1 Kerin 20 - KITAWO MALEŊ Catholic

Lweny gi Siria

¹ Kere Benhadad ma Siria ocoko jolweny pere je kanyacel, kerin piero adek g'aŋwen m'oyido jothielo go, kodi kayina kodi cawilin to monjo Samaria.

² Benhadad ooro jomikwenda i tindi madwoŋ waco ri Ahab ma Isiraili ni, “Kere Benhadad omiyo or nike

³ imiy go feza perin, zahabu perin, mon perin, kodi nyithindho perin ma jotek.”

⁴ Kere Ahab odwoko ni, “Waci win ri jadwoŋ paran kere Benhadad nike nyalo teran gi kisi gim'anitie gine je.”

⁵ Jomikwenda jodwoko bongi Ahab gi cik man wok bongi Benhadad ni, “Adhiro rin mikwenda nike imiyan feza perin, zahabu perin, mon perin, kodi nyithindho perin.

⁶ To onyo abino oro ŋecin paran dwaro i ot perin kodi i ot pa jodhum perin aka jowokwany kisi gima joneni nike nitie gi cwe je. Jolabino koro dikin kapa sawa me.”

⁷ Kenyo kere Ahab olwoŋo jotel je ma piny Isiraili aka owaco rijo ni, “Neni win jal me mito kisika wan. Kole odhiro ran mikwenda nike amiy go mon paran, zahabu paran, feza paran, kodi zahabu paran t'ayeyo.”

⁸ Jotel kodi ji je jodwoko ni, “Ikir'iwinji gima go waco, aka ikir'iyey.”

⁹ Ameno Ahab odwoko jomikwenda pa Benhadad ni, “Waci win ri jadwoŋ paran kere nike ayeyo mikwenda marapena, to akinyalo yeyo mar'ario mere.” Jomikwenda jokadho aka jodwoko gi mikwenda man

¹⁰ wok bongi Benhadad ni, “Weyi werin jowonekan k'inen akikelo cwo ma romo reyo tindi madwoŋ perin me to jotiŋo rudino mere i cingi jo.”

¹¹ Kere Ahab odwoko ni, “Waci win ri kere Benhadad nike jalweny matek kibedi gi kwoto kafodi k'olwenyo, to rumacen ma lweny.”

¹² Benhadad olimo mikwenda me munyo go, kerin ma jothielo go, kodi jodhum man oyido jomedho i wema pajo. Kenyo Benhadad omiyo cwo pere cik jowomonji tindi madwoŋ, aka jomako kabedo pajo.

¹³ Aka panen, jatuci wac Were moro obino bongi kere Ahab to waco rigo ni, “Rwoth waco ni, ‘Ikir'ibwoki ro jolweny madit. Abino miyin loyo kwoŋ jo konon me aka ibino ŋeyo ni An Abedo Rwoth.’ ”

¹⁴ Ahab openjo ni, “Ŋa ma latelo monjo?” Jatuci wac Were odwoko ni, “Jolweny mathindho ma jogavana mar'adec jotelo ama jowotel monjo.” Ahab openjo ni, “Ŋa ma lacako lweny?” Jatuci wac Were odwoko ni, “In.”

¹⁵ Ameno Ahab olwoŋo jolweny mathindho ma jogavana mar'adec oyido jotelo, joje 232. Aka Ahab olwoŋo jolweny pa Isiraili bende, joje cwo 7,000.

¹⁶ Jocako monjo sawa aucel, munyo Benhadad gi kerin piero adek g'ario m'oyido jothielo go jomer i wemin pajo.

¹⁷ Jolweny mathindho ama jotelo. Jombega ma Benhadad oyido ooro woko jowaco rigo nike kitipa pa jolweny jowok i Samaria.

¹⁸ Ahab omiyo or ni, “Maki win jo makwo, makada nende bedi nike jobino lweny, kosa kwayo siem.”

¹⁹ Jolweny mathindho jotelo monjo, to jolweny pa Joisiraili joluwo.

²⁰ Kisi nyatoro oneko jacwo m'olwenyo gine. Josiria joringo aka Joisiraili joriemo jo. To Benhadad okwale i kayina gi cwo pere ma jogweyo kayina.

²¹ Kere Ahab okidho to mako kayina kodi cawilin to ketho kwoŋ Josiria kikengila madwoŋ.

²² Kenyo jatuci wac Were okidho bongi kere Ahab to waco rigo ni, “Dok iyikere, aka itimi can m'igwokere swa, kwoŋbedo kere ma Siria bino monjin kendo i ndir ma koth.”

Siria monjo Joisiraili kendo

²³ Jodhum pa kere Benhadad jowaco rigo ni, “Werin pa Joisiraili jobedo werin ma got, aka am'omiyo jokengila wan. To wabino kikengila jo ka walwenyo gi jo kam'othangere.

²⁴ Onyo kwany woko kerin piero adek g'ario i kabedo pajo aka ikethi jomituka i kabedo pajo.

²⁵ Lwoŋ jolweny madit paka jolweny ma jojwagin, gi welo acel ma kayina kodi cawilin. Adieri walabedo matek loyo Joisiraili.” Kere Benhadad oyeyo rieko pajo to timo ameno.

²⁶ I ndir ma koth Benhadad olwoŋo cwo pere to ŋanjo gi jo kidho i tindi madwoŋ Afek monjo Joisiraili.

²⁷ Olwoŋi Joisiraili t'imiyo jo gilweny, aka joŋanjo to joketho kambi i kitipin ario tirtir gi Josiria. K'oyido ipima jo gi Josiria m'oyido joywore kam'othangere, Joisiraili oyido jocale dwol diegi ario mathindho.

²⁸ Jatuci wac Were okidho bongi kere Ahab to waco rigo ni, “Rwoth waco ni, ‘Kwoŋbedo Josiria jowaco nike abedo were matendere, to ki ma kam'othangere, abino miyin loyo kwoŋ jolweny pajo madit, aka in kodi ji perin wibino ŋeyo ni An Abedo Rwoth.’ ”

²⁹ Joisiraili kodi Josiria jobedo i kambi pajo tirtir ma ndelo abirio. I ndelo mar'abirio jocako lweny, aka Joisiraili joneko Josiria gana miya.

³⁰ Josiria ma joboth joringo i tindi madwoŋ Afek, kama cel ma tindi madwoŋ opodho kwoŋ to neko 27,000. Benhadad bende okwale to donjo i tindi madwoŋ aka opondo i kisika ma yu buti ot moro.

³¹ Jodhum pa Benhadad jokidho bonge aka jowaco rigo ni, “Wawinjo nike kerin ma Isiraili jo wor, yey wan wakidhi bongi kere ma Isiraili gi kutiyin i pier wan, kodi thondhe i ŋuti wan, poyo go nyalo weyo ma k'onekin.”

³² Ameno jomino kutiyin i pier gin to jotweyo thondhe i ŋuti gin aka jokidho bongi kere Ahab to jowaco ni, “Ŋeca perin Benhadad ywak rin nike ikir'ineki go.” Ahab openjo ni, “Go fodi kwo? Go cale omin an!”

³³ Jodhum pa Benhadad oyido joneno ranyuth maber aka munyo Ahab owaco ni omin an, bende jodwoko ni, “Ey omin in Benhadad.” Ahab omiyo or nike wokel Benhadad bonge. Aka munyo Benhadad otundo, Ahab owaco rigo donjo i cawila bonge.

³⁴ Benhadad owaco ri Ahab ni, “Abino dwoko rin tindin je ma baba omayo benin, ŋey igeti ka timo mitan perin i Damasiko paka baba otimo i Samaria.” Ahab odwoko ni, “Luwo kwoŋ pido me, abino weyin ikadhi.” Ahab otimo gi Benhadad cikirok to weyo go kadho.

Jatuci wac Were thumo ri Ahab banja

³⁵ Rwoth omiyo jatuci wac Were moro cik aka owaco ri jatuci wac Were man nike wogoyi go. To jatuci wac Were no okwero.

³⁶ Ameno owaco rigo ni, “Kwoŋbedo ikwero luwo cik pa Rwoth, tekin ieye bongan, simbwor bino nekin.” Aka tekin jatuci wac Were no kadho to simbwor neko go.

³⁷ Kenyo jatuci wac no okidho bongi jacwo man to waco rigo ni, “Goyan.” Jalo otimo ameno, ogoyo go matek to wumiya go.

³⁸ Jatuci wac Were no otweyo nyime gi nanga to rendere nike k'obedo go, aka okidho to cungo i thengi yo kuro kere ma Isiraili woluwi.

³⁹ Munyo kere luwo, jatuci wac Were no olwoŋo go ni, “Jadwoŋ kere, oyido alwenyo, aka neni jalweny acel okelo jakwor m'omak ran nike akuri, aka nike ka okwale abino culo gi kwo paran won, kosa ilakitanza an feza 3,000.

⁴⁰ To oyido anitie gi riwin kweth to jalo kwale.” Kere odwoko ni, “In won itieko thumo banja perin, aka ilaculo.”

⁴¹ Jatuci wac Were oyeco woko nanga wok ruwaŋe, aka gi piyo no won kere oniaŋ kwoŋe nike oyido acel kwoŋ jotuci wac Were.

⁴² Kenyo jatuci wac Were owaco ri Ahab ni, “Rwoth waco ni, ‘Kwoŋbedo iyeyo jacwo m'oyido amiyin cik neko okwale, onyo in won ibino culo gi kwo perin, aka ibino reyo woko jolweny perin rupiri joweyo jolweny pere jokwale.’ ”

⁴³ Kere ma Isiraili odok peco i Samaria munyo rembo aka m'ongoye gi kisangala.