1 Kerin 5 - KITAWO MALEŊ Catholic

Solomon yikere geto Ot pa Were

¹ Onyo kere Hiram ma Tire oyido obedo mere pa Daudi, aka munyo owinjo nike Solomon olunjo bamere Daudi paka kere, ooro ŋecin pere bongi Solomon.

² Solomon odhiro ri Hiram mikwenda ni,

³ “Iŋeyo paka baba Daudi k'onyalo geto ot ma lamo Rwoth Were pere ro lweny kodi jokwor pere m'oyido jothoko go, cuka Rwoth omiyo go loyo kwoŋ jokwor pere.

⁴ To pama Rwoth Were paran omiyan siem i kew paran je. Angoye gi jokwor, aka ongoye teko ma monjan.

⁵ Rwoth ociko baba Daudi ni, ‘Wodin, m'alaloko kere lunjin bino geto ran Ot pa Were.’ Aka onyo amiyere geto Ot pa Were ma lamo Rwoth Were paran.

⁶ Onyo riameno miy cwo perin cik jowotoŋ ran yen matek m'ilwoŋo ni sida. Cwo paran jolatic gi jo, aka abino culo cwo perin gim'inowaci je. Paka iŋeyo maber, cwo paran jokuya toŋo yen maber paka cwo perin.”

⁷ Munyo Hiram owinjo wac pa Solomon osangala swa aka owaco ni, “Rwoth wopak konon m'omiyo Daudi wode mariek no lunjo go paka kere ma piny madwoŋ no!”

⁸ Kenyo Hiram odhiro ri Solomon mikwenda ni, “Awinjo mikwenda m'idhiro ran; ayikere timo gim'iyenyo je ma mako kwoŋ yen matek sida kodi yen madongo maboyo ma jaboke kweth.

⁹ Cwo paran jobino kelo kasike piny wok i Lebanon i nam, aka jobino tweyo kanyacel i wic wocew i thengi nam kiri i kabedo m'iyero. Kenyo cwo paran jolagonyo, aka cwo perin jobino jolo. I thenge perin, amitin imiyan cemo ri cwo paran.”

¹⁰ Ameno Hiram omiyo Solomon yen sida je kodi kasike yen madongo maboyo ma go omito,

¹¹ aka Solomon omiyo Hiram tan 2,000 ma ŋano kodi lita 400,000 ma mo nanzi mangil kisi oro ri cwo pere.

¹² Rwoth okuro cikirok pere ri Solomon aka omiyo go rieko. Siem obedo i dier Hiram kodi Solomon, aka jario jotimo cikirok.

¹³ Kere Solomon oromo cwo 30,000 wok i Isiraili gipi ma jotimo tic mar'arom

¹⁴ aka oketho jo i cingi Adoniram. Opoko jo i kitipin adek ma 10,000 aka kisi kitipa oyido bedo ma dwe i Lebanon kodi dwe ario peco.

¹⁵ Solomon bende oyido nitie gi cwo 80,000 i piny matendere ma jogolo telin, kodi cwo 70,000 m'oyido jotiŋo,

¹⁶ aka oketho jo i cingi cwo 3,300 kikaŋasa tic pajo.

¹⁷ Luwo kwoŋ cik pa kere Solomon, jogolo telin mafoth mapando ri kindi Ot pa Were.

¹⁸ Ameno jogeto pa Solomon gi jogeto pa Hiram kodi cwo ma jowok i Gebal joyiko telin gi mbawin ma geto Ot pa Were.