oyido mita 2.2 i boro, ŋey wok i bwombi jo acel tundo i man obedo mita 4.4.

²⁷ Okethi jo i kisi thenge i Kabedo Maleŋ Loyo ŋey bwombi gin ario m'oyare jowomakere i dier kisika, aka bwombi gin ario man jowogey kor ot.

²⁸ Cwec ario ma jonitie gi bwombi gin oum gi zahabu.

²⁹ Kor ot ma kisika madwoŋ gi kisika ma iye oloki maŋon gi cal ma cwec ma jobwombi gin, cal ma yath thith, kodi cal ma mawuwin.

³⁰ Kiri dier ot je oum gi zahabu.

³¹ Otimi thigo m'olwowere gi mbawo yath nanzi m'oketh i dhiot ma Kabedo Maleŋ Loyo, aka wiye mere oyido oyedhere.

³² Thigin oyido oloki maŋon gi cal ma cwec ma jobwombi gin, cal ma yath thith, kodi cal ma mawuwin. Thigin, cwec ma jobwombi gin, kodi cal ma thith oyido oum gi zahabu.

³³ Ri dhiot ma kisika madwoŋ otim thigo ma kisi thenge ario rom gi mbawo ma yath nanzi.

³⁴ Oyido nitie thigin ario adola m'otimi gi yath madongo mabor

³⁵ aka oloki maŋon gi cal ma cwec ma jobwombi gin, cal ma yath thith, kodi cal ma mawuwin, m'oyido oum gi zahabu kwoŋe je.

³⁶ Ogeti diedipo ma iye ruwaŋ Ot pa Were, m'othok gi kor ot m'oyido nitie gi mbawo acel ma yath sida kwoŋ kisi telin m'okonji didek.

³⁷ Kindi ma Ot pa Were ocaki i dwe mar'ario, i dwe ma Ziv, i oro mar'aŋwen ma dhum pa Solomon.

³⁸ I dwe mar'aboro, dwe ma Buli, i oro mar'apar g'acel ma dhum pa Solomon, Ot pa Were oyido otiek geto paka oyido ocan. Otero Solomon oro abirio geto.