1 Kerin 18 - KITAWO MALEŊ Catholic

Elia gi jotuci wac were pa Bal

¹ Rumacen ma hongo moro, i oro mar'adek ma kec, Rwoth owaco ri Elia ni, “kadhi inyuthere ruwaŋ Ahab, aka abino dhiro koth.”

² Ameno Elia okadho nyuthirok ruwaŋ Ahab. Kec oyido kec swa i Samaria.

³ Ameno Ahab olwoŋo Obadia m'oyido jatel ma cel pa kere. (Onyo Obadia oyido lworo Rwoth swa,

⁴ aka ndir ma Yezebel oyido neko jotuci wac Were, Obadia otero jotuci wac Were miya acel aka okano jo i ŋungu i kitipin ario ma piero abic to miyo jo cemo kodi pi.)

⁵ Ahab owaco ri Obadia ni, “Weyi wakadhi wanen waŋ pi kodi milelo je ma lowo me, poyo wanyalo nwaŋo lum to wabotho kwo pa kayina kodi punde, aka wakiri wakeŋ ogwaŋe mawan.”

⁶ Ameno jopoko thenge ma lowo ma kisi nyatoro woluwi, aka jonywako yo m'opokere.

⁷ Aka munyo Obadia oyido wotho, oromo gi Elia. Obadia oniaŋ kwoŋ Elia aka okule piny to penjo ni, “Adieri meno in jadwoŋ!”

⁸ Elia odwoko ni, “Ey me an. Kadhi iwaci ri jadwoŋ perin nike anitie ka.”

⁹ Obadia odwoko ni, “Raco aŋo m'atimo ma imito kethan i teko ma tho?

¹⁰ Akwoŋere rin i nyingi Rwoth, Were perin makwo nike Ahab otieko dwarin i piny je kosa ker. Kisi ka jadhum ma piny moro owaco nike ingoye i piny pere, Ahab oyido miyo go kwoŋirok nike jok'onwaŋin.

¹¹ Aka iwaco nike akidhi awaci rigo nike initie ka!

¹² Anyalo waco ri Ahab nike initie ka, to tekin akadho cuny pa Rwoth to tiŋin terin i kabedo ma k'oŋeyere to Ahab nekan. Poyi nike wok i soye paran tundo gunyo ni, alworo Rwoth.

¹³ Fodi ikiwinjo ye nike ndir munyo Yezebel oyido neko jotuci wac Were pa Rwoth akano miya acel kwoŋ jo i ŋungu i kitipin ario ma piero abic, t'amiyo jo cemo kodi pi?

¹⁴ Ameno anowaci nedi ri Ahab nike initie ka? Go bino nekan.”

¹⁵ Elia odwoko ni, “Acikin i nyingi Rwoth pa lwak jolweny makwo m'atiyo rigo nike abino nyuthere ruwaŋ kere konon me.”

¹⁶ Ameno Obadia okidho bongi Ahab aka owaco rigo. Ahab okidho romo gi Elia.

¹⁷ Munyo Ahab oneno Elia, owaco ri Elia ni, “Meno in jakeli teko i Isiraili!”

¹⁸ Elia odwoko ni, “Aŋat'akikelo teko i Isiraili, to in kodi peco pa benin. Wikwero luwo or pa Rwoth aka wilamo cal pa Bal.

¹⁹ Onyo miy or wocoki Joisiraili je joworom kodan i Got Kamel, jotuci wac were pa Bal 450 kodi jotuci wac were 400 pa were madhako Asera ma Yezebel thielo jo.”

²⁰ Ameno Ahab ocoko Joisiraili je kodi jotuci wac were pa Bal i Got Kamel.

²¹ Elia ocore cegin gi ji je aka openjo jo ni, “Wilamedere bedo gi paro ario kiri keraŋo? K'inen Rwoth obedo Were, lam win go, to ka Bal obedo Were lam win go?” To jok'odwoko wac.

²² Kenyo Elia owaco ni, “An kendan a jatuci wac Were pa Rwoth m'odoŋ, to nitie jotuci wac were pa Bal 450.

²³ Keli win thwondhe ario. Jotuci wac were pa Bal jowoteri acel jowothum, jowoyaŋ mathindho to joketho i wi yen. To jokiri jowocwiny mac. An bende alatimo gimoro acel gi thwon man mere.

²⁴ Weyi jotuci wac were pa Bal jowokway were pajo, aka abino kwayo Rwoth, aka Were m'odwok ka dhiro mac, meno a Were.” Ji je jodwoko ni, “Iluwo maber.”

²⁵ Kenyo Elia owaco ri jotuci wac were pa Bal ni, “Paka win withoth, yer win thwon acel aka wipen thumo. Wikiri wicwiny mac, to kway win were mewin.”

²⁶ Jotuci wac were pa Bal jokwanyo thwon m'okel rijo, jothumo, to jokwayo Bal wok odikin tundo sawa aucel. Jokoko ni, “Dwoki wan Bal!” Jomielo thoko migam m'oyido jogeto, to ngoye ŋat'odwoki jo.

²⁷ Tundo sawa aucel Elia ocako timo gi nyero gi jo ka waco ama: “Kway win malo, go were! Kono okadho woth, kosa go nindo aka wiripo cewo go.”

²⁸ Ameno jokwayo malo to jothumere g'apalin kodi abor manyakwer pajo cuka remo ocwer.

²⁹ Jomedere kiri othieno, to ngoye ŋat'odwoki jo, mayindo k'owinjere.

³⁰ Kenyo Elia owaco ri ji je ni, “Core win cegin bongan.” Ji je jocore cegin bonge. Elia oyiko migam pa Rwoth m'oyido otur piny,

³¹ aka okwanyo telin apar g'ario ma jocungo ri nonin pa wot Yakobo, jacwo ma Rwoth omiyo nyinge ni Isiraili.

³² Gi telin me Elia ogeto migam ma lamo Rwoth. Elia okunyo fereji manyalo madho pi lita apar g'aŋwen thoko migam.

³³ Aka ocano yen i wi migam, oyaŋo thwon mathindho, to ketho i wi yen. Kenyo go owaco ni, “Poŋi win pi i agwatin aŋwen me aka wikonji i wi yen gi mic awaŋa.”

³⁴ Elia owaco kendo ni jowokonji madirio gi ma didek, aka jotimo ameno.

³⁵ Pi omol thoko migam, aka opoŋ i fereji.

³⁶ I hongo ma miyo cowirok m'othieno jatuci wac Were Elia ocore cegin gi migam to kwayo ni, “A Rwoth, Were pa Abraham, Isaka, kodi Yakobo, weyi woŋey konon me nike ibedo Were pa Isiraili, nike abedo ŋeca perin, aka nike atimo gime luwo i cik perin.

³⁷ Dwokan, awi Rwoth, dwokan, ŋey ji me jowoŋey nike in Rwoth, Ibedo Were, aka nike idwoko jo bongin.”

³⁸ Kenyo mac pa Rwoth opodho aka owaŋo woko mic awaŋa, yen, telin, rudino, to naŋo woko pi m'oyido nitie i fereji.

³⁹ Munyo ji je joneno, jogore piny aka jokoko ni, “Rwoth obedo Were, Rwoth obedo Were!”

⁴⁰ Elia omiyo or womaki jotuci wac were pa Bal je m'ongoye ŋata wokwale. Ji jomako joje, aka Elia otero jo piny i malawa Kison to neko jo.

Gike ma milengela

⁴¹ Kenyo Elia owaco ri Ahab ni, “Onyo inyalo kadho icemi. Awinjo mor pa koth bino.”

⁴² Kucel munyo Ahab okadho cemo, Elia oidho wi Got Kamel, okule piny, to ketho wiye i dier conge.

⁴³ Elia owaco ri ŋeca pere ni, “Kadhi iŋiy yu nam.” Ŋeca pere okidho to ŋiyo, aka odwoko to waco ni, “Ongoye gim'aneno.” Elia ooro ŋeca pere dibirio.

⁴⁴ Ma dibirio mere ŋeca pere odwoko to waco ni, “Aneno pondeponde mathin ma kidwoŋ kada loyo cingi dhano wok i nam.” Elia omiyo ŋeca pere cik waco ri kere Ahab nike woidhi cawila pere wokadhi mafodi koth k'oŋolo go.

⁴⁵ I hongo macek won pondeponde macol oumo polo gi koyo m'okudho to koth madwoŋ cwe. Ahab ogweyo cawila pere to dok i Yezirel.

⁴⁶ Meni obino kwoŋ Elia, otweyo nangin pere i piere aka oŋweco yuwiy Ahab kiri i waŋkac ma Yezirel.